VOV4.Jarai-Tơdơi kơ sa rơwư̆ klin Covid 19 ưt hĭ, hơdôm hrơi giăm anai, amăng tơring čar Dak Lak hơmâo čih pioh mrô mơnuih ƀă klin hmar glăi dơ̆ng. Kơnong amăng 20 hrơi giăm anai đôč, tơring čar hơmâo čih pioh truh giăm 600 čô mơnuih ƀă. Mrô mơnuih ƀă hmar lơ̆m mrô tlâ̆o vaccine Covid 19 aka djơ̆ hăng mrô pơtrun mơ̆ng Ding jum ia jrao, ngă kơ bruă pơhlôm pơgang klin Covid 19 ƀơi Dak Lak bưp lu tơlơi tơnap tap. Anom bruă ia jrao tơring čar Dak Lak khom pơsir hiư̆m pă tơlơi ana ? Pô čih tơlơi pơhing gong phun jua pơhiăp Việt Nam dŏ ƀơi kual Dap Kơdư hơmâo tơña kơ ơi Nay Phi La, Khua Gơnong bruă ia jrao tơring čar Dak Lak tui anai.

-Rơkâo kơ ih brơi thâo tơlơi pơhing klin Covid 19 amăng tơring čar Dak Lak ră anai hiư̆m pă ?

­-Ơi Nay Phi La: Amăng tơring čar Dak Lak truh kơ lơ 12/9 mrô mơnuih ƀă klin lu biă mă, ră anai hơmâo 578 čô laih. Mrô mơnuih ƀă phrâo anai tơbiă rai mơ̆ng lu mơta, sa lĕ hơmâo pok pơhai laih brơi tlâ̆o pơgang vaccine arăt tal 4 hăng tlâ̆o pơñă glăi samơ̆ hrom hăng anun, hơmâo lu čơđai muai tơdơi kơ ƀă laih Covid 19 aka ƀu tlâ̆o glăi ôh. Biă mă ñu hăng mơnuih prong, ƀing tha tơdơi kơ tlâ̆o arăt tal 3 pơmin ta hơđong yơh, dưi bong glăi hăng klin anun ƀu tlâ̆o ôh arăt tal 4 ngă kơ mrô mơnuih ƀă Covid 19 đĭ lu glăi dơ̆ng amăng ƀing mơnuih tha rơma. Anai lĕ tơlơi lăp bơngơ̆t biă mă yua tơlơi thâo hluh mơ̆ng mơnuih ƀôn sang  amăng bruă tlâ̆o pơgang klin mông anai.

-Hnun yơh, ta ƀuh rơđah lĕ, amăng bruă mă pơhlôm pơgang klin Covid 19 ia jrao vaccine kah hăng phao kơtuang yôm, samơ̆ tui hăng mrô jŭ yap mơ̆ng Gơnong bruă ia jrao lĕ mrô mơnuih mơ̆ng 18 thun pơngŏ tlâ̆o vaccine Covid 19 arăt tal 3 kơnong dưi hơmâo 86% đôč hăng arăt tal 4 lĕ giăm 66%. Čơđai mơ̆ng 12-17 thun tlâ̆o arăt tal 3 kơnong 68% hăng čơđai mơ̆ng 5-12 thun tlâ̆o arăt tal 1 giăm 90% hăng arăt tal 2 kơnong 45%. Mrô anai aset hloh pơkă hăng tơlơi pơtrun mơ̆ng Ding jum ia jrao, tui anun yơh kiăng pơđĭ tui mrô mơnuih tlâ̆o vaccine Covid 19 pơ anăp anai hơgĕt lĕ bruă či ngă ?

-Ơi Nay Phi La: Ƀơi anăp kơ tơlơi pơhing anun, ding jum ia jrao hơmâo pơphun bruă mă “Yua kơ Việt Nam kjăp kơtang hăng suaih pral amăng plơi pla ăt kah hăng abih bang anom bruă kơđi čar amăng tơring čar Dak Lak ăt kah hăng djop tơring glông khom ngă hrom.

Dak Lak kơtưn tlâ̆o vaccine pơgang Covid 19

Tui hăng akŏ bruă lơ 24/9 anai jơnum min mơnuih ƀôn sang tơring čar amra pơphun jơnum jak iâu Bruă ngă, pôr pơthâo tơlơi pơhing pơhlôm, pơgang Covid 19 amăng tơlơi pơhing phrâo ră anai hăng akŏ ñu “Yua kơ sa boh dêh čar Việt Nam kjăp kơtang, suaih pral” laih anun tlâ̆o vaccine pơgang Covid 19 kơ čơđai muai khom djop. Hrom hăng anun, anom bruă ia jrao amra pok pơhai tlâ̆o pơgang kơ abih bang ƀơi djop sang hră lơ̆m ƀing čơđai sang hră mut hrăm thun hrăm phrâo, kiăng hơđong, yua tlâ̆o pơgang djop vaccine lu hloh kiăng ngă tui tơlơi pia “Yua kơ sa boh dêh čar Việt Nam kjăp kơtang hăng suaih pral”.

-Hnun hă, ƀơi anăp kơ tơlơi pơhing klin kleng Covid 19 tơnap tap, lơ̆m dêh čar ta ăt dŏ hơmâo đôč mrô mơnuih ƀă klin hăng lu djuai kman phrâo mơ̆ng Virus Sars-CoV 2, phrâo anai, Ding jum ia jrao hơmâo ngă hră pôr pơthâo, pơhlôm pơgang klin Covid 19 amăng tơlơi pơhing phrâo anun lĕ “Tơlơi pôr ngă tui 2K”, tui anun yơh tơlơi pôr anai hơmâo tơlơi hơgĕt mơ̆n phrâo pơkă hăng tơlơi pôr hlâo kơ anun?

-Ơi Nay Phi La: Anŏ pia “2K” anun lĕ, rao tơngan pơdjai kman hăng truă bơnal gôm ƀô̆ pơgăn kman, khom pơgô̆ hăng hlơi pô arăng đing đăo sit ñu mut nao amăng anih lu mơnuih dŏ kah hăng amăng sang sĭ mơdrô ƀudah amăng anih sir krep lu mơnuih, khom truă bơnal gôm ƀô̆ yơh laih anun rao tơngan hăng ia jrao pơdjai kman. Hrom hăng bruă kơtưn brơi tlâ̆o vaccine, gơmơi pok pơhai hơduah ĕp ia jrao hăng pơjrao tơlơi ruă anai amăng djop sang ia jrao prong, khom djop ia jrao pơjrao duăm ruă sit hơmâo mơnuih ƀă Covid laih anun sa tơlơi dơ̆ng yôm hloh lĕ, tơlơi thâo hluh mơ̆ng mơnuih ƀôn sang, mah ƀing ta găn rơgao hĭ laih tal tơnap tap hloh samơ̆ ăt khom tlâ̆o djop vaccine pơgang ăt kah hăng ngă tui lu tơlơi pơtrun mơ̆ng Ding jum ia jrao hnun kah ƀing ta dưi pơgăn hĭ klin Covid 19.

-Hai, bơni kơ ih hŏ!

Nay Jek: Pơblang