VOV4.Jarai - Kiăng pơhlôm brơi tơlơi suaih pral brơi ƀing čơđai sang hră lơ̆m ƀong huă pơ sang hră, gơnong bruă pơtô pơjuăt tơring čar Dak Lak glăk gir run pok pơhai hơdôm hơdră pơhlôm brơi mơnon ƀong huă hơdjă ƀơi hơdôm boh sang hră hơmâo sang apui tơnă hơbai brơi čơđai ƀong huă. Tơring čar Dak Lak ră anai hơmâo giăm 50.000 čô čơđai dŏ glăi yang hrơi dong ƀơi rơbêh 180 boh sang hră. Mơng akŏ thun gơnong bruă pơtô pơjuăt hơmâo hră pơ-ar rơkâo djop sang hră hơmâo sang apui tơnă hơbai, kơtưn amăng bruă pơhlôm mơnong ƀong huă hơdjă.

Sang apui ƀơi sang hră gưl sa Ngô Quyền, plơi prong Buôn Ma Thuột

Sang mơñum ƀong, kăn tin ƀơi hơdôm boh sang hră kiăng man pơdong agaih rơnăk, hơmâo bah amăng păng bơnal kiăng pơgang pơgăn keč ruai hăng arŏng aroač. Gơnong bruă ăt gum hrŏm hăng gơnong bruă ia jrao pel ĕp bruă ngă tui hơdôm tơlơi pơkă amăng pơhlôm mơnong ƀong huă hơdjă hăng bruă tơnă hơbai gơnam ƀong huă brơi ƀing čơđai. Djop sang hră glăk tơnă hơbai gơnam ƀong huă brơi ƀing čơđai kiăng hơmâo gơnong bruă ia jrao tŭ yap tui hră pơhlôm mơnong ƀong huă hơdjă.

VOV Tây Nguyên

Siu Đoan: Pơblang