Ia jrao hrŏm hăng gru grua, pơtô hrăm jing hơdôm bruă yom phun hloh, ƀu kơnong jing hơnong pơkă đôč ôh ăt jing tơlơi gêh găl či đĭ kyar mơnuih mă bruă. Anun lĕ tơlơi pơhiăp mơ̆ng Khua git gai Ping gah ơi Tô Lâm lơ̆m Khua mua pơ ala mơnuih ƀôn sang pơčrông ƀơi grup kơ 2 jơlan hơdră Dêh čar pơtrun wai lăng tơlơi suaih pral, mrô ană mơnuih hăng đĭ kyar laih anun bruă pơplih phrâo abih bang, pơđĭ tui anŏ klă bruă pơtô hăng pơjuăt amăng rơwang thun 2026-2030. Tui hăng Khua git gai Ping gah, tơlơi pơtrun dêh čar ta ƀu kơnong bruă pơtô hrăm ƀudah ia jrao đôč ôh, ăt mơ̆ng abih bang mơnuih tơpuôl gum nga. Hăng bruă Ia jrao, ơi Tô Lâm lăi yôm kiăng pơplih bruă akŏ phun jing wai lăng tơlơi suaih pral blung a, hăng pơhlom pơgang hlâo, pơsir đut tơhnal djŏp tơlơi bơbeč yua mơ̆ng anih hơdip jum dar, ia yua hơdjă, ƀong huă hơdjă - hơdôm tơlơi ngă duam ruă. Tơdah ƀu pơsir đut tơhnal, mah man pơdong tui lu sang ia jrao tŭ mơn ăt ƀu dưi ngă tui hăng tơlơi kiăng lơi.“Hăng ia jrao, yom hloh lĕ lăng ba tơlơi suaih pral năng blung mơtăm, khŏm pơhlom pơgang hlâo. Bơ ră anai glăk pơƀut khăm pơjrao đôč, kah hăng ƀu apui ƀong lĕ ta čruih hnun đôc - yua pơhlom ƀu klă yơh mơ̆ng hơmâo tơlơi ruă. Khŏm pơsit rim bruă mă, tơlơi hơget glăk hơmâo? 5 thun dong ƀing ta dưi mơn tla mă? Khŏm rơđah tui anun. Ruă lao ƀơi rŏng lŏn tơnah arăng lui sui yơh, pioh ƀă hyu pơpă leng kơ rơngiă lu prăk soh. Ruă hơtai hiư̆m pă, ƀă hyu tui ƀơi? Kâo pơmin jơlan hơdră dêh čar lĕ khŏm ngă bruă sit, djơ̆ tơlơi gơñăm nao”.

Jơlan hơdră dêh čar pơtrun wai lăng tơlơi suaih pral, mrô ană mơnuih, hăng đĭ kyar rơwang thun 2020-2035 hơmâo Khua mua pơ ala mơnuih ƀôn sang dêh čar tŭ ư pơsit brơi, kiăng pơhlom abih bang mơnuih leng kơ hơmâo wai lăng tơlơi suaih pral mơ̆ng blung mơtăm, pơgang tơlơi duam ruă tañ, mơ̆ng ataih, amăng  plơi mơtăm, plai ƀiă hơmâo tơlơi duam ruă; ană nge hơmâo tơkeng rai lu tui, gir mrô đạ kơmơi đah rơkơi dưm kơnar, dưi đĭ kyar mơn mah mrô mơnuih jai tha tui, pơđĭ tui anŏ klă ană mơnuih; wai lăng ba ƀing tơnap tap, ƀu hơmâo pô čem rông; ngă hiam drơi jăn pran jua, hơdip sui tui, hơdip klă tui, akŏ pơdong kơnuk kơna Việt Nam kjăp pran.

Kơ bruă tuh pơ alin Jơlan hơdră dêh čar pơtrun kơ wai lăng tơlơi suaih pral, mrô ană mơnuih hăng đĭ kyar rơwang thun 2026-2035, jơlan hơdră anăp nao wai lăng tơlơi suaih pral kơ abih bang mơnuih, pơđĭ tui tơlơi apăn bruă mơ̆ng sang ia jrao, pơgang duam ruă tañ, pơplih klă mrô ană mơnuih, pơgang glăi mrô mơnuih tha lu tui, hăng djru ba lu hloh kơ ƀing tơnap tap, drit druai. Khua ding jum ia jrao Đào Hồng Lan brơi thâo:“Kơ hơdôm kơčăo bruă, boh tơhnal mă bruă mơ̆ng jơlan hơdră, hơmâo pơƀut djŏp khul grup či ngă. Tơlơi yom phun lĕ pơđĭ tui anŏ klă bruă mă mơ̆ng sang ia jrao, ia jrao pơhlom pơgang, pơtrut bruă wai lăng mrô ană mơnuih, đĭ kyar pơhlom anŏ klă mrô ană mơnuih, kiăo tui mrô ană mơnuih jai hrơi tha tui, lăng ba abih bang mơnuih tơnap,ƀu hơmâo pô lăng ba. Anai jing hơdôm bruă yom phun gah ia jrao hăng mrô ană mơnuih, glăk kiăng pơƀut ci pơsir hĭ tơlơi tơnap, anŏ gun amăng mông ngă bruă. Hơdôm tơlơi gun anun kiăng pok pơhai ngă tui djŏp hơnong pơkă yom hơmâo lăi kơ tơlơi pơtrun gơnong dlông”.

Tơlơi gơñăm ngă tong ten mơ̆ng Jơlan hơdră dêh čar pơtrun kơ wai lăng tơlơi suaih pral, mrô ană mơnuih hăng đĭ kyar rơwang thun 2026-2035 jing djru ngă tui hơnong pơkă să, phường, kual wai lăng phara djơ̆ Hơnong pơkă dêh čar kơ ia jrao să lĕ 90% amăng thun 2030 hăng 95% truh thun 2035. Gir hơmâo mrô mơnuih ƀôn sang hơmâo pơmut hră krăo lăng tơlơi suaih pral điện tử hăng wai lăng tơlơi suaih pral tui thun hơdip hơmâo 100% mơ̆ng thun 2030. Mrô anom bruă pơgang duam ruă hơdôm boh tơring čar, ƀôn prong dưi pơčrang drah, sem lăng kman virus ƀă hyu, ia hơdjă, agaih amăng sang hră tui tơlơi pơkă mơ̆ng Ding jum ia jrao truh thun 2030 hơmâo100%. Mrô sang ia jrao să, phường, kual wai lăng phara hơmâo pơhlom pơgang, wai lăng, pơjrao brơi tơlơi ruă huăi ƀă hyu tui tơlơi pơtô mơ̆ng Ding jum ia jrao truh thun 2030 hơmâo 100% laih anun hơmâo ngă truh 2035. Mrô čơđai rơwang akhen yŭ 5 thun truh thun 2030 trun yŭ 15%, truh thun 2035 dŏ glăi yŭ 13%.