Pô anai anăn ñu N.V.P, thun tơkeng 1963, dŏ pơ ƀut mrô 2, tơring kual Quảng Phú, tơring glông Čư̆ Mgar, Dak Lak. Tui hăng tơlơi ră ruai mơ̆ng ơi P anun, lơ 19/10/2022 ñu đĭ rơdêh por mơ̆ng Việt Nam nao pơ dêh čar Nam Phi hyu ngui. Amăng hơdôm hrơi hyu ngui ñu bưp lu mơnuih, ră ruai, mă tơngan hăng lu mơnuih mơ̆n. Lơ 26/10, ơi P đĭ rơdêh por glăi pơ Việt Nam truh pơ tơdron rơdêh por Nội Bài samơ̆ hlâo kơ anun hơmâo weh pơblih rơdêh por ƀơi dêh čar Singapore, giong glăi truh pơ Hà Nội, ñu đĭ rơdêh por glăi pơ Dak Lak. Lơ 1/11, ñu mưn ruă hăng rơgah rơgeñ amăng tơ-ut tơlang hăng ƀuh ƀlĕ pơđeh amăng drơi jăn kah hăng mun mriah ƀơi kian hăng rŏng, ñu nao răo pơthâo pơ sang ia jrao. Mơ̆ng lơ 26/10 truh ră anai, ơi P. hơmâo jĕ giăm laih hăng djop mơnuih amăng sang anŏ laih anun mơnuih jum dar.

Anom bruă ia jrao Dak Lak akŏ pơjing anih anom pơjrao djơ̆ čut kra pơčlah hơjăn amăng

sang ia jrao prong kual Dap Kơdư

Hơdôm ƀing bưp laih hăng ơi P anun ră anai aka ƀu ƀuh hơmâo tơlơi hơgĕt ôh hăng hlăk brơi dŏ pơ sang pơčlah phara. Anom bruă ia jrao tơring čar Dak Lak pơčrang kman mơ̆ng čơđeh ƀlĕ mun  ƀơi klĭ kliăng ơi P, mơ-it nao pơ sang ia jrao ĕp kman duam ruă kual Dap Kơdư kiăng thâo. Gơnong bruă ia jrao Dak Lak ăt hơmâo hră pơtrun ječ ameč git gai djop sang bruă pơhlôm, pơgang klin pơgang tơlơi ruă djơ̆ čut kra; akŏ pơjing grup mă bruă tañ hmar mơ̆ng djop sang ia jrao prong, sang ia jrao tơring glông, plơi prong; pok pơhai ngă tui lu hơdră pơhlôm, pơgang tơlơi ruă djơ̆ čut kra laih anun ngă hrom djop khul grup mơnuih tơpuôl kiăng hơmâo hơdră pơsir hmao kru hŭi klin duam ruă anai ƀă amăng plơi pla mơnuih mơnam.