Anai jing pô tal 2 ruă sơ̆l dlô Nhật Bản yap mơ̆ng akŏ thun 2023 truh ră anai. Pô ruă lĕ čơđai đah rơkơi, tơkeng thun 2019, dŏ ƀơi să Tân Tiến, tơring glông Krông Pač, tơring čar Dak Lăk. Lơ 16/6, pô čơđai anai ñu duam hlor. Truh lơ 19/6, ñu pơtah kơtang, sang anŏ hơmâo ba nao pơ Sang ia jrao tơring glông Krông Pač. Lơ 20/6, nô anet anai ruă jai kơtang anun hơmâo ba nao pơ Sang ia jrao prong kual Dap Kơdư či pơjrao, ơi ia jrao đăo lăng ñu bơkơhnăk aka ƀu thâo krăn yua hơget ôh, kiăng krăp lăng amăng dlô, krăp lăng kman amăng drah. Lơ 23/6, mơ̆ng pơčrang lăng MAC ELISA yua Anom bruă pơgang hơdjă agaih klin duam ruă kual Dap kơdư pơsit pô čơđai anai djơ̆ kman igM bơbrah sơ̆l dlô Nhật Bản. Ră anai nô anet anai glăk hơmâo ơi ia jrao gir pơjrao brơi klă ƀơi Sang ia jrao prong kual Dap Kơdư. Hơmâo thâo, pô anai aka ƀu hơmâo tlâ̆o pơgang ôh vaccine bơbrah sơ̆l dlô Nhật Bản.