Amăng mông bưp ƀô̆ mơta, amai Nông Thị Diện (35 thun) hăng ayong Lý Văn Quyết (40 thun), leng kơ djuai ania Nùng, dô̆ ƀơi să Dliê Ya, tơring čar Dak Lak, dir wir ƀơi ană đah kơmơi añrăng găn rơbêh kơ 5 blan. Amai Diện ră ruai, pơdô̆ rơkơi bơnai mơ̆ng thun 2017, khă tơlơi suaih pral ƀu hmâo tơlơi hơget mơn, lu thun dua rơkơi bơnai ăt dô̆ čang kơ hmâo ană mơn. Tơdơi kơ lu wot nao pơ̆ hơdôm bôh ƀôn prong pơprong pơjrao plao leng kơ ƀu hmâo bôh tơhnal ôh, blan 10/2022, hmư̆ hing lăi jơlan hơdră IVF pok pơhai ƀơi Buôn Ma Thuột, dua gơñu kiăo tui jơlan hơdră anai rơkâo tơlơi tơphă. Sa thun tơdơi, ană đah kơmơi tơkeng rai klă hiam biă kơtrâ̆o 3 kg. Amai Diện hơk mơ-ak lăi tui anai:

"Dua rơkơi bơnai pơsit ngă tui jơlan hơdră ƀơi anai kiăng plai ƀiă nao pơ̆ Sài Gòn rơngiă lu prăk kak. Blan 10/2022 truh blan 5/2024 lĕ ngă hră pơ-ar ruah lăng asar drah; laih anun truh blan 2/2025 tơkeng rai ană đah kơmơi. Ană gơñu suaih pral, brô̆ prong kah hăng čơđai pơkon mơn. Kơčăo bruă mơ̆ng dua rơkơi bơnai lĕ amra tơkeng hmâo sa čô ană dong lơm ană phung hmâo 2 thun. Asar ană mơ̆ng dua rơkơi bơnai ăt djă pioh mơn ƀơi anai anun ngă bruă anai kơ ană tal dua amra rai pơ̆ anai".

Tui hăng anun, rơkơi bơnai ayong Trần Duy Từ hăng amai Võ Thị Mỹ Duyên, ƀơi phường Buôn Ma Thuột, pơdô̆ rơkơi bơnai mơ̆ng thun 2011 samơ̆ rơbêh kơ 10 thun ăt akă hmâo ană mơn hăng khom hyu pơjrao ƀơi djop anih. Blan 3/2022, rơgao tơlơi lăi pơthâo mơ̆ng sa čô gơyut mă gah bruă ia jrao, dua gơñu hơduah ĕp truh jơlan hơdră IVF ƀơi Buôn Ma Thuột hăng truh kih lơm tal blung a pơphun ngă tui mơtăm.

“Rơwang blung a ơi ia jrao mă asar drah ană, laih anun rơwang tơdơi ơi ia jrao mă asar ană hăng tal blung a mơtăm đôm ană hlao. Tŭ mă bôt, lơm dưm asar ană lĕ ƀu hmâo tơlơi hơget ôh lơm kâo ăt hyu mă bruă kah hăng tơđar mơn, tơkeng rai ană suaih pral, hơdeč hmar, brô̆ prong klă”.

Jơlan hơdră pơjing ană amăng đing (IVF) dưi pok pơhai ƀơi Việt Nam mơ̆ng giăm hmâo 20 thun hlâo adih, hmâo djru laih ha rơbâo grôp rơkơi bơnai plao hmâo ană. Ơi ia jrao Hồ Mạnh Tường, Khua čih pioh Khul pơjrao tơlơi ruă kă gah bruă ƀă ană hăng plao ƀôn prong Hồ Chí Minh, pơsit anai lĕ sa yak nao yôm phăn mơ̆ng bruă ia jrao amăng bruă djru tơlơi ƀă ană ƀơi Việt Nam.

Ƀơi Dap Kơdư, jơlan hơdră hmâo pel ĕp brơi giăm truh 21.000 grôp rơkơi bơnai, ngă tui pơjing ană amăng đing brơi 1.128 čô mơnuih hăng ba glăi tơlơi mơ-ak ngă amĭ ama brơi rơbêh kơ 500 grôp rơkơi bơnai. Hơdră ruah mă asar ană ƀu kơnong kơ pơđĭ mrô truh kih ôh mơ̆ ñu dô̆ djru gah lui hơdôm gen tơdu, gen hmâo tơlơi ruă. Ơi ia jrao Hồ Mạnh Tường brơi thâo:

“Ƀơi kual Dap Kơdư, hmâo hơdôm gen ruă phara ha jăn hăng mrô hmâo ñu lu hloh bơhmu hăng lu kual pơkon amăng đơ đam dêh čar, Tơdah pioh tơkeng mă pô, hơdôm gen anai amra tưp truh lu rơnuk, dô̆ glăi hăng lar hyu amăng mơnuih mơnam. Hăng jơlan hơdră IVF, hmâo pơčrăng lăng hăng pơkă lăng gen ruă kă mơtăm amăng đing rông ană, mơ̆ng anun djă pioh glăi gen klă hiam, gah lui hơdôm gen sat. Anai lĕ sa jơlan hơdră tŭ yua, djru pơđĭ dlông anô̆ kơjăp ñu mrô mơnuih ƀôn sang pơgi kơdih anai".

Mơ̆ng jơlan hơdră IVF ƀơi Dap Kơdư, lu grôp rơkơi bơnai plao ƀu dô̆ glêh tơnap hăng hyu hơduah ĕp ană pơ̆ hơdôm bôh ƀôn prong pơprong. Rơwang pơkă bơwih ƀong, pơhrui glăi mơ̆ng mơnuih ƀôn sang Dap Kơdư jai hrơi jai dưi pơđĭ dlông, ăt ngă plai ƀiă mơn tơlơi bơngot kơ prăk kak, hăng jai hrơi jai hmâo dong lu rơkơi bơnai plao dưi tŭ mă tơlơi ngă amĭ ngă ama kơnang kơ măi mok pơplih phrâo anai./.