Amai H’Dung Niê dŏ ƀơi ƀuôn Tân Zur, să Ea Kao, plơi prong Buôn Ma Thuột, tơring čar Dak Lak brơi thâo. Hlâo anun, mơnuih djuai ania Êđê ană bă nao hrăm hră aka ƀu lu ôh, aka ƀu thâo phe pho yua anun lơ̆m hơmâo mơnuih duam ruă, ƀing gơñu ƀu ba nao pơ sang ia jrao ôh, mơ̆ juăt pơjrao mă hăng hơdôm djuai jrao tui sô hơđăp, juăt ngă yang kiăng pơsuaih brơi mơnuih duam ruă. Samơ̆ ră anai phara yơh:

“Mơng hrơi hơmâo tơlơi đing nao mơng Ping gah, Kơnuk kơna, man pơdong sang ia jrao plơi pla truh pơ să, plơi prong, ră anai hơmâo pơtô pơblang brơi ƀing đah kơmơi tơkeng ană bă gap ƀrô, ƀudah lơ̆m glăk pi kian kiăng pơhlôm brơi tơlơi suaih pral kơ ană nge amăng hlung pruăi, kiăng nao pơčrang lăng, nao tơl sang ia jrao amăng plơi pla kiăng nai ia jrao črâo ba. Klin Covid-19 hơđuh đĭ blung a amăng să Ea Kao, samơ̆ hơmâo tơlơi đing nao mơng Ping gah, Kơnuk kơna, ƀing gơmơi ăt wai pơgang kjăp, rang kơđiăng hloh, klin kheng amăng plơi pla tơnap tap samơ̆ ƀu hơmâo hlơi ôh ruă kraih ƀudah djai, anai lĕ tơlơi hok mơ-ak amăng hrơi blan laih rơgao”.

Truh ră anai, hăng tơlơi gir run mơng gơnong bruă ia jrao, neh met wa djop djuai ania amăng tơring čar Dak Lak thâo rang kơđiăng amăng bruă bơwih brơi tơlơi suaih pral, thâo nao khăm pơjrao pơ sang ia jrao lơ̆m dju djuam duam ruă, bruă ngă yang, pơjrao hăng hơdôm hla kyâo ƀơƀrư̆ lui hĭ yơh. 100% mrô đah kơmơi tơkeng ƀơi hơdôm sang ia jrao, huăi ƀuh tơkeng ană nge pơ sang dong tah. Hơdôm sang ia jrao hơmâo tuh pơ alin blơi măi mok, hơmâo djop ia jrao kiăng kơ pơhlôm bơwih brơi tơlơi suaih pral kơ mơnuih djuai ania ƀiă mơng sang ia jrao amăng plơi pla mơtăm. Ơi ia jrao Nông Văn Sáng, Khua sang ia jrao să Ea M’Droh, tơring glông Čư̆ M’gar brơi thâo:

“Ră anai hơmâo măi pơčrang lăng, măi siêu âm, pơkă lăng amăng hơtai boh, măi hrĭp ia khak, măi pơčrang lăng pơkŏn. Lơ̆m bruă bơwih brơi tơlơi suaih pral ƀơi ƀon lan dưi pơhlôm klă, mơnuih ƀon sang ƀu kiăng nao khăm pơjrao pơ ataih dong tah, tơlơi anai amra ngă plai ƀiă huăč prăk kak tuh ia săng, huăi rơngiă hrơi mông, mơnuih kiăo tui wai lăng, pơhlôm brơi djop mơta mơn”.

