Anai amra jing tơlơi pơtrut pran jua kiăng Dak Lăk, tơring čar kual čư̆ siăng hơmâo lu mơnuih djuai ania ƀiă dŏ hơdip dưi ngă hơnong pơkă truh thun 2028 amra lăi pơthâo dưi pơgăn hlao laih duam pơgrun.      

Hăng neh met wa djuai ania Êđê ƀơi ƀuôn Kŏ Mleo - anih hơmâo lu mơnuih duam pơgrun hloh ƀơi să Hoà Thắng, plơi prong Buôn Ma Thuột hơdôm thun hlâo adih, jing duam pơgrun ră anai ƀu hơmâo dong tah. Amai H’Robeca Mlô, dŏ ƀơi buôn Kŏ Mleo, brơi thâo:

“Amăng plơi neh met wa nao pơ hmua yơh lu, đa nao pơ glai wok rơbung. Bơ ră anai arăng thâo pơgang laih, gơñu thâo hluh tui yơh. Yua hơmâo sang ia jrao să hyu pơtô lăi re se mơn, ră anai tơdah duam lĕ nao pơ sang ia jrao să, ƀu djơ̆ tui mơng hlâo tơdah duam lĕ koh trong yong gai, ngă yang dong tah, tơdah hyu amăng glai ăt thâo djă ba miker mơn”.

Ơi ia jrao Hoàng Văn Hùng, Khua sang ia jrao să Hòa Thắng brơi thâo, tơlơi thâo pơmin pơgang klin duam ruă mơng mơnuih ƀon sang pơplih klă tui laih; tơlơi hơdip pơplih tui mơn, anun jing bruă hyu amăng glai, nao pơhmua đih kơtă huă kơtit ăt hui rư̆i mơn; hrŏm hăng anun bruă pok pơhai pơgang klin duam pơgrun ăt hơmâo Sang ia jrao să lăng yôm mơn:

“Sang ia jrao să jơnum bruă rim blan brơi ƀing djru bruă hyu pơtô pơblang pơgang klin duam pơgrun kơ ƀing amuñ duam hloh, kah hăng ƀing juăt nao đih pơhmua, ƀing hyu bơwih ƀong pơ ataih amăng plơi pla glăk hơmâo klin duam pơgrun, giong anun ƀơk miker hơmâo añrŭ ia jrao”.

Tui hăng ơi ia jrao Võ Minh Hùng, Khua Sang ia jrao plơi prong Buôn Ma Thuột, thun 2022, abih bang 21 boh să phường mơng plơi prong hơmâo 3 thun tŏ tui mơtăm huăi hơmâo kman duam pơgrun ngă, hơdôm bruă pơhlôm pơgăn duam pơgrun hơmâo ngă na nao. Plơi prong jing anih blung a mơng tơring čar Dak Lăk hơmâo pơsit pơgăn laih duam pơgrun. Ơi ia jrao Võ Minh Hùng lăi, mah hnun hai, plơi prong ăt pok pơhai hơdôm hơdră pơgang klin duam pơgrun hơmâo glăi dong.  

“Bruă dưi pơgăn klin duam pơgrun amăng thun 2022 jing hơdôm tơlơi dưi ngă mơng blung đôč, pơ anăp anai ăt kiăng ngă lu hloh bruă pơtô lăi mơnuih ƀon sang, biă ñu lĕ ƀing juăt nao đih pơhmua, ƀudah ƀing nao bơwih ƀong mơng pơkŏn glăi pơ plơi pla kiăng arăng thâo hluh pơgang tơlơi suaih pral kơ mơnuih ƀon sang, rơngiao kơ anun, gơmơi amra pok anih pơtŏp bruă kiăng ƀing ơi ia jrao kơjăp bruă hloh,pơđĭ tui bruă pôr pơthâo hăng pơtô lăi kơ ană plơi hơdôm hơdră pơgang duam pơgrun ƀơi plơi prong”.

Tui hăng Anom bruă wai lăng klin duam ruă Dak Lăk, klin duam pơgrun tơdu tui laih amăng 3 thun rơgao. Tơdah amăng thun 2020, tơring čar hơmâo 126 čô mơnuih duam pơgrun, truh thun 2021-2022, rim thun kơnong hơmâo rơbêh 10 čô đôč ruă. Rơngiao kơ plơi prong Buôn Ma Thuột hơmâo pơsit dưi pơgăn laih duam pơgrun, ră anai hơmâo 6 boh tơring glông, plơi prong čih anăn gơgrong dưi pơgang duam pơgrun amăng rơnuč thun anai.

Ơi ia jrao Hoàng Hải Phúc, Kơ-iăng khua Anom bruă wai pơgang klin duam ruă tơring čar Dak Lăk brơi thâo, mah bruă pơgang duam pơgrun ƀơi tơring čar klă mơn, samơ̆ ƀơi kual Dap Kơdư hăng sa dua boh tơring čar mơng dêh čar ta ăt tơnap tap mơn, amuñ hơmâo duam pơgrun laih anun amuñ hơđuh jing klin. Yua hnun, amăng hrơi blan pơ anăp anai, Anom bruă čih pơkra hơdră pơgang duam pơgrun pơwơ̆t glăi dong, pơphun ngă na nao bruă wai lăng abih bang sang ia jrao:

“Ƀing gơmơi pơtrut tui kơtang hloh bruă pơtô lăi, pôr pơthâo kơ ană plơi laih anun djŏp anom bruă gum ngă hrŏm. Tal dua dong, gơmơi pơtrut wai lăng mơnuih duam, mơta 3 dong hyu pel ĕp lăng hơdôm anih hmư̆ hơmâo mơnuih duam pơgrun. Truh hrơi pơkă nao lăng ƀing dŏ đih pơhmua, ƀing hlơi lăng hơmâo nam ruă lĕ mă drah pơčrang lăng kiăng thâo krăn mơnuih duam pơgrun, laih dong gơmơi hơmâo ƀơk ia jrao añrŭ miker amăng 2 tal”.

Hơdôm boh than hơmâo ngă klă amăng bruă pơgang duam pơgrun ƀơi Dak Lăk jing pơtrut pran jua kiăng tơring čar dưi pơgang tơlơi ruă anai, anăp nao pơgang đut tơhnal hlao tơlơi ruă duam pơgrun amăng thun 2028.