VOV4.Jarai - Pơyơr drah djru mơnuih jing bruă ngă hiam mơng djuai ania ta. Hăng tơlơi pơtrun “Rim tơdjoh drah brơi nao, sa tơlơi hơdip dŏ glăi”, bruă djru drah glăk bang hyu kơtang biă ƀơi kual Dap Kơdư. Mơng anun, pơhrua tui mrô drah mơ̆ sang ia jrao kiăng, đah mơng dưi djru ba tañ ƀing ruă kraih hăng pơjrao brơi mơnuih ruă.

Giăm 20 thun anai, ayong Hoàng Minh Trung, Khua grup “Hành trình đỏ” tơring glông Čư̆ Kuin, tơring čar Dak Lăk lêng kơ nao pơyơr drah rim thun 2 wơ̆t. Ră anai, ñu hơmâo 38 wơ̆t laih ba nao brơi drah. Ayong Trung ră ruai: Hlâo adih, amăng ha wơ̆t mut nao pơ sang ia jrao pơjrao tơlơi ruă, ñu hăng sang anŏ ñu kiăng yua drah. Lơ̆m anun, sa anung drah pơmă prăk biă mă. Tơdah ƀu hơmâo arăng djru brơi drah, sang anŏ ñu ƀu thâo ngă hiư̆m pă ôh, yua dah sang anŏ hai tơnap mơn. Yua hnun, tơdơi kơ glăi mơng sang ia jrao, hơmâo pran glăi baih, kâo nao pơyơr drah, jak iâu kơnung djuai, neh met wa nao hrŏm.

“Pô kâo anai hơmâo ha wơ̆t laih kiăng drah, laih anun amăng sang anŏ hơmâo amĭ kâo kiăng drah mơn, anun jing lăng lơm hơmâo drah brơi kơ sang anŏ ta jing mơ-ak ƀu thâo anŏ lăi dong tah. Ƀu hơmâo prăk hơget ôh dưi brơi drah tui anun. Laih anun, yôm hloh lơ̆m ta nao pơtô pơblang, iâu pơthưr nao brơi drah hơmâo abih bang tŭ ư, hmư̆ tui, tui anun jing tơlơi mơ-ak biă mă yơh”.

Amăng thun 56, ơi Nguyễn Tấn Chờ, dŏ ƀơi să Quảng Tiến, tơring glông Čư̆ M’gar ăt hơmâo lu wơ̆t laih pơyơr drah. Ñu brơi thâo: Drah Ab+ mơng ñu jing drah hui đôč mơng hơmâo, anun jing hơmâo mơnuih kiăng biă. Ñu mơ-ak amăng pran jua yua dah drah ñu brơi dưi bơhơdip brơi mơnuih ruă.

“Truh ră anai, kâo hơmâo pơyơr drah 44 wơ̆t laih. Tơlơi gơmơi hơdor hloh anun lĕ tal blung a kâo brơi drah djru hơdip brơi sa čô gŏp. Tơdơi anai dong lĕ kâo brơi tiểu cầu djru hơdip brơi sa čô čơđai 3 thun”.   

Tui hăng ơi Y Wem Hwing, Kơ-iăng khua Jơnum min mơnuih ƀon sang tơring glông Čư̆ M’gar: Yua ngă klă bruă iâu pơthưr, truh ră anai, neh met wa thâo hluh pơyơr drah huăi ngă sat kơ tơlơi suaih pral ôh, brơi drah djru bơhơdip mơnuih duam ruă.

“Hlâo adih, mơnuih djuai ania Êđê gơñu ƀu nao pơyơr drah đơi ôh. Samơ̆ ră anai, mơng hlăk ai truh kơ ƀing tha djuai ania Êđê lăi hơjăn hăng mơnuih ƀon sang 24 phung djuai hơdip pơ tơring glông Čư̆ M’gar lêng hur har pran jua pơyơr drah. Gơñu brơi drah lu wơ̆t, lơ̆m hmư̆ hing pơpă kiăng drah lĕ gơñu djru brơi mơtăm”.

