Anih klin ngă hmâo ƀơi să Ea Bhốk hăng Drây Bhăng hăng 2 čô mơnuih djơ̆ kơman. Tui hăng ơi ia jrao Nguyễn Khắc Dũng - Khua Anom ia jrao tơring glông Čư̆ Kuiñ, tơring čar Dak Lak, tơdơi kơ thâo hmâo anih klin ngă, Anom hmâo gum hrŏm hăng Anom wai lăng tơlơi duam ruă hăng Sang ia jrao să pơphun pel ĕp, lăng tui mơnuih ruă, pơsir anih anom dô̆ hăng Cloramin B; pơtô brơi sang anô̆ pơdjai kơman ƀơi gơnam čơđai ngui, gơnam yua pioh mơñum, anih čơđai dô̆ rô nao rai hăng lăi pơthâo ƀơi anăp bruă pơgang pơgăn tơlơi ruă djơ̆ hmơi kual jum dar sang mơnuih ruă.

Hrŏm hăng anun pơphun pel ĕp, lăng glăi mrô yap abih bang wot čơđai yŭ kơ 5 thun akă hmâo tlâ̆o pơgang hlôm hlâo, tlâ̆o akă djop ƀudah ƀu rơđah hlâo adih hmâo tlâ̆o vaccine pơgang djơ̆ hmơi yơh, hmơi – rubella pioh tlâ̆o pơ ala nao, tlâ̆o huĕt abih kơ čơđai./.