Chơ Chun lĕ să guai dêh čar tơnap tap gah tơring glông čư̆ siăng Nam Giang, tơring čar Quảng Nam. Să anai hmâo 3 bôh plơi hăng giăm truh 250 bôh sang anô̆, lu biă ñu neh wa djuai ania Kơ Tu. Hmư̆ hing hmâo grŭp hyu mă bruă mơ̆ng Anom bruă ia jrao Khul ling tơhan pơgang guai dêh čar tơring čar Quảng Nam pơphun pel ĕp pơjrao tơlơi ruă hăng pha brơi ia jrao kơ să Chơ Chun, mơ̆ng mơguah, ơi A Viết Mư hăng mơnuih ƀôn sang plơi Blăng, să Chơ Chun, tơring glông Nam Giang hmâo găn rơgao jơlan glông ataih yaih pioh ƀuh ƀô̆ ƀơi anih pel ĕp tơlơi ruă. Ñu lăi:

 “Juăt ñu kiăng pel ĕp tơlơi ruă lĕ khom nao pơ̆ hơdôm bôh sang ia jrao ƀôn prong Đà Nẵng ƀudah tơring glông Đại Lộc, tơring čar Quảng Nam, samơ̆ ƀing gơmơi lĕ ƀu hmâo prăk, ƀu hmâo rơdêh nao, ƀu dưi nao pel ĕp tơlơi ruă ôh. Hrơi anai hmâo adơi ayong ling tơhan rai pel ĕp tơlơi ruă kơ mơnuih ƀôn sang kual guai dêh čar, kâo ăt hơđong pran jua mơn”.

Rơngiao kơ pel ĕp brơi abih bang hăng pơpha ia jrao kơ mơnuih ƀôn sang, ƀing ơi, nai ia jrao Khul ling tơhan pơgang guai dêh čar tơring čar Quảng Nam dô̆ djă ba hơdôm măi mok mă yua rơnuk anai pioh dưi pel ĕp hăng thâo hơdôm tơlơi ruă mơ̆ mơnuih ƀôn sang kual čư̆ siăng juăt hmâo kah hăng ruă hlung, suă pran, ară drah hơtai bôh, tơlang tơleh... Mơ̆ng anun, lăi pơthâo kơ mơnuih ƀôn sang pơtô brơi pơjrao lăp djơ̆, lăi pơhing, pơtô brơi mơnuih ƀôn sang rơnăk hơdjă anih anom dô̆, pơgang pơgăn hơdôm tơlơi ruă tưp. Ơi Riah Pêl, Khua Jơnum min mơnuih ƀôn sang să Chơ Chun, tơring glông Nam Giang brơi thâo, hơdôm hrơi rơgao mơnuih ƀôn sang ƀơi anai ƀơƀrư̆ lui hĭ laih phiăn juăt ƀu tŭ yua sô hơđăp, ƀu hmư̆ tui pơjâo ngă yang dong tah lơm duam ruă, pơ-iă drơi, tơkeng ană...

 “Bruă anai ngă gal brơi abih pran jua kơ mơnuih ruă amăng đơ đam să. Sa dua čô mơnuih ruă kraih lĕ thâo tơlơi ruă pô hăng ba nao pơ̆ sang ia jrao prong hloh”.

Rim thun, ƀing ơi ia jrao ling tơhan hmâo nao tơl plơi pla ataih yaih hloh ƀơi kual guai dêh čar Việt Nam hăng Lao kiăng pơphun lu tal pel ĕp, pơjrao tơlơi ruă kơ mơnuih ƀôn sang. Gơñu ƀu kơnong kơ pơjrao hmao tlôn kơ lu mơnuih ruă kraih ôh mơ̆, dô̆ djru brơi mơnuih ƀôn sang kual čư̆ siăng Quảng Nam hăng mơnuih ƀôn sang tơring čar Sê Kông, dêh čar Lao hmâo tơlơi gal ngă juăt hăng bruă bơwih brơi gah ia jrao rơnuk anai dong. Anom bruă ia jrao Khul ling tơhan pơgang guai dêh čar dô̆ pơphun hyu lăi pơhing, lăi pơthâo bruă pơgang pơgăn klin ruă kah hăng duam pơgrun, kơčung tơkai tơngan hăng mơbah, duam pơđung drah... Ƀing ơi, nai ia jrao abih pran jua na nao, neh wa nao lĕ bơwih brơi, pel ĕp pơjrao brơi tơlơi ruă, ƀu pioh neh wa dô̆ tơguan sui, kiăng neh wa nao mă bruă dong. Thượng tá, Ơi ia jrao Lê Đức Mạnh, Khua Anom bruă ia jrao Ling tơhan pơgang guai dêh čar tơring čar Quảng Nam brơi thâo, lu mơnuih thâo pô hmâo tơlơi ruă hăng pơjrao hmao tlôn, mơnuih ƀôn sang ƀơƀrư̆ lom lui phiăn juăt ƀu tŭ yua sô hơđăp:

