VOV4.Jarai-Yap mơ̆ng blan 12/2021, lơ̆m tơlơi pơhing klin kheng ƀă hyu tơnap glăi dơ̆ng, čih pioh lu mơnuih ƀă Covid 19, tơring čar Dak Lak tŭ ư jơlan hơdră brơi mơnuih ƀă Covid 19 amăng plơi prong Ƀuôn Ma Thuôt dưi dŏ glăi pơjrao, pơčlah hơjăn pơ sang anŏ. Kiăng plai ƀiă kơniă amăng sang ia jrao, hơmâo sa khul ƀing ơi ia jrao amăng plơi prong Ƀuôn Ma Thuôt pơyơr pran jua akŏ pơjing grup ƀiă mơnuih pơtô brơi amăng plang intertet online ƀu mă prăk ôh hăng djru ba ƀing F0 dŏ pơjrao pơ sang anŏ.

Tơdơi kơ thâo pô ƀă Covid 19, amai Cao Thị Thanh Phương, dŏ pơ ƀut plơi mrô 12, phường Tân Hòa hŭi mơ̆n, bơngơ̆t bơngañ biă mă, yua amăng sang anŏ ñu dŏ hơmâo 2 čô ană anet. Dưi hơmâo gơyut gơyâo ñu lăi pơthâo Khul djru pơjrao F0 pơ sang anŏ tơring čar Dak Lak, ñu iâu telephôn rơkâo djru lăi pơthâo hơdră pơhlôm, yua kơ anun yơh dưi găn rơgao hĭ huăi bơngơ̆t dơ̆ng tah, ngă hrom, hla tui djơ̆ tơlơi pơtô ba mơ̆ng ƀing ơi ia jrao, dŏ rơnuk rơnua găn rơgao hĭ klin:

“Lơ̆m thâo krăn ta ƀă klin jing F0 laih, ăt hŭi mơ̆n hăng bơngơ̆t biă mă, kâo rơkâo dŏ pơ sang pơčlah hơjăn tơdơi kơ anun gơyut gơyâo lăi pơthâo hơmâo sa grup ơi ia jrao Hòa Anh pơjrao ƀing F0 pơ sang mơtam. Amăng grup ơi ia jrao Hòa Anh djop ding kơna lêng hur har soh, rĭm hrơi ƀing ơi ia jrao, nai ia jrao iâu telephôn tơña bla hăng pơkă lăng tơlơi duăm ruă laih anun pơtô brơi hơdră dŏ dong ƀong huă pơčlah phara pơ sang anŏ hiư̆m pă kiăng rơnuk rơnua kơ ta pô hăng mơnuih amăng sang anŏ, ƀing ơi ia jrao brơi ia jrao mơñum pơjrao, lơ̆m hrơi mông pơjrao truh djop ia jrao laih, nao pơčrang ƀu kman dơ̆ng tah, bơni kơ ƀing ơi ia jrao grup ơi ia jrao Hòa Anh hơmâo djru pơjrao F0 pơ sang anŏ".

Khul grup pơyơr pran jua mơ̆ng ơi ia jrao Hòa Anh djru pơjrao ƀing F0 pơ sang

Ăt kah hăng amai Cao Thị Thanh Phương hăng lu mơnuih ƀă Covid 19 pơkŏn mơ̆n ƀơi Dak Lak, tơdơi kơ 5 hrơi dŏ pơjrao pơ sang anŏ hơmâo tơlơi djru mơ̆ng grup ơi ia jrao pơjrao F0 pơ sang anŏ, yă Trần Thị Kim Loan dŏ pơ phường Tân An, plơi prong Ƀuôn Ma Thuôt ăt pơčrang kman tơdơi kơ hơdôm hrơi pơjrao ƀu ƀuh dơ̆ng tah kman Sars-cov-2. Hok mơak biă mă yua drơi jăn ñu suaih tui, yă Loan bơni kơ grup djru pơtô ba, hur har djru kơ ñu amăng hơdôm hrơi pơjrao pơ sang anŏ.

“Hmư̆ tơlơi pơhing mơ̆ng grup djru ƀing F0 ƀơi Dak Lak, ƀing ơi ia jrao Hòa Anh, kâo iâu telephôn hăng hmư̆ ƀing ơi ia jrao, nai ia jrao pơtô brơi hmao kru laih anun ƀơk ia jrao brơi mơñum, krăo lăng tui rĭm hrơi. Tơdơi kơ 5 hrơi pơjrao pơčrang lăng ƀu ƀuh kman dơ̆ng tah hăng lăi pơthâo pơ phường brơi ĕp glăi dơ̆ng laih anun pơsit abih duăm ƀă klin yơh".

Khul djru pơtô brơi online ƀu apah prăk hăng djru kơ mơnuih F0 pơjrao pơ sang anŏ yua kơ ơi ia jrao Phạm Hòa Anh, ră anai glăk dŏ mă bruă pơ sang ia jrao prong Thiện Hạnh, tơring čar Dak Lak, akŏ pơjing. Ngă hrom khul hơmâo 50 čô ơi ia jrao, nai ia jrao ƀơi lu tơring čar, ƀôn prong pơkŏn hrom hăng ƀing ơi ia jrao pơyơr pran jua ƀơi Dak Lak. Kiăng kơ mă bruă na nao hrơi mlam ƀu pơdơi ôh, hmao kru lăi pơthâo amăng online kơ mơnuih ruă tơña, khul hơmâo pơpha jing lu grup ƀiă mơnuih, djơ̆ găl pơblih nao rai krăo hmư̆ telephôn arăng iâu nao laih anun lăi pơthâo brơi kơ ƀing F0 thâo hơdră pơjrao laih anun pơgang mă pô pơ sang anŏ.

