Tui anom bruă wai pơgang tơlơi duam ruă (CDC) tơring čar Dak Lak, mơng akŏ thun 2024 truh ră anai, đơ đam tơring čar hơmâo rơbêh 300 čô mơnuih duam đung drah amăng 15/15 boh tơring glông, plơi prong. Mrô mơnuih duam đung drah lu hloh ƀơi plơi prong Buôn Ma Thuột, tơring glông Ea Kar hăng Krông Pač. Tui tơlơi pơsit hrŏm, tơring čar Dak Lak glăk yak nao bơyan hơjan hlim, ngă gêh gal brơi kman duam đung drah lar hyu kơtang ƀơi djop anih.

Ơi Hoàng Hải Phúc, Khua CDC Dak Lak brơi thâo, kiăng pơgang klă duam đung drah, gơnong bruă ia jrao hơmâo kơtưn gum hrŏm hơdôm anom bruă pôr pơhing pơtrut pơtô pơblang bruă pơgang; kơtưn amăng bruă kiăo tui lăng tơlơi sit nik mơng kman amăng ƀôn lan, pel ĕp hơdôm anih ƀuh mơnuih duam đung drah kiăng hmao tlôn pơgang hĭ.