VOV4.Jarai-Tui hăng mrô jŭ yap mơ̆ng Anom bruă sem lăng duam ruă tơring čar Dak Lak mơ̆ng akŏ blan 10 truh ră anai, duam đung drah amăng tơring čar hơmâo lu tơlơi tơnap tap biă mă, mrô mơnuih ƀă jaihrơi lu hăng na nao hơmâo mơnuih djai yua duam đung drah. Kơnong amăng 10 hrơi blung a akŏ blan 10 hơmâo giăm 500 čô mơnuih ƀă, pơđĭ tui mrô mơnuih ƀă mơ̆ng akŏ thun 2022 truh ră anai giăm 7 rơbâo čô. Lăp đing nao biă ñu, mơ̆ng akŏ blan 10 hơmâo laih 2 čô mơnuih djai yua duam đung drah. Tui hăng ơi Hoàng Hải Phúc, Kơ-iăng Khua anom bruă sem lăng tơlơi duam ruă tơring čar Dak Lak, hơjan hlim sui hrơi amăng tơring čar, tơlơi pơhing duam đung drah jai lu tui.

Ƀing ơi ia jrao Dak Lak pruih ia jrao pơdjai kman jum dar anih dŏ pơgăn klin duam đung drah ƀă hyu

Kiăng pơgăn tơlơi duam đung drah ƀă kơtang, anom bruă ia jrao kơtưn bruă pơtô pơblang mơnuih ƀôn sang pơđĭ tui tơlơi thâo hluh, pơhlôm pơgang duam ruă, kiăng mơnuih ƀôn sang ngă tui hơdră: rơnăk pưk sang, anih dŏ gŏ uă, pruih ia jrao pơdjai ană keč boh amăng plơi pla, jum dar sang anŏ.

Nay Jek: pơblang