Giăm 20 thun tong ten hăng kual guai dêh čar, Thiếu tá, ơi ia jrao Nguyễn Văn Quốc Trí, hrŏm hăng ƀing ling tơhan akă grat ia mơtah Puih kơđông tơhan Tr’hy, tơring glông Tây Giang hơmâo hyu pơtô lăi, jak iâu mơnuih ƀôn sang djuai ania Kơtu thâo hluh anŏ pơglăi sat mơ̆ng tơlơi ngă yang rơbang djă hla tơpa gai, phai yang hăng mơnŭ pơjrao duăm ruă, kiăng ană plơi lui hĭ abih tơlơi phiăn ƀu djơ̆ hrup anun amăng plơi pla.

Arăng tơkeng rai hăng prô̆ tơdăm prăm dra ƀa tơsâo thâo hrăm hră pơar ƀơi tơring glông Núi Thành, tơring čar Quảng Nam. Tơdơi kơ hrăm giong sang hră gưl prong gah bruă ia jrao Y Dược Huế, amăng sang hră gưl prong Đại học Huế, ơi ia jrao Nguyễn Văn Quốc Trí glăi mă bruă ƀơi Puih kơđông tơhan Đak Prĭng, tơring glông Nam Giang. Truh blan 5/2021, ơi ia jrao Trí arăng brơi nao mă bruă pơjrao pơ sang ia jrao ling tơhan hăng mơnuih ƀôn sang ngă hrŏm či să A San, Puih kơđông tơhan Tr’hy tơring glông Tây Giang, pioh ĕp lăng, pơjrao tơlơi ruă kơ mơnuih ƀôn sang 4 boh să giăm guai dêh čar tơring glông Tây Giang hăng hơdôm plơi pla mơnuih ƀôn sang gah adih guai anun lĕ dêh čar Lao. Găn rơgao lu thun mă bruă pơ anai, Thiếu tá, ơi ia jrao Nguyễn Văn Quốc Trí hrŏm hăng ƀing ling tơhan akă grat ia mơtah hơmâo hyu pơtô lăi, jak iâu mơnuih ƀôn sang djuai ania Kơtu dua bơnah jơlan guai dêh čar brơi thâo hluh anŏ pơglăi sat mơ̆ng tơlơi đăo kơ yang rơbang sit dju djuăm duăm ruă, kah hăng ngă yang djă hla tơpa gai ƀu nao pơ sang ia jrao, kiăng mơnuih ƀôn sang thâo hluh hăng lui hĭ tơlơi phiăn hơđăp anun.

20 thun tong ten hăng kual mơnuih ƀôn sang dŏ amăng ter jơlan guai dêh čar, mông hơƀơi hrơi pơpă hai, sit hơmâo mơnuih dju djuăm duăm ruă amăng plơi pla, măt bơmao, măt mơnong ƀong huă, ƀong hla ngón či pơdjai drơi pô, truh kơ tơlơi guăt, rơpan, hong dŭi, ala čoh, wơ̆t hăng tơlơi tom hơmâo đah kơmơi pi kian tơkeng hĭ krah jơlan....hơmâo ñu soh djru, mơnuih ƀôn sang đăo kơnang biă mă, đuăi nao iâu ơi ia jrao Nguyễn Văn Quốc Trí. Phrâo anai hloh, amăng mlam adai rơ-ot bơyan puih, hmư̆ lăi sa čô đah kơmơi djuai ania Kơtu lơ̆m jơlan nao pơ sang ia jrao tơkeng ană samơ̆ kiah ƀơi krah jơlan nao tơluh drah pơčah hruh ană, tơbiă ia kơhñor, ruă kian kơtang tit ƀu dưi đĭ rơdêh thut pơgiăng nao pơ sang ia jrao dơ̆ng tah, anun arăng ba nao pơ anih ñu pơjrao ling tơhan. Ơi ia jrao Nguyễn Văn Quốc Trí hrŏm ƀing nai ia jrao pơkŏn nao pơsir hĭ hmao kru, mă ƀuai kơ amai anun hlong tơkeng truh kian, ană đah kơmơi, dua amĭ ană gơ̆ găng añrăng soh.

Hơdor glăi hơdôm thun laih rơgao dŏ mă bruă ƀơi kual čư̆ siăng kriăng pơtao ơi ia jrao Trí hăng gơ̆p ñu jai hrơi hơmâo lu tui. Gơñu jing anih ưh gơnang tong ten biă mă mơ̆ng mơnuih ƀôn sang. Ơi ia jrao Nguyễn văn Quốc Trí lăi:

“Anih ƀing tơhan pơdong puih kơđông lĕ să A San kual čư̆ siăng tơring glông Tây Giang, tơring čar Quảng Nam, mơnuih ƀôn sang či anai lêng kơ mơnuih ƀôn sang djuai ania Kơtu soh dŏ, tơlơi hơdip mơda bơwih ƀong huă mơ̆ng mơnuih ƀôn sang dŏ tơnap tap, kơƀah djop mơta laih anun tơlơi phiăn juăt hơđăp ngă yang rơbang đăo kơnang kơ bruă ngă yang sit duăm ruă lĕ aka ƀu abih ôh. Bruă mă hyu pơtô pơblang, jak iâu brơi lui hĭ tơlơi đăo kơ yang rơbang sit duăm ruă, pơđĭ tui tơlơi thâo hluh kơ mơnuih ƀôn sang ƀơƀrư̆ pơblih. Hơdôm thun laih rơgao, kâo bưp ƀu ƀiă ôh tơlơi duăm ruă, tơlơi truh phara kah hăng ala čoh, măt yua ƀong bơmao măt, đah kơmơi tơkeng krah jơlan. Amăng anun, kâo djru pơjrao ječ ameč brơi kơ lu mơnuih dưi rơgao hĭ mông hŭi rơhyưt”.