Ƀing juăt ngă bruă hiam ƀơi Dak Lăk gum pơyơr drah.

Ơi Nguyễn Đức Phú, Khua anom bruă iâu pơthưr pơyơr drah tơring čar Dak Lăk, brơi thâo: Tơdah tui hăng thun 2003, tơring čar kơnong iâu pơthưr hơmâo giăm 700 anung drah đôč lĕ, truh ră anai, rim thun iâu pơthưr hơmâo rơbêh 22.000 anung drah. Hơdôm anung drah anun hơmâo djru ba tañ kơ ƀing ruă.

“Hăng bruă iâu pơthưr pơyơr drah lĕ mơnuih ƀon sang ñu hur har pran jua pơpha brơi drah mơtăm yơh kơ mơnuih duam ruă. Kiăng mơnuih ruă hơmâo drah pơjrao tơlơi ruă tañ hloh. Tơdah hơmâo pô kơƀah drah lĕ Anom iâu pơthưr pơyơr drah tơring čar prăp lui laih kiăng grup pơyơr drah prăp lui kah hăng: Grrup hơdôm anom bruă tơring čar, sang hră gưl prong Dap Kơdư, grup Huyết hồng mơng kông an tơring, grup hơdôm boh sang hră gơñu amra pơyơr drah kiăng brơi drah djru brơi mơnuih ruă kraih, mơnuih duam ruă”.

Bruă pơpha brơi drah ƀơi Dak Lăk ră anai hmư̆ hing hyu abih bang laih. Hơdôm tơdjoh drah ƀu kơnong ba glăi tơlơi hơdip kơ lu mơnuih ruă đôč ôh mơ̆, ăt pơdah pran jua kiăng khăp, pơdjru nao rai, pơjing rai hơdôm tơlơi klă hiam.

Phrâo rơgao, Anom bruă iâu pơthưr djru drah plơi prong Pleiku, tơring čar Gia Lai ăt ngă hrŏm hăng hơdôm anom bruă pơphun pơyơr drah tal 1 thun 2022. Hăng tơlơi pơmin “Pơpha brơi drah - Brơi tơlơi čang rơmang”, hrơi pơyơr drah tal anai hơmâo rơbêh 300 čô khua, mơnuih mă bruă, hlăk ai, ling tơhan blah ngă hăng mơnuih ƀon sang ƀơi plơi prong Pleiku gum ngă. Amai Võ Thị Quỳnh Trâm, Kơ-iăng khua hlăk ai phường Tây Sơn, plơi prong Pleiku ră ruai:

“Hrơi anai jing tal 12 kâo pơyơr drah, kâo hơmâo pran biă lơ̆m pơpha drah brơi ƀing tơnap, hơmâo tơlơi ruă kơtang. Ăt amăng jơlan hơdră djru drah tal 1 mơn, tơdơi anai amra ngă pơhưč lu hlăk ai dong, ăt kah hăng ƀing hơmâo pran jua hiam nao brơi drah lu hloh. Amăng hrơi mông klin Covid-19 lĕ hlâo či nao brơi drah kâo test Covid ƀơ̆i kah, ngă tui 5K kiăng huăi pơƀă hyu kơ arăng”.

Hrơi abih bang mơnuih gum pơyơr drah thun 2022 ƀơi Kon Tum.

Ăt amăng blan 4 anai mơn, Anom iâu pơthưr pơyơr drah tơring čar Kon Tum hơmâo pơphun “Hrơi abih bang mơnuih djru pơyơr drah thun 2022”. Pơhiăp ƀơi mông pơphun ngă, Kơ-iăng khua Jơnum min mơnuih ƀon sang tơring čar Kon Tum, yă Y Ngọc kiăng abih bang anom bruă hăng mơnuih ƀon sang lăng nao, ngă bruă hiam djru mơnuih ruă. Tơdơi kơ hrơi pơphun hơmâo rơbêh 300 anung drah hơmâo mơnuih ƀon sang tơring Kon Tum pơgôp nao pơ “Sang pioh drah ba hyu” djru pơjrao brơi mơnuih ruă./.

Siu H’Mai: Pơblang