VOV4.Jarai - Hrơi blan rơgao, ƀơi tơring čar Dak Lăk hơmâo lu laih tơlơi truh ƀlung ia, ngă lu čơđai djai. Anom apăn bruă glăk pok pơhai lu hơdră djru plai ƀiă hơmâo tơlơi truh rơngôt tui anai.

Phrâo tom brơi tom adih anai, ƀơi să Cư̆ Pơng, tơring glông Krông Ƀuk (Dak Lăk) hơmâo tơlơi truh ƀlung ia, ngă 3 čô drơi amai ha boh sang mơtăm djai. Pô prong glăk 9 thun, pô anet hloh 5 thun. Amai Nguyễn Thị Loan, wa pô mơng ƀing djai ol kơdol, ƀu truh pơhiăp:“Yang hrơi dong amĭ ñu glăi lĕ pô prong tơña amĭ ñu nao ngui pơ dơnao ia hiam, amĭ ñu ƀu brơi ôh, pơhŭi hlâo yơh, nao ngui pơ dơnao ia ƀlung. Giong anun ñu đuăi hĭ mơn, năng ai ha mơkrah mông tơdơi kơ anun lăng ƀu ƀuh dong tah ƀing ană ñu kah mơng bral hyu ĕp. Lơ̆m hyu ĕp lĕ adơi kâo hơdor ană ñu tơña nao ngui pơ dơnao ia gah tlôn, anun jing đuăi nao lăng, truh pơ anih lĕ lăng ƀuh jĕp, hyu ĕp nao ĕp rai jing ƀuh 2 čô ană ñu đung đĭ hăng ia, pô tơdơi dong arăng ñŭ mă amăng ia, ba đĭ hăng kơdư gư̆ tơda, bluh amăng bah samơ̆ ƀu hmao dong tah”.

Dơnao Ea Dhung Tiêng, să Čư̆ Pong, tơring glông Krông Ƀuk, anih 3 adơi amai ha boh sang djai ia ƀlung.

Amăng hơdôm čô čơđai djai hơmâo 2 čô hrăm pơ sang hră gưl sa Phạm Hồng Thái, să Čư̆ Pơng. Nai Vũ Thị Vân - Khua sang hră brơi thâo, amăng sang hră hơmâo dơnao pioh luai, him lăng bơyan pơdơi prong, tơdơi kơ klin Covid-19 tơdu ƀiă, sang hră pok glăi anih pơtô čơđai hrăm luai. Ƀing čơđai hơmâo anăn amăng hră hrăm luai, samơ̆ aka ƀu hmao nao hrăm ôh hơmâo tơlơi truh laih.

“Tơdah klin tơdu ƀiă lĕ sang hră brơi pơtô čơđai hrăm luai. Gah grup wai lăng čơđai lêng pơtô pơblang kơ ƀing čơđai thâo hơdră pơgang tơlơi ƀlung ia, tơlơi truh rơka rơkač či pơgang brơi ƀing čơđai. Mơng hlâo truh ră anai, sang hră aka ƀu hơmâo ôh tơlơi truh prong tui anai, ruă pran biă mă, lơ̆m ha wơ̆t rơngiă hĭ dua čô čơđai hrăm rơgơi, lăng ƀu-eng biă”.

Anom bruă kơnuk kơna nao juh alum, rơngôt hrŏm sang anŏ, laih anun brơi giăm 130 klăk prăk kơ sa anŏ hơmâo 3 čô ană djai ƀơi să Čư̆ Pong, tơring glông Krông Ƀuk, Dak Lăk.

Tui mrô jŭ yap mơng Gơnong bruă Mơnuih mă bruă Tơhan rơka hăng Mơnuih mơnam tơring čar Dak Lăk brơi ƀuh, thun 2020, ƀơi tơring čar hơmâo 54 tal tơlơi truh ƀlung ia, ngă 73 čô čơđai djai; amăng thun 2021 lĕ 48 tal, hăng 51 čô čơđai djai. Kơnong amăng hơdôm hrơi rơnuč blan 3/2022, hơmâo 2 tơlơi truh ƀlung ia, ngă kơ 5 čô čơđai djai ƀơi tơring glông Ea Sup hăng Krông Ƀuk.

Ơi Nguyễn Duy Tuyết - Khua anom bruă Djru ba Mơnuih mơnam, Gơnong bruă Mơnuih mă bruă Tơhan rơka hăng Mơnuih mơnam tơring čar Dak Lăk brơi thâo, amăng hơdôm thun giăm anai, bruă čơđai djai ia ƀlung ƀơi Dak Lăk mah tơdu ƀiă, samơ̆ ăt dŏ lu đôč, biă ñu hơmâo tơlơi truh djai lu mơnuih lơ̆m sa wơ̆t. Anom apăn bruă hăng gong gai pơtă pơtăn na nao kơ mơnuih ƀon sang pơgang ba rơnuk rơnua kơ ƀing čơđai, biă ñu amăng bơyan pơdơi prong.

“Anom bruă Mơnuih mă bruă Tơhan rơka hăng Mơnuih mơnam jing anom bruă git gai, gong gai tơring glông, să khŏm hyu pơtô pơblang kơ amĭ ama ƀing čơđai, ƀudah ƀing wai lăng pơgang ba ƀing čơđai pơkŏn khŏm krăp lăng čơđai pơ sang, ƀu brơi ană bă nao ngui pơ dơnao ia, ia čroh hŭi rơhyưt ôh”.

Lăi nao bruă pơgang tơlơi truh djai ƀlung ia kơ ƀing čơđai, ơi Đỗ Tường Hiệp - Kơ-iăng khua Gơnong bruă pơtô hăng pơjuăt Dak Lăk lăi pơthâo.

“Gơnong bruă pơtô hăng pơjuăt git gai abih bang sang hră pơtô brơi ƀing čơđai thâo pơgang tơlơi truh ƀlung ia; pơkiăo nao ƀing nai pơtô bơkơjăp drơi jăn nao hrăm bruă đah mơng djru pơtô brơi čơđai hrăm luai. Čih hơdră pơgang tơlơi truh, amăng anun hơmâo tơlơi truh ƀlung ia ƀơi abih bang sang hră, gir truh thun 2030 hrŏ trun 10% mrô tơlơi truh djai ia ƀlung, truh thun 2050 lĕ 50% čơđai sang hră ƀơi Dak Lăk thâo luai”.

Lơ̆m sang anŏ, sang hră hăng abih bang mơnuih thâo pơmin pơgang tơlơi truh sat kơ ƀing čơđai, amăng anun hơmâo tơlơi truh djai ia ƀlung, čang rơmang amăng hrơi blan pơ anăp Dak Lăk amra huăi hơmâo dong tah tơlơi rơngôt, ruă pran jua yua tơlơi truh djai ia ƀlung.

Tuấn Long: Čih - Siu H’Mai: Pơblang