Tui hăng anun, grup ơi ia jrao amra lăi pơthâo, pơjrao, ƀing nai ia jrao pơtô brơi hơdră pruih ia jrao pơdjai kman, pơtô brơi hơdră suă pran, hrip jua, krăo lăng anŏ pơblih tơlơi duăm ruă, čih pioh tơlơi pơhing mơ-it amăng glông pơhing hrom ƀudah lăi pơthâo mrô telephôn ječ ameč tơdah hơmâo mơnuih duăm kraih; ƀing nai sĭ ia jrao lăi pơthâo hơdră yua hăng mơñum ia jrao, pơpha ia jrao, gơnam yua gah ia jrao kơ mơnuih ruă.

Khul grup ơi ia jrao Hòa Anh prăp rơmet djop đing oxy hăng gơnam yua gah ia jrao pioh djru pơjrao brơi ƀing F0 pơ sang

Tui hăng ơi ia jrao Hòa Anh, tơdơi kơ 4 blan akŏ pơjing grup, khul gơñu djru pơtô online pơjrao pơ sang anŏ brơi kơ 1.500 čô F0 hăng ƀu hơmâo mơnuih duăm kraih tui ôh.

“Ngă hrom hơdră anai hơmâo lu mơnuih, ƀơi anŏ mơnuih ngă bruă ia jrao hăng gah rơngiao bruă ia jrao, ăt hơmâo mơ̆n mơnuih djru amăng bruă hyu hơduah ĕp čih anăn mơnuih ƀă klin, djru pơtô brơi pơdưm ap, mă yua măi telephôn rơgơi laih anun juh alum pran jua ƀing F0 anun. Dua lĕ tơdah hơdră ngă anai dưi hơmâo lu mơnuih pơdrong djru hrom amra hơmâo prăk pơjing keh prăk blơi ia jrao djru kơ mơnuih duăm ruă, kiăng plai ƀiă ƀing gơñu đuăi hyu ĕp blơi ia jrao hŭi ƀu lăp djơ̆ laih anun kiăng hơmâo prăk brơi kơ ƀing adơi ayong amăng khul hyu mă bruă amăng mông kơƀah kah hăng blơi ia săng rơdêh đĭ”.

Yak nao amăng thun 2022, klin Covid 19 ăt dŏ tơnap tap ƀơi Dak Lak; mrô mơnuih ƀă klin duăm ruă jai lu, hơmâo hrơi čih pioh truh 4.500 čô. Ră anai, tơring čar Dak Lak hơmâo rơbêh 87 rơbâo čô mơnuih ƀă Covid 19, amăng anun kơnong plơi prong Ƀuôn Ma Thuôt đôč 30 rơbâo čô. Amăng 30 rơbâo čô mơnuih F0 anun, hơmâo năng ai 15 rơbâo čô hlăk pơjrao, 98% amăng mrô anun dŏ pơjrao amăng sang anŏ. Tui hăng ơi ia jrao Nay Phila, Khua Gơnong bruă ia jrao tơring čar Dak Lak, mrô F0 hlăk dŏ pơjrao pơ sang anŏ ƀơi Ƀuôn Ma Thuôt lu laih anun sang ia jrao amăng plơi prong kơniă abih laih.

Hơmâo tơlơi djru ba mơ̆ng khul ơi ia jrao Phạm Hòa Anh ngă anun yôm biă mă, pơgôp hrom ngă hluai ƀiă sang ia jrao pơjrao mơnuih duăm ruă, yua ƀing F0 duăm ruă pơjrao pơ sang anŏ:

“Anih pơjrao duăm ruă mơ̆ng ơi ia jrao Hoà Anh ngă hrom amăng grup Covid plơi pla laih anun ăt hơmâo djop gơnam yua mă bruă mơ̆ng đing oxy laih anun măi SPO2 hăng hip dưm ia jrao A,B pioh pơjrao. Anai lĕ, sa amăng hơdôm tơlơi gir run amăng bruă pơhlôm, pơgang klin. Tui anun anom bruă ia jrao huăi hyăl amăl ôh. Pơ anăp anai, gơmơi ăt čang rơmang iâu pơthưr djop grup hăng sang pơjrao tơlơi duăm ruă ngă hrom anom bruă ia jrao djru pơjrao brơi ƀing F0 pơ sang anŏ lu hloh”.

Amăng hrơi blan klin Covid 19 hlăk dŏ tơnap tap, dưi lăi tơlơi djru hrom mơ̆ng ƀing ơi ia jrao khul grup akŏ pơjing pơtô ba mơ̆ng ataih, lăi pơthâo mơ̆ng online ƀu mă prăk pơtô kơ F0 pơjrao pơ sang anŏ yôm biă mă, djru kơ ană plơi pla ƀing F0 laih hơmâo anih đăo kơnang, kjăp pran jua bong glăi hăng klin kheng, mơ̆ng anun djru hrom ƀu anet ôh amăng bruă pơhlôm, pơgang klin tơlơi duăm ruă, ăt kah hăng bang hyu bruă mă hiam, anŏ yôm tơlơi khăp pap dưi truh pơ mơnuih ƀôn sang djop plơi pla.

Nam Trang pô čih-Nay Jek: pơblang