Ơi ia jrao Nguyễn Văn Quốc Trí juăt hyu tơl plơi pla, sang anŏ ĕp lăng tơlơi suaih pral kơ mơnuih ƀôn sang, pơtô lăi brơi ĕp hơdră pơhlôm pơgang tơlơi duăm ruă laih anun pơjrao brơi soh sel ƀu mă prăk ôh kơ mơnuih ƀôn sang. Laih dơ̆ng, anăp nao pơtô brơi kơ mơnuih ƀôn sang pơgang ayuh hyiăng anih dŏ jum dar kiăng huăi klin lar lu, pla phun jrao akha kyâo amăng đang sang pioh yua pơjrao mă pô pơ sang anŏ hăng tơlơi duăm ruă djong. Ơi Bling Mưr, dŏ ƀơi plơi A Ƀañ 1, să Tr’hy tơring glông Tây Giang ol kơdol lăi:

“Ơi ia jrao Nguyễn Văn Quốc Trí đing nao pơtô ba tong ten biă mă, lăng kơ mơnuih duăm ruă kah hăng mơnuih amăng sang anŏ. Hơmâo mông ơi ia jrao Trí khom găn ia hnoh, đĭ čư̆ čan truh pơ plơi pla, kiăng pơjrao duăm ruă kơ mơnuih ƀôn sang dŏ đih tă añă tit ƀơi sang, ƀing tha rơma, sang anŏ ƀun rin, ƀu hơmâo ană bă lăng ba. Rơngiao kơ bruă pơkă lăng hăng pơjrao lĕ, ơi ia jrao Trí dŏ pơtô pơblang brơi mơnuih ƀôn sang thâo hơdră pơhlôm ƀă ană, kiăng ƀă ană djơ̆ hơdră brơi kơ lu krop rơkơi bơnai brơi ƀă ană hui hăng pơgang tơlơi ruă”.

Pơkă dưm dưm rim thun, Anih ĕp lăng hăng pơjrao tơlơi duăm ruă plah wah ling tơhan hăng mơnuih ƀôn sang să A San hơmâo čơkă mơ̆ng 6000 truh 8000 wơ̆t mơnuih mơ̆ng 4 boh să tơring glông Tây Giang, tơring čar Quảng Nam hăng hơdôm boh plơi gah adih jơlan guai dêh čar ƀơi tơring glông Kà Lừm, tơring čar Sekong dêh čar Lao nao pơkă lăng tơlơi ruă hăng pơjrao duăm ruă. Mơ̆ng thun 2016 truh ră anai, anih pơjrao duăm ruă anai dưi pok pơhư prong tui, dưm truă gơnam yua amăng bruă mă pơjrao tơlơi ruă phrâo, kah hăng mă rup X-quang hăng ia rơgơi mrô, măi pơčrang kman amăng drah, măi suă pran, măi hrip mă ia rơnah pơkĕ hăng apui lơtrik 2 gêt prong, hip anih krôp pơđao ană nge, 10 boh sưng đih pơjrao kơ mơnuih duăm ruă đih glăi hăng rơdêh pơjrao ječ ameč pioh pơgiăng mơnuih ruă nao pơ sang ia jrao prong hloh sit ječ ameč. Thượng tá Bùi Văn Đức, Khua puih kơđông tơhan pơgang guai dêh čar Tr’hy lăi:

“Ơi ia jrao Nguyễn Văn Quốc Trí hơmâo glăm ba klă biă mă sa čô tơhan pơgang guai dêh čar ngă bruă ia jrao ƀơi tơring čar lăi hrŏm ăt kah hăng amăng sang bruă hnun mơ̆n. Mơnuih ƀôn sang pơ anai, tơlơi thâo hluh dŏ kơƀah, yua kơ tơlơi dŏ dong ƀong huă, jơlan glông nao rai ataih, tơdah pơjrao ječ ameč ƀu hmao kru, pơgiăng mơnuih ruă ba nao pơ sang ia jrao prong hloh kaih 2-3 mông kah mơ̆ng truh pơ sang ia jrao tơring glông, aka lăi ôh truh pơ tơring čar. Yua kơ anun, tơdah ƀu hơmâo ôh ơi ia jrao Trí sit mơ̆n ƀu hmao ôh pơjrao kơ ƀing kraih hăng ječ ameč, hŭi biă kơ tơlơi hơdip mơnuih ruă. Ơi ia jrao Nguyễn Văn Quốc Trí jing sa gru hiam bơngač amăng sang bruă, ăt kah hăng abih bang amăng ling tơhan pơgang guai dêh čar ƀơi tơring čar Quảng Nam lăi hrŏm”.

Hơdôm bruă mă yom phara, ba glăi boh tŭ yua hiam klă mơ̆ng ơi ia jrao Nguyễn Văn Quốc Trí hơmâo pơdah rai tơlơi khăp, gum pơgôp,tong ten plah wah ling tơhan hăng mơnuih ƀôn sang, ngă kơjăp tui tơlơi đăo kơnang amăng pran jua ană plơi ƀơi kual giăm guai dêh čar. Hơdôm ƀing nai ia jrao  “Akă  grat ia mơtah” kah hăng ơi ia jrao Trí hơmâo pơgôp hrŏm prong prin gru grua hing ang hiam klă rup rap tơhan Wa Hô ƀơi anih kual giăm guai dêh čar amăng tơring čar Quảng Nam.