VOV4.Jarai - Tlam lơ 7/6, Jơnum min mơnuih ƀon sang tơring čar Dak Lak pơphun Jơnum lăng nao rai mơng ataih hăng djop ƀon lan kiăng kơ lăng glăi bruă tlâ̆o vaccine pơgang klin Covid-19 amăng tơring čar. Truh ră anai, tơring čar hơmâo tŭ mă rơbêh kơ 3 klăk 600 rơbâo liều vaccine pơgang klin Covid-19 djop mơta. Tơring čar hơmâo ngă tui bruă tlâ̆o vaccine brơi abih bang mơnuih mơng 5 thun pơ glông, amăng anun, ƀing mơng 12 thun pơ glông tlâ̆o 2 ară giăm 96% pơ glông hăng 26% tlâ̆o 1 ară brơi ƀing mơnuih mơng 5 truh 11 thun.

Mông jơnum

Dak Lak hơmâo pơphun tlâ̆o ară tal 3, tal 4 brơi ƀing mơnuih mơng 18 thun pơ glông samơ̆ ăt aka djop abih bang mơnuih, ară tal 3 phrâo tlâ̆o brơi 33%, amăng anun hơmâo laih 5 boh tơring glông pơ gŭ 30%; ară tal 4 dưm dưm 0,5%. Bruă pơphun tlâ̆o vaccine kaih tui ră anai, Dak Lak dŏ 73.105 liều vaccine aka ƀu tlâ̆o. Anai lĕ tơring čar dong amăng hơdôm boh tơring čar hơmâo mrô mơnuih tlâ̆o djop vaccine pơgang klin Covid-19 kaih amăng đơ đam dêh čar. Kiăng kơ tañ ƀiă dong amăng bruă tlâ̆o vaccine Covid-19, tơring čar Dak Lak rơkâo djop ƀon lan tŏ tui pơphun tlâ̆o vaccine kiăng kơ djơ̆ hăng hơnong pơkă ba tơbiă; laih dong rơkâo djop anom bruă, khul grup ba jơlan hlâo amăng bruă tlâ̆o vaccine…

Siu Đoan: Pơblang