VOV4.Jarai - Anom bruă wai pơgang klin duam ruă ƀon prong Hồ Chí Minh brơi thâo, ƀon prong hơmâo dong 1 čô mơnuih djai yua duam đung drah. Tui anun hơmâo laih 17 čô mơnuih djai yua duam đung drah mơng akŏ thun truh ră anai, đĭ 14 čô mơnuih pơhmu hăng thun 2021. Amăng rơwang hrơi tơjuh blung a mơng blan 8, (mơng lơ 1 truh lơ 7/8), ƀon prong pơsit hơmâo 3.066 čô mơnuih duam đung drah, dưm dưm hăng mrô mơnuih ruă rơwang hrơi tơjuh hlâo, tơdu trun 6,4% pơhmu hăng mrô jŭ yap amăng 4 wơ̆t hrơi tơjuh, amăng anun mrô mơnuih đih pơ sang ia jrao trun 3,5%, pơjrao gah rơngiao trun 9,4%. Pơƀut mơng akŏ thun truh ră anai, ƀon prong Hồ Chí Minh hơmâo 39.449 čô mơhnuih duam đung drah, đĭ rơbêh 378% pơhmu hăng tơđar thun 2021, hăng mrô mơnuih duam kơtang lĕ 679 čô. Ƀon prong ăt čih pioh hơmâo dong 181 anih hơđuh đĭ klin duam đung drah ƀơi 96 boh phương, să gah 20/22 boh kuâ̆n, tơring glông, plơi prong Thủ Đức, tơdu  trun 18 anih hơmâo klin phrâo pơhmu hăng 2 wơ̆t hrơi tơjuh hlâo kơ anun.

Siu H’Mai: Pơblang