Tơdơi giăm hmâo sa blan bơwih brơi kơ bơnai tơkeng ană ƀơi Sang ia jrao gưl dlông Y Dược Buôn Ma Thuột, ayong Lang Văn Đại ƀơi să Ea Kiết, tơring glông Čư̆ Mgar ngă hră tơbiă mơ̆ng sang ia jrao amăng tơlơi mơ-ak truh ol kơdol pran jua. Amai Lương Thị Nga, bơnai ayong Đại, kian lê̆ tơkeng ană phrâo hmâo 30 rơwang hrơi tơjuh. Ană nge suă pran tơdu, ruă bơbrah mơ̆ng nge hăng drah rô ƀu hơđong, ngă abih bang sang anô̆ bơngot biă. Kơnang kơ tơlơi pơjrao hmao tlôn mơ̆ng bing ơi, nai ia jrao, ană nge dưi pơtlaih ruă hăng tơbiă mơ̆ng sang ia jrao suaih pral.

“Lơ̆m anun ăt mơ-ak mơn yua kơ hmâo 7 blan laih, sa lĕ tơkeng rai ƀu suaih pral hăng ană nge pơkon ôh, laih anun tơkeng tañ akă djop blan dong, samơ̆ ră anai ñu dưi hmâo tui anai sang anô̆ hơđong pran jua laih. Kâo ră anai mơ-ak biă yua kơ ană kâo suaih pral laih, bơni kơ ơi ia jrao djru brơi lu biă, ƀu thâo lăi hiưm hơpă ôh, bơni biă".

Tui hăng ơi ia jrao Võ Minh Thành, Khua Sang ia jrao Sang hră gưl dlông Y Dược Buôn Ma Thuột, khă phrâo pok sang ia jrao mơ̆ng blan 2/2022, sang ia jrao hmâo čơkă laih 4.035 čô ană nge tơkeng rai, amăng anun hmâo 318 čô čơđai tơkeng rai mơ̆ng đing pơjing ană (IVF). Kơnang kơ yua prăk blơi măi mok rơnuk phrâo hăng mơnuih mă bruă thâo rơgơi dong mơ̆ng phun, truh ră anai sang ia jrao hmâo ngă tui truh kih 32.000 čô mơnuih breh pơjrao, pơjrao giăm truh 54.000 čô mơnuih amăng sang ia jrao hăng pel ĕp tơlơi ruă kơ 851.000 wot čô mơnuih.

Ơi ia jrao Võ Minh Thành brơi thâo, kiăng djơ̆ tui tơlơi kiăng pel ĕp, pơjrao tơlơi ruă mơ̆ng mơnuih ƀôn sang, hrŏm hăng pok prong hơdră truh 700 bôh sưng, sang ia jrao Y Dược Buôn Ma Thuột lăng kơsem min bôh thâo phrâo, pơđĭ dlông bôh thâo kơ ơi ia jrao jing sa amăng hơdôm bruă mă yôm phăn.

“Ƀing gơmơi hmâo na nao pơkiăo nao ƀing ơi ia jrao nao pơ̆ hơdôm bôh sang ia jrao prong, hơdôm bôh sang hră gưl dlông ƀơi dêh čar hăng mơ̆ng dêh čar tač rơngiao, pơtô pơhrăm ƀiă hrơi, pơtô pơhrăm sui thun. Mơ̆ng hơdôm tơlơi anun djru brơi hơdôm măi mok pơkă lăng tơlơi ruă hăng pơjrao tơlơi ruă mơ̆ng Sang ia jrao ƀu pơdơi pơplih phrâo, pơđĭ dlông hăng ngă juăt hơdôm bôh thâo mơ̆ng hơdôm bôh plơi prong pơprong mơ̆ng đơ đam dêh čar”.

Hrŏm hăng Sang ia jrao Y Dược Buôn Ma Thuột, Dak Lak dô̆ hmâo Sang ia jrao prong Thiện Hạnh, sang ia jrao mơnuih ƀôn sang tañ hloh ƀơi kual Dap Kơdư. Ƀrô krep 20 thun mă bruă, Sang ia jrao prong Thiện Hạnh hmâo pơđĭ kyar laih mơ̆ng 100 bôh sưng truh kơ 660 bôh sưng kơ mơnuih ruă, rơbêh kơ 300 čô ơi ia jrao thâo bruă hăng thạc sĩ, pok pơhai lu bruă mă yua măi mok dơlăm, djru ngă plai ƀiă mơnuih ruă ba hyu pơ̆ anih ataih, kah hăng breh pơjrao bơbrah glô, tơlang rŏng tơlang tơkuai, pơplih ut tơlang... Biă ñu amăng bruă đah kơmơi hrơi ƀa ană, sang ia jrao anai hmâo ngă truh kih laih lu bruă breh mă ană nge kơ ƀing đah kơmơi hmâo tơlơi ruă.

