VOV4.Jarai - Khă đơ đam dêh čar ta hmâo tlâ̆o laih 255 klăk liều vaccine pơgang Covid-19 kơ mơnuih ƀôn sang, samơ̆ mrô mơnuih tlâ̆o ară tal 3, tal 4, gah mơnuih mơng 18 thun truh kơ tha, biă ñu mrô tlâ̆o pơgang ară tal 2 kơ čơđai mơng 5 thun truh kơ yŭ 12 thun ƀiă, mrô vaccine dưi hmâo hơdôm tơring čar, ƀôn prong rơkâo tlâ̆o pơgang mơng ră anai truh kơ rơnuč thun ƀiă hloh lu biă bơhmu hăng mrô kiăng tlâ̆o pơgang. Tơlơi anai glăk ba tơbiă hơdôm tơlơi kiăng pơtlaih pioh pơtrut tañ rơnoh tlâ̆o pơgang pơ̆ anăp anai. Anai ăt lĕ bôh yôm bruă jơnum lăng nao rai mơng ataih pơgang pơgăn klin mơng Ding jum ia jrao hăng 63 bôh tơring čar, ƀôn prong pơphun amăng mơguah lơ 25/8. Kiăng pơtrut tañ rơnọ tlâ̆o vaccine, Nai tha prin, Nai pring tha Nguyễn Thị Liên Hương, Kơ-iăng Khua Ding jum ia jrao brơi thâo, Ding jum glăk rơkâo Gơnong bruă ia jrao hơdôm bôh tơring čar, ƀôn prong gum hrom hăng Gơnong bruă pơtô pơhrăm pơtrut tañ rơnoh pơphun tlâ̆o liều phun kơ čơđai mơng 5 thun truh kơ yŭ 12 thun amăng blan 8 hăng 9/2022 hăng tlâ̆o lok glăi kơ mơnuih mơng 12 thun truh kơ yŭ 18 thun giong amăng 3 blan tal 1 thun 2022, tơdơi kơ čơđai pơwot glăi sang hră hrăm. Pơphun tlâ̆o lok glăi kơ mơnuih mơng 18 thun truh kơ tha, đĭ rơnoh tlâ̆o pơgang ară tal 3 hmâo 90%./.

Siu H’ Prăk: Pơblang