Tơdơi kơ 2 blan hrăm luai ia, truh ră anai, amon H’Trần Kbuôr, dŏ amăng ƀuôn Triết, să Ea Kuêh, tơring glông Čư̆ Mgar, tơring čar Dak Lak thâo luai ia laih hăng hơmâo črâo brơi lu boh thâo kiăng ngă tơdah lê̆ trun amăng ia. H’Trần brơi thâo, yua hơmâo anih pơtô luai ia soh sel hơmâo pơphun amăng sang hră yua anun ñu hur har pran jua kiăo tui hrăm amăng tlam hrơi tlâo hăng rơma rĭm wŏt hrơi tơjuh.

“Anih pơtô hrăm anai mơ-ak biă mă, kâo čang rơmang jơlan hơdră anai dưi lar lu prong ƀiă dong kiăng ƀing gơyut gơyâo tơnap tap pơkŏn dưi hrăm luai ia kar hăng kâo”.

Anih pơtô luai ia soh sel yua Sang hră gưl I Lý Tự Trọng gum hrŏm hăng nai Nguyễn Đình Ngư pok, hăng 30 čô čơđai sang anŏ tơnap tap mơng anih 2 truh anih 5 kiăo tui hrăm. Ƀing čơđai hrăm luai ia, laih dong hơdôm boh thâo pơhlôm rơnuk rơnua tơdah lê̆ trun amăng ia; hơdôm hơdră pơjrao brơi ječ tơdah ƀuh hlơi ia ƀlung.

Ba ană nao hrăm luai ia, ơi Y Lem Byă, dŏ amăng ƀuôn Wing, să Ea Kuêh, tơring glông Čư̆ Mgar brơi thâo: amăng să hơmâo lu dơnao, ia krông čroh hnoh yua anun sang anŏ ăt bơngŏt mơn hŭi ƀong čơđai nao mơnơi amăng bơyan pơdơi prong anai. Hăng tơlơi gum hrŏm mơng sang hră hăng nai pơtô, ƀing čơđai dưi kiăo tui hăng hăng hơmâo nai črâo ba lu tơlơi kiăng pơhlôm rơnuk rơnua.

“Ƀuh ƀing čơđai hrăm luai ia ƀơi anai mơ-ak biă mă. Bơni kơ ƀing nai, sang hră hơmâo djru brơi ƀing čơđai hrăm luai ia. Lơm thâo luai ia laih, tơdah nao pơ hmua hơmâo dơnao ia, ăt hơđong mơn lơm ƀing gơñu thâo luai ia”.

Ƀơi plơi prong Buôn Ma Thuột hăng hơdôm kual jum dar, amăng bơyan pơdơi prong anai pok lu anih pơtô luai ia hăng črâo brơi hơdôm tơlơi kiăng ngă lơm trun amăng ia. Yă Nguyễn Thị Thúy Hiền, Kơ-iăng khua sang gru grua hlăk ai čơđai tơring čar Dak Lak brơi thâo: Abih bang čơđai glăk pơtô hrăm ƀơi anai amăng bơyan pơdơi prong lêng kơ hrăm luai ia hăng ngui hơdôm tơlơi ngui amăng ia.

“Ƀing gơmơi amra prap lui lu jơlan hơdră brơi ƀing čơđai dưi pơbưp nao rai hăng ngui lu tơlơi ngui amăng ia. Bruă blung ia kiăng pơsir hĭ lĕ ngă ƀing čơđai anăm hŭi ia laih anun pơphun hơdôm tơlơi ngui mơ-ak amăng ia, pơplih nao rai tui anun, ƀing gơmơi amra pơphun na nao amăng bơyan pơdơi prong anai”.

Bơ ƀơi hơdôm kual ataih, asuek amăng tơring čar, hơdôm jơlan hơdră “hrăm luai ia soh sel”, “dơnao ia ba hyu” hơmâo pơphun na nao, hơmâo lu mơnuih đing nao, hăng tơlơi gum hrŏm mơng hơdôm anih anom, ƀing mơnuih čơmah.

Ayong Võ Tiến Tuấn Niê, Kơ-iăng khua khul wai lăng čơđai tơring čar Dak Lak brơi thâo, hlâo kơ hrơi pơdơi prong, khul hlăk ai čơđai tơring čar hơmâo hră pơ-ar git gai bruă ngui ngor amăng bơyan pơdơi prong tơl hơdôm khul hlăk ai čơđai amăng hơdôm boh tơring glông, plơi prong. Amăng anun đing nao pơphun pơtô boh thâo brơi ƀing mơnuih wai lăng ƀing čơđai ƀơi hơdôm boh ƀon lan; jak iâu gum pơtôp kiăng blơi pơkra dơnao ia dưi ba hyu, tŏ tui na nao anih pơtô luai ia soh sel amăng hơdôm boh plơi pla.

Ăt tui ayong Tuấn, bruă pơgang tơlơi truh sat, ia ƀlung hơmâo ba nao amăng hơnong pơkă bruă mă amăng bơyan pơdơi prong ƀơi ƀon lan, hơmâo djop gưl khul hlăk ai čơđai đing nao, čih anăn jak iâu tơlơi gum pơgôp sui laih.

“Mơng blung a, lơm hră pơ-ar git gai pơtrun, ƀing gơmơi hơmâo git gai djop tơring glông, plơi prong, hlăk ia plơi prong amra pơphun aset hloh sa anih pơtô luai ia soh sel amăng bơyan pơdơi prong anai. Tui jŭ yap hăng đăo lăng hlâo truh rơnuč bơyan pơdơi prong đơ đam tơring čar kah hăng hơdôm boh tơring glông, hlăk ia plơi prong amra pơphun giăm 20 anih pơtô luai ia soh sel hăng hơmâo rơbêh 1.000 čô čơđai kiăo tui hrăm”.

Tơring čar Dak Lak ră anai hơmâo rơbêh 500 rơbâo čô čơđai, dưm dưm 27% mrô mơnuih đơ đan tơring čar. Mơng akŏ thun 2024 truh ră anai, ƀơi tơring čar hơmâo laih 25 čô čơđai djai yua ia ƀlung, amăng anun hơmâo lu wŏt čơđai mơnơi hrŏm ia ƀlung. Yua anun yơh, bruă pơtrut pơtô luai ia brơi ƀing čơđai kiăng hơmâo tơlơi đing nao lu ƀiă dong, kiăng ƀing čơđai thâo pơgang rơnuk rơnua lơm trun amăng ia, hăng thâo pơgang brơi ƀing gơñu pô hăng mơnuih jum dar tơdah lê̆ trun amăng ia. Mơng anun, amra ngă plai ƀiă ƀuh čơđai ia ƀlung, hăng pơhlôm brơi ƀing čơđai hơmâo bơyan pơdơi prong mơ-ak hăng rơnuk rơnua.