Hơdôm hrơi hăng anai, ƀơi tơdron rơdêh por Cam Ranh, bruă mă pel ĕp kman duăm ruă dưi ngă tong ten biă mă. Tơjuh boh măi pơkă lăng drơi jăn pơčrang mơ̆ng ataih arăng dưm ƀơi bah amăng mut tơbiă ƀơi amăng jang guai dêh čar. Ƀing tơhan gah sang bruă ia jrao kơtưn dŏ krăp lăng hrơi mlam, kiăng thâo tong ten abih bang ƀing tuai mut tơbiă. Hrŏm hăng anun, lu hnăl pơkă pơtô brơi hơdră pơhlom pơgang klin ăt dưi pơdưm ƀơi lu anih anom amuñ thâo ƀuh, pơtô brơi ƀing tuai thâo pơhlom mă tơlơi suaih pral hăng ngă hrŏm ƀing ngă bruă gah ia jrao tơdah ƀuh amăng drơi jăn duăm hlor pơ-iă. Truh ră anai, hơdôm rơbâo čô tuai mut tơbiă hơmâo sem lăng hăng lăi pơthâo tong ten tui tơlơi phiăn pơkă gah ia jrao.

Ơi Lê Văn Tùng, Khua anom bruă sem lăng kman duăm ruă gah ia jrao jar kmar tơring čar Khánh Hòa, brơi thâo:

“Ƀing tuai nao pơ tơdron rơdêh por jar kmar Cam Ranh lĕ abih bang khom găn nao pơ măi pơčrang anun soh. Hlơi pô arăng đing đăo glăi mơ̆ng anih hơmâo klin Nipah hlăk ƀă hyu, ƀing ơi ia jrao khom ba ñu nao pơ sang ia jrao dŏ pơčlah pioh krăp lăng hlâo jăng jai, kiăng thâo tong ten tơlơi pơhing. Tơdah ječ ameč biă mă lĕ, lăi pơthâo sang bruă kơnuk kơna hơmâo tơlơi dưi, brơi ba nao pơ sang ia jrao giăm anun hloh, pioh mă drah pơčrang hăng krăp lăng hlâo”.

Ƀu kơnong ƀơi amăng jang jơlan guai dêh čar đôč ôh, bruă krăp lăng klin kheng hŭi ƀă hyu dưi kơtưn hyu mă bruă amăng djop anih amăng tơring čar. Anom bruă wai lăng duăm ruă ƀă kman tơring čar Khánh Hòa krăp lăng tong ten ĕp tui tơlơi pơhing amăng dêh čar hăng mơ̆ng tač rơngiao, pơtrut bruă kơđiăng, răng ten amăng kual lu mơnuih găn rơgao nao rai hăng djop sang ia jrao, anih lu mơnuih nao pơkă lăng tơlơi duăm ruă, kiăng ƀuh tañ hmao pơgăn hĭ, tơña ten, ĕp phun tơdŭ mơ̆ng pơpă hlơi pô arăng đing đăo glăi mơ̆ng anih hơmâo klin. Lơ̆m anun, anom bruă ia jrao tơring čar hơmâo pơtong rơđah, bruă pel ĕp mơtam mơ̆ng amăng jang jơlan guai dêh čar, mut tơbiă ƀơi tơdron rơdêh por laih anun amăng kual lu mơnuih dŏ amăng plơi pla jing sa bruă mă yom hloh, kiăng ƀuh tañ, thâo hmar mơ̆ng blung a. Ơi ia jrao Huỳnh Trọng Tân, Khua anom pơhlom tơlơi duăm ruă ƀă kman, Sang bruă sem lăng pơgang duăm ruă tơring čar Khánh Hòa brơi thâo:

“Tui hăng tơlơi pơčrâo ngă bruă khom sem lăng, pel ĕp klă mơ̆ng anih mă bruă ƀơi amăn jang mut tơbiă či tơdron rơdêh por hăng amăng kual plơi pla, tui hăng tơlơi git gai mơ̆ng Anom bruă ia jrao hăng Gơnong bruă ia jrao tơring čar, truh ră anai, aka ƀu hơmâo ôh mơnuih ƀă samơ̆ gơmơi ăt prăp lui tong ten pơhlom pơgang pơhrua nao tong ten, djơ̆ lăp wơ̆t hơdră pơjrao ječ ameč hmao kru”.

Kman visur Nipah lĕ sa tơlơi ruă ƀă kman A, dưi ƀă mơ̆ng hlô mơnong truh pơ ană mơnuih laih anun mơ̆ng pô anai ƀă kơ pô adih, mrô mơnuih ƀă kman truh duăm kraih djai lu biă mă mơ̆ng 40-70%. Ră anai, aka ƀu hơmâo ia jrao vaccine dưi pơjrao ôh. Lơ̆m dêh čar India arăng čih pioh hơmâo laih lu mơnuih ƀă, hŭi ƀiă ƀă rai pơ dêh čar ta. Ƀuh rơđah anun, anom bruă ia jrao tơring čar Khánh Hòa ăt prăp lui bruă ngă pơgang hlâo tong ten, pơtrut pơsur mơnuih ƀôn sang khom kơđiăng tong ten, prăp lui hơdră pơhlom mă ta pô, ngă hrŏm kơjăp hăng sang bruă ia jrao kiăng pơgang tơlơi suaih pral drơi jăn ta pô hăng amăng plơi pla. Ƀơi  anih dŏ pơjrao mơnuih duăm ruă, bruă phun mông sanai kiăng ngă djơ̆ hơdră dŏ pơčlah phara mơnuih duăm hăng sang anŏ laih anun pơhlom brơi tong ten wơ̆t ƀing ơi ia jrao hai. Ƀơi sang ia jrao pơjrao tơlơi duăm ruă ƀă kman Bệnh viện Nhiệt đới tơring čar Khánh Hòa, anih dŏ pơčlah hơmâo prăp lui laih ngă tong ten hăng anih dŏ, jơlan rô nao rai ăt phara soh,  ia jrao pơjrao, mơnuih mă bruă hăng gơnam yua pơhlom prăp lui djop.

Ơi ia jrao Lý Thế Huy, Kơ-iăng Khua sang ia jrao Bệnh viện Nhiệt đới tơring čar Khánh Hòa lăi:

“Sang ia jrao hơmâo prăp lui djop laih mrô mơnuih mă bruă, kiăng pơhlom brơi anih dŏ pơčlah pơjrao phara hơjan, pơpha jơlan rô nao rai, prăp lui djop ia jrao, gơnam yua mă bruă pơhlom pơgang lơ̆m mă bruă kiăng kơ pơjrao djơ̆ lăp tui hăng tơlơi truh tơdah hơmâo sit nik”.