Mrô mơnuih ruă đĭ tañ, lom anun lu ñu mơnuih ƀôn sang hmâo tơlơi pơmin ƀu đing nao lom lăng tơlơi ruă COVID-19 kah hăng duam drap anun nao blơi mă ia jrao mơñum pơjrao mă hăng ƀu djă pioh bruă gôm adung mơbah, pơdjai kơman.

Glăk bơwih brơi kơ amĭ ñu 94 thun djơ̆ COVID-19 ƀơi Anom pơjrao tơlơi ruă tưp, Sang ia jrao prong kual Dăp Kơdư, ơi Đặng Ngọc Lân, ƀơi thôn 8, să Hòa Thắng, plơi prong Buôn Ma Thuột brơi thâo, rơgao hăng anai 1 rơwang hrơi tơjuh, amĭ ñu hmâo gru nam duam pơ-iă drơi, rơgah amăng drơi jăn, ƀong huă ƀu jơman, sang anô̆ dơnong kơ pơmin duam drăp đôč đăč lăi, anun nao blơi mă ia jrao pơjrao duam drap kơ gơ̆ mơñum. Hơdôm tal pơ-iă drơi sui, sang anô̆ ba nao pơ̆ sang ia jrao pioh pơjrao. Lom thâo amĭ pô djơ̆ COVID-19, ơi Lân bơngot yua kơ ñu akă tlâ̆o pơgang vaccine ôh.

 “Ƀing gơñu lăi lui bĕ pioh amĭ pơ̆ sang, tlâ̆o brơi kơ ƀing hlăk ai hlâo, laih anun amĭ pioh tơdơi, kah đuăi ƀu hmâo brơi hlơi nao giăm lĕ ăt huăi mơn truh kơ ră anai. Phrâo tom adih anai, pơ-iă drơi lĕ ăt pơmin nao kơ kơsô̆ đôč, ƀu pơmin ôh COVID, ba rai pơ̆ anai test glăi djơ̆ COVID. Ƀu thâo ôh, ƀing ană bă pơ̆ sang nao hrăm hră, bơ̆ kâo ăt tlâ̆o laih vaccine pơgang, bơ̆ yă gơñu lĕ ƀu hmâo đuăi hyu pơ̆ hơpă ôh”.

Glăk pơjrao tơlơi ruă djơ̆ COVID-19 ƀơi Sang ia jrao prong kual Dăp Kơdư, ayong Hoàng Văn Hân, ƀơi plơi Ana, să Dray Sáp, tơring glông Krông Ana brơi thâo, sang ñu sĭ mơdrô anet, rim hrơi bưp lu mơnuih anun ñu ƀu thâo djơ̆ COVID-19 hơbin. Lom ƀuh ruă rơkông đok, pơ-iă drơi kah mơng nao pơ̆ sang ia jrao:

 “Lăi hrom ăt hmâo tlâ̆o jrao pơgang 3 ară mơn anun ƀu kơtang đơi ôh, lăi hrom tơlơi ruă ăt ƀu truh rơnoh kraih ôh, ñu pơ-iă drơi rơnang đôč, dua dong lĕ ñu ăt ƀu glêh đơi ôh, kơnong ruă rơkông đok, ƀong huă ƀu jơman anun pran pô ñu kaih hơkrŭ glăi”.

Tui hăng ơi ia jrao Phạm Hồng Lâm, Khua Anom pơjrao tơlơi ruă tưp Sang ia jrao prong kual Dăp Kơdư, amăng sa blan jê̆ hăng anai, mrô mơnuih ruă ba nao pơ̆ sang ia jrao yua kơ COVID-19 đi lu. Hơdôm mơnuih ruă ba nao pơ̆ sang ia jrao kah hăng abih bang leng kơ amăng tơlơi pơjrao mă pô ƀơi sang hlâo hăng juăt hmâo tom tơlơi ruă pơkon. Ră anai Anom pơjrao brơi 25 čô mơnuih ruă COVID-19.

