VOV4.Jarai - Tui lăi pơthâo lơ 4/8 mơng Anom bruă wai pơgang tơlơi duam ruă (CDC) tơring čar Dak Lak, amăng tơring čar phrâo hơmâo dong 1 čô mơnuih djai yua duam đung drah. Anai lĕ mơnuih tal 2 djai yua duam đung drah ƀơi Dak Lak dong mơng akŏ thun truh ră anai. Pô anai anăn V.V., thun tơkeng 1968, ƀơi ƀut plơi 2, tơring kual Ƀuôn Trấp, tơring glông Krông Ana, tơring čar Dak Lak. Tui lăi pơthâo mơng pô sang, lơ 20/7, V.V., ƀuh duam kơtang, gah amăng drơi jăn, hơmâo mơñum jrao aka ƀu thâo jrao hơget ƀơi sang khăm pơjrao pok mă hajăn samơ̆ ăt ƀu suaih ôh.

Truh lơ 23/7, ba ñu nao khăm hăng đit pơ sang ia jrao Thiện Hạnh. Tơdơi anun ba nao pơ Sang ia jrao prong kual Dap kơdư hơmâo pơčrang lăng duam đung drah Dengue hrơi tal 7 glăk ruă kraih. Truh 8 mông 45 mơnit mơmŏt hrơi anun mơn, pô anai arăng ba nao pơ sang ia jrao Chợ Rẫy, ƀôn prong Hồ Chí Minh. Truh lơ 30/7, pô sang ba ñu glăi, amăng jơlan ba glăi ñu tơ̆i pran. Truh lơ 3/8, amăng tơring čar Dak Lak hơmâo 2.646 čô mơnuih duam đung drah ƀơi 15 boh tơring glông, plơi prong.

Siu Đoan: Pơblang