VOV4.Jarai-Tui hăng tơlơi lăi pơthâo hlâo mơ̆ng Anom bruă sem lăng duam ruă CDC tơring čar Dak Lak, lơ 9/8, ƀơi tơring čar hơmâo čih pioh dơ̆ng mơnuih djai tal 3 yua kơ duam đung drah, yap mơ̆ng akŏ thun truh ră anai. Mơnuih djai anun tơkeng thun 1971, dŏ ƀơi phường Ea Tam, plơi prong Ƀuôn Ma Thuôt. Tui hăng sang anŏ ñu lăi, lơ 27/7, mơnuih duam mưn pơƀuh duam hlor pơ-iă drơi jăn, ruă akŏ, ruă rơgah hrơ̆m hrăm bă hră amăng drơi jăn, nao juă glai eh mơ-ia, hơmâo pơjrao hăng ia jrao ƀu thâo rơđah ôh samơ̆ mơnuih ruă ƀu lưh lơi.

Mơnuih ƀôn sang khom pơdjai ană keč na nao pơhlôm pơgang duam đung drah

Truh lơ 1/8, arăng ba pô duam nao pơ sang ia jrao prong Thiện Hạnh laih anun brơi bao nao pơ sang ia jrao prong kual Dap Kơdư thâo krăn ñu duam đung drah Dengue hrơi tal 5 hơmâo tơlơi pơhŭi hlâo bơbrah hơtai yua kman añĕ B kraih biă. Truh lơ 3/8, yua duam kơtang laih, arăng brơi ba nao pơ sang ia jrao prong Chợ Rẫy. Tơdơi kơ anun hlong djai yơh lơ 7/8. Rơngiao kơ 3 čô mơnuih djai anun, yap truh lơ 9/8, tơring čar Dak Lak hơmâo čih pioh 2.970 čô mơnuih ƀă duam đung drah, đĭ tui rơbêh 5 wơ̆t pơkă hăng tal anai mơ̆n thun hlâo.

Nay Jek: Pơblang