Ƀu djơ̆ kơnong ƀơi tơring čar Dak Lak, ƀơi tơring čar Lai Châu kiăng pơhlôm klă hloh amăng bruă bơwih brơi tơlơi suaih pral, sit biă ñu brơi mơnuih djuai ania kual ataih, asuek, kual mơnuih djuai ania ƀiă, Ping gah hăng Kơnuk kơna hơmâo lu hơdră bruă tong ten anun lĕ grup hơdră djru kiăng đing nao pơsir hĭ bruă bơwih brơi tơlơi suaih pral kơ mơnuih ƀun rin, kual tơnap tap; grup hơdră bruă anai kiăng klă dong bruă bơwih brơi tơlơi suaih pral kơ mơnuih ƀun rin hăng rơnuč lĕ gruơ hơdră bruă kiăng djru duh prăk brơi mơnuih ƀun rin, kual tơnap tap lơ̆m nao khăm pơjrao. Amai Lò Thị Khăn, djuai ania Lự ƀơi să Bản Hon, tơring glông Tam Đường brơi thâo:

“Bruă bơwih brơi tơlơi suaih pral brơi đah kơmơi lĕ rơkâo ƀing gơñu nao khăm nao nao lơ̆m pi kian. Ƀing hlơi tơkeng laih kiăng nao tlâ̆o ia jrao pơgang. Tơdah ƀu pơhlôm pơgang hlâo tơdah anai amra hơmâo tơlơi ruă kă mơtăm yua anun kiăng ngă tui. Ƀing gơmơi hơmâo hră pơhlôm nua ia jrao mơ̆ sang anŏ ƀun rin dong, tơdah ƀu hơmâo hră pơhlôm nua ia jrao amra rơngiă lu prăk kak”.

Amăng bruă pơhlôm pơgang brơi tơlơi suaih pral mơnuih djuai ania ƀiă hăng kual čư̆ siăng kriang pơtâo ră anai, djop ƀon lan đing nao biă mă kơ bruă pơtô pơblang hăng ngă tui amăng bơwih brơi tơlơi suaih pral brơi kơ ƀing đah kơmơi pi kian hăng čơđai nge; gum djru hăng pơtrut nao khăm tui tơđar lơ̆m pi kian hăng djru brơi gah ia jrao kơ ƀing đah kơmơi hlâo, lơ̆m pi kian hăng tơdơi kơ tơkeng; djru khăm brơi tui tơđar kơ ƀing čơđai pơ gŭ 24 blan; djru pơhlôm gơnam ngă hiam amăng drơi jăn hăng pơhlôm huăi ƀu-ai buai brơi ƀing čơđai kual mơnuih djuai ania ƀiă, kual čư̆ siăng. Amai Bùi Thị Toan, dŏ ƀơi plơi Lục, să Yến Nghiệp, tơring glông Lạc Sơn, tơring čar Hoà Bình brơi thâo:

“Amămg plơi pla ƀing gơmơi, ƀing čơđai truh pơ 5 thun lêng kơ tlâ̆o ia jrao pơgang tui tơđar, hăng ƀing pơprong anun lĕ ƀing đah kơmơi ƀing gơmơi juăt khăm brơi tui tơđar, hăng brơi mơñum jrao pơdjai klan năng, ƀing pi kian hơmâo tlâ̆o ia jrao pơgang”.

Jơlan hơdră ia jrao dêh čar ƀơi kual mơnuih djuai ania ƀiă hơdôm thun giăm anai hơmâo pok pơhai hăng ngă tui tŭ yua, mơnuih djuai ania ƀiă rang kơđiăng amăng bruă khăm pơjrao, ba nao tơkeng pơ sang ia jrao. Boh tŭ yua anai lĕ tơlơi đing nao, juăt git gai na nao mơng gưl Ping gah, gong gai hơdôm boh ƀon lan amăng bruă pơgang klin kheng, pơhlôm brơi tơlơi suaih pral kơ mơnuih ƀon sang. Sit biă ñu, bruă bơwih brơi tơlơi suaih pral kơ mơnuih djuai ania ƀiă hơmâo tơlơi đing nao pơđĭ kyar mơng anih anom, gơnam tam, măi mok; klă dong amăng khăm pơjrao; mơnuih djuai ania ƀiă dưi tŭ mă hơdôm hơdră bơwih brơi tơlơi suaih pral phrâo hloh. 100% mrô mơnuih djuai ania ƀiă kual tơnap tap, sang anŏ ƀun rin, giăm ƀun rin hơmâo hră pơhlôm nua ia jrao.