Tui hăng ơi ia jrao Phạm Trọng Nhơn, Kơ-iăng Khua Sang ia jrao prong Thiện Hạnh, sang ia jrao hmâo pel ĕp hăng pơjrao brơi năng ai ñu 1.500 čô mơnuih ruă rim hrơi amăng 5 thun rơgao, hăng 550 čô mơnuih dô̆ glăi pơjrao ƀơi sang ia jrao. Tơlơi anai brơi ƀuh tơlơi đing nao pơđĭ kyar bruă ia jrao mơnuih ƀôn sang ƀơi Dak Lak hmâo ba truh hơdôm bôh tơhnal klă hiam biă.

“Kâo hluai tui tơlơi kiăng pel ĕp pơjrao tơlơi ruă kơ mơnuih ƀôn sang hăng amăng 20 thun rơgao Sang ia jrao ăt ngă tui mơn bruă mă pel ĕp pơjrao tơlơi ruă ba glăi na nao tơlơi djơ̆ pran kơ mơnuih ƀôn sang, mrô mơnuih ruă rai pel ĕp hăng pơjrao ƀơi Thiện Hạnh jai hrơi jai lu tui brơi ƀuh jơlan gah pơsit mơ̆ng khua sang ia jrao ăt kah hăng pô hmâo ngă djơ̆ tui tơlơi čang rơmang mơ̆ng mơnuih ƀôn sang klă hloh”.

Ơi Nay Phi La, Khua Gơnong bruă ia jrao tơring čar Dak Lak, brơi thâo tơring čar ră anai hmâo 5 bôh sang ia jrao mơnuih ƀôn sang hăng hơdôm anom pel ĕp, pơjrao tơlơi ruă gah mơnuih ƀôn sang ƀơi djop hơdôm bôh tơring glông, plơi prong ƀơi tơring čar. Hrŏm hăng bruă phun mơ̆ng hơdôm anom ia jrao kơnuk kơna, anom ia jrao mơnuih ƀôn sang hmâo djru plai ƀiă laih kơ sang ia jrao kơnuk kơna hăng djơ̆ tui tơlơi kiăng pel ĕp pơjrao tơlơi ruă mơ̆ng mơnuih ƀôn sang hăng prăk mă yua lăp djơ̆.

“Tơlơi pơđĭ kyar mơ̆ng sang ia jrao mơnuih ƀôn sang ƀơi tơring čar hmâo ba glăi laih lu mơnuih ruă lu tơlơi ruah mă amăng bruă pel ĕp pơjrao tơlơi ruă. Gơnong bruă ia jrao ăt pơsur mơn ăt kăh hăng pơphô brơi kơ Jơnum min mơnuih ƀôn sang tơring čar ăt kah hăng Ding jum ia jrao pioh pơsit hră mă bruă. Amăng bruă wai lăng khom pơjing sa hơdră pơkă gum hrŏm bruă mă pioh ngă hiưm hơpă lơm hmâo tơlơi bơwih brơi kơ mơnuih ruă ƀudah lơm hmâo tơlơi kiăng khom iâo pơhrui thơ ƀu kah akô̆ kơplah wah sang ia jrao kơnuk kơna hăng mơnuih ƀôn sang ôh”.

Bruă ia jrao mơnuih ƀôn sang ƀơi Dak Lak glăk jai hrơi jai pơtŏng sit bruă mă yôm phăn amăng bruă pơđĭ dlông anô̆ kơjăp bơwih brơi tơlơi suaih pral kơ mơnuih ƀôn sang. Tơlơi pơđĭ kyar mơ̆ng hơdôm bôh sang ia jrao mơnuih ƀôn sang ƀu kơnong kơ djru plai ƀiă kơ sang ia jrao kơnuk kơna ôh mơ̆, ñu dô̆ ba truh hơdôm tơlơi ruah mă lu mơta, djơ̆ tui hmao tlôn tơlơi kiăng pel ĕp, pơjrao tơlơi ruă. Mơ̆ng anun, djru yôm phăn kơ tơlơi pơđĭ kyar hrom mơ̆ng gơnong bruă ia jrao Dak Lak./.