Anih hơmâo klin lĕ anih gưl muai lớp lá 2, sang hră muai Hoa Lan, plơi Chiềng, să Ia Lôp, tơring glông Ea Sup. Mơnuih ƀă tơlơi ruă lĕ duăm pơ-iă drơi jăn, ruă rơkong đok, ƀu kiăng huă ƀong, kơčung ƀek amăng bah hăng pơđeh ƀlĕ ia ƀơi plă tơkai, plă tơngan, ƀơi tơ-ŭt hăng boh klôn. Ƀing čơđai hơmâo tơlơi ruă, arăng brơi pơdơi hrăm hră pơjrao pơ sang anŏ laih anun lăi brơi amĭ ama čơđai ba nao pơ sang ia jrao pơkă lăng hăng pơjrao djơ̆

Laih čih pioh hơmâo klin, anom bruă ia jrao tơring glông Ea Sup git gai sang ia jrao să Ia Lôp ngă hrŏm khua sang hră ĕp lăng kman hăng pruih ia jrao pơdjai kman amăng anih hrăm, jum dar amăng đang sang hră, pruih ia jrao rao rơgoh abih gơnam čơđai sang hră djă ngui. Tui hăng ơi Dương Văn Hải, Kơ-iăng khua ĕp tơlơi duăm ruă-Anom bruă ia jrao tơring glông Ea Sup, truh tlam lơ 2/4, rơngiao kơ 8 čô čơđai sang hră ƀă ƀơi sang hră Hoa Lan, amăng să Ia Lôp ƀuh dơ̆ng 1 čô čơđai ƀă tơlơi ruă kơčung ƀek amăng bah, plă tơkai, tơngan. Bruă kăng anih, kiăng pơgăn kman hăng pơtô brơi bruă pơhlôm pơgang klin anom bruă ia jrao tơring glông  pơphun ječ ameč mơtam yơh.