 “Amăng 25 čô mơnuih hmâo năng ai ñu 5% khom yua suă jua oxy, truh kơ ră anai akă hmâo hlơi ruă kraih mơn, khă hnun hai pơplih mơng ñu ăt tơnap mơn. Kiăng pơtă hlâo hăng pơgang hlôm hlâo huăi djai yua kơ klin mơnuih ruă abih bang bơdjơ̆ nao jơlan suă jua biă ñu hăng mơnuih hmâo tơlơi ruă pơkon dong lĕ khom nao pel ĕp lăng hăng pơsit pơsir tui hluai rơnoh ruă. Hăng hmâo sa tơlơi mơnuih ƀôn sang hơđong pran jua lĕ hơdôm mơnuih ruă rơnang leng kơ pơjrao ƀơi sang, kơnong ba nao sang ia jrao ruă kơtang hăng kraih đôč, hăng ƀing mơnuih anai lu ñu hmâo tơlơi ruă pơkon nao hrom”.

Mơng akô̆ thun 2023 truh lơ 16/5, đơ đam tơring čar Dak Lak čih hmâo 570 čô mơnuih djơ̆ COVID-19. Kơnong yap amăng 7 hrơi rơgao, Dak Lak hmâo čih pioh laih 252 čô mơnuih hăng 1 čô mơnuih djai. Tui hăng ơi Hoàng Hải Phúc, Kơ-iăng Khua gơgrong bruă Anom wai lăng tơlơi duam ruă tơring čar Dak Lak, mrô mơnuih djơ̆ COVID-19 đĭ lu tơdơi kơ tal pơdơi lơphet lơ 30/4 hăng lơ 1/5 phrâo rơgao. Ră anai kah hăng abih bang mơnuih ƀôn sang hmâo lui laih gôm adung mơbah hăng pơdjai kơman ƀơi anih hmâo lu mơnuih anun amra lar tưp hyu lu hloh.

 “Ƀing gơmơi hmâo pơphô brơi kơ Gơnong bruă ia jrao ăt kah hăng Jơnum min mơnuih ƀôn sang tơring čar hmâo črâo ba biă ñu bruă lăi pơhing pioh mơnuih ƀôn sang thâo hluh ngă tui gôm adung mơnah, pơdjai kơman kiăng mơnuih ngă tui bruă tlâ̆o pơgang mơ̆ ƀing ta glăk pok pơhai. Ră anai abih bang hơdôm bôh tơring glông hmâo mơnuih djơ̆ COVID-19 ăt hmâo kual dô̆ čơlah mơn, ăt djă pioh mơn bruă pơgang hlôm hlâo hăng pơgang klin. Lom ruă kraih kah mơng ba nao pơ̆ Sang ia jrao prong kual lĕ anih rơnuč bơ̆ hơdôm bôh anom ăt gơgrong hlâo pơjrao mơn mơnuih djơ̆ COVID rơnang”.

Ăt tui hăng tơlơi lăi pơthâo glăi mơng Anom wai lăng tơlơi duam ruă tơring čar Dak Lak mơn, ƀơi tơring čar phrâo čih hmâo sa čô mơnuih djơ̆ COVID-19 djai. Pô anun 56 thun, ƀơi grŭp mrô 4, tơring kual Buôn Trấp, tơring glông Krông Ana, tơring čar Dak Lak. Pô ruă pơphun ruă mơng lơ 12/5 hmâo tom tơlơi ruă bôh ƀleh, hơtai hăng hmâo ruă pơđoh ia sik.

Hlâo kơ anun, amăng blan 4 phrâo rơgao, tơdơi kơ thâo 8 čô čơđai sang hră djơ̆ kơman SARS-CoV-2, Gơnong bruă ia jrao Dak Lak hmâo test laih COVID-19 kơ ƀing čơđai sang hră gưl 2 Trưng Vương, phường Thành Công, plơi prong Buôn Ma Thuột. Bôh tơhnal, čih pioh dong 7 čô mơnuih djơ̆ kơman SARS-CoV-2. Ƀơi anăp tơlơi ngă tơnap mơng COVID-19 lom mrô mơnuih ruă hmâo gru nam đĭ lu, gơnong bruă ia jrao Buôn Ma Thuột hmâo pơphô brơi kơ gong gai hơdôm gưl kơ kơčăo bruă pơgang pơgăn COVID-19. Hrom hăng anun kơtưn lăi pơhing truh mơnuih ƀôn sang pioh thâo răng kơđiăng kơ tơlơi suaih pral kơ pô hăng plơi pla./.