VOV4.Jarai - Ƀơi anăp tơlơi pơhing kơ huĭ kơman tưp mut amăng dêh čar ta mơng djuai pơplih phrâo kơman klin BA.4, BA.5 hăng wot kơman BA.2.12.1, hơdôm hrơi rơgao, mơnuih ƀôn sang ƀơi tơring čar Daklak hmâo ngă klă hloh bruă nao tlâ̆o vaccine ară tal 3, tal 4 pơgang Covid-19.

Anih tlâ̆o pơgang hlôm hlâo mơng Anom wai lăng tơlơi duam ruă tơring čar Daklak hơdôm hrơi rơgao dik dak mơnuih nao tlâ̆o vaccine pơgang Covid-19. Dô̆ tơguan truh pô tlâ̆o vaccine, amai Nguyễn Thị Hoa ƀơi phường Thống Nhất, plơi prong Buôn Ma Thuột brơi thâo, tơdơi kơ tlâ̆o djop 3 ară vaccine, blan 2/2022 ñu djơ̆ Covid-19. Hơdôm hrơi suaih ruă sui laih samơ̆ ñu akă kiăng nao tlâ̆o ară tal 4 mơn. Khă hnun hai, lơm hmư̆ tơlơi pơhing kơ anô̆ pơplih mơng Covid-19 hmâo laih ƀơi dêh čar ta anun ñu pơsit glăi.

“Ƀu khin tlâ̆o ară tal 4 samơ̆ djơ̆ kman laih anun huĭ, ră anai hmâo djuai pơplih phrâo khom nao tlâ̆o pơgang, huĭ lar tưp hyu kơman klin pơplih phrâo, kơtang hloh, ră anai nao tlâ̆o ară tal 4. Djop mơnuih tâ̆o hloh nao tlâ̆o ară tal 4 kiăng pơgang tơlơi suaih pral kơ pô hăng sang anô̆”.

Mơnuih ƀôn sang nao pơ̆ anih tlâ̆o pơgang rơkâo tlâ̆o pơgang đĭ lu hloh bơhmu hăng hơdôm hrơi hlâo adih

Bơngot kơ kơman klin pơplih phrâo ăt lĕ bôh than rơkơi bơnai ơi Nguyễn Văn Hải ƀơi phường Tân Thành, plơi prong Buôn Ma Thuột, tañ nao tlâ̆o ară lok glăi vaccine pơgang Covid-19:

“Ră anai rơkơi bơnai kâo pơsit nao tlâ̆o ară tal 4 yua kơ hmư̆ lăi klin gluh glăi dong kâo ăt bơngot mơn hăng kâo pơmin đĭ dong liều lok glăi kiăng hmâo dơng pran pơgang hlôm hlâo hăng drơi pô ăt kah hăng plơi pla pô ăt klă mơn”.

Mơnuih ƀôn sang dô̆ tơguam truh kơ pô tlâ̆o pơgang

Ơi ia jrao Võ Minh Hùng, Khua Anom ia jrao plơi prong Buôn Ma Thuột brơi thâo: Ră anai, mrô mơnuih rơbêh kơ 18 thun plơi prong hmâo pok pơhai tlâ̆o ară tal 3 hmâo rơbêh kơ 45%, ară tal 4 hmâo 6% hăng ară tal 3 kơ čơđai mơng 12-17 thun hmâo 38%. Bôh tơhnal anai lĕ akă djơ̆ ôh hăng tơlơi ba tơbiă mơng Ding jum ia jrao. Khă hnun hai, hơdôm hrơi rơgao, mrô mơnuih ƀôn sang gum hrom tlâ̆o vaccine ară tal 3, tal 4 đĭ lu biă, biă ñu amăng tal 24 hăng tal 25 hăng năng ai ñu 20.000 liều vaccine, Anom ia jrao hmâo pok pơhai laih tlâ̆o vaccine, ƀu ba truh tơlơi rơbêh vaccine abih hrơi pơkă.

“Tơlơi thâo mơng mơnuih ƀôn sang phun ñu ăt hmâo laih yak pơplih lăp yap ba amăng bruă pơgang pơgăn klin. Mrô mơnuih ƀôn sang amăng hơdôm hrơi jê̆ hăng anai ăt nao laih pơ̆ hơdôm bôh sang ia jrao, hơdôm bôh anom ia jrao kiăng dưi pok pơhai tlâ̆o ară tal 3 tal 4 lu biă”.

Nai ia jrao tlâ̆o vaccine pơgang Covid-19 ară tal 4 kơ mơnuih ƀôn sang

Ơi ia jrao Hoàng Hải Phúc, Kơ-iăng Khua Anom wai lăng tơlơi duam ruă tơring čar Daklak brơi thâo, amăng rơwang hrơi tơjuh rơgao, mrô mơnuih ƀôn sang nao tlâ̆o vaccine pơgang Covid-19 đĭ lu biă. Anai lĕ gru nam klă djru Daklak dưi ngă giong tơhnal pơkă truh abih blan 8 abih bang tơring čar hmâo rơbêh kơ 90% mrô mơnuih ƀôn sang tlâ̆o vaccine pơgang Covid-19 ară tal 3.

“Truh blan 8 ƀing gơmơi amra pok pơhai dong sa tal hăng ƀing gơmơi hmâo laih hră pơ-ar mơ-ĭt kơ hơdôm bôh anom pơtrut tañ rơnoh tlâ̆o pơgang. Kiăng dưi ngă bruă anai sit ñu sa čô gơnong bruă ia jrao ƀu dưi ngă ôh, khom hmâo tơlơi črâo ba djơ̆ mơng Ping gah tơring čar, Ping gah plơi prong, Pơing gah tơring glông kiăng hyu rim anih, rim sang rơkâo mơnuih ƀôn sang kĭ pơkôl, rơkâo mơnuih ƀôn sang khom ngă tui kiăng tlâ̆o vaccine. Tlâ̆o vaccine ƀơi anai ƀu djơ̆ pơgang hlôm hlâo tơlơi ruă ôh mơ̆ tlâ̆o vaccine kiăng pơgang hlôm hlâo klin ruă hrom mơng abih bang mơnuih mơnam”./.

Nam Trang: Čih – Siu H’ Prăk: Pơblang