 “Hluai tui hơdôm bruă mă na nao tui anun, hmâo djru laih khul ling tơhan pơgang guai dêh čar tơring čar Quảng Nam pơjing tơlơi gum hrŏm hơbit hăng neh wa mơnuih ƀôn sang guai dêh čar. Mơng anai, neh wa jai đăo gơnang dong Ling tơhan pơgang guai dêh čar, djru pơgang kơjăp guai lŏn ia pô”.

Đại tá Hoàng Văn Mẫn, gơgrong bruă Ƀirô git gai Ling tơhan pơgang guai dêh čar tơring čar Quảng Nam brơi thâo, thun hlâo, ƀrô djơ̆ Hơdor glăi 60 thun Việt Nam hăng Lao pơdŏng bruă pơtom hiăp hăng 45 thun hrơi kĭ Tơlơi pơkôl giăng mah hăng gum hrŏm Việt Nam – Lao, Khul hlăk ai Sang ia jrao 199 (Ding jum kông ang) gum hrŏm hăng Anom bơwih ƀong mơnuih mơnam Phúc Vạn Phúc hăng Puih kơđông bah amăng jang Nam Giang, tơring čar Quảng Nam hmâo pơphun jơlan hơdră “Mông pơdă gơnam brơi đôč Việt – Lao”, pơkĕ hrŏm pel ĕp, pơpha ia jrao brơi đôč kơ neh wa dêh čar Lao ƀơi bah amăng jang Nam Giang, tơring čar Quảng Nam. Ƀing ơi, nai ia jrao Sang ia jrao 199, Ding jum kông ang pơdŏng ƀơi ƀôn prong Đà Nẵng pơkĕ hrŏm pel ĕp tơlơi suaih pral, lăi pơthâo hăng pha ia jrao brơi đôč kơ abih bang mơnuih ƀôn sang gum hrŏm jơlan hơdră. Đại tá Hoàng Văn Mẫn, gơgrong bruă Ƀirô git gai Ling tơhan pơgang guai dêh čar tơring čar Quảng Nam pơtŏng sit:

 “Amăng tơlơi rô nao rai giăng mah Việt Nam – Lao lăi hrŏm hăng Quảng Nam – Sê Kong lăi ha jăn amra lăi lĕ pha ra ba gru hlâo. Ƀing gơmơi ngă tui na nao phiăn juăt anun gum hrŏm pơdŏng pran gum hrŏm 2 bơnah guai dêh čar jai hrơi jai kơjăp phik giăng mah, gum hrŏm hăng ngă gru ba gru hlâo pha ra”.

Ƀơi “Anih pơdă gơnam brơi đôč Việt –Lao”, hơdôm bôh anom bơwih ƀong gum hrŏm, Ling tơhan pơgang guai dêh čar tơring čar Quảng Nam, Puih kơđông bah amăng jang Nam Giang ƀơk 700 anung gơnam. Rim anung gơnam hmâo nua 300 rơbâo prăk, amăng anun hmâo braih apiang, gơnam ƀong, sum ao... ƀơk brơi mơnuih ƀôn sang djop djuai ania Lao ƀơi tơring glông Đăk Chưng, tơring čar Sê Kong (Lao) hơdip giăm guai Việt – Lao tơlơi hơdip mơda tơnap tap./.