VOV4.Jarai - Tơlơi pơhing mơng Sang ia jrao prong kual Dap Kơdư, phrâo hơmâo dong sa čô djai yua duam đung drah Dengue. Anai jing pô tal 8 djai yua klin duam đung drah amăng thun 2022 ƀơi Dak Lăk. Pô djai tơkeng thun 1988, dŏ ƀơi thôn 5, să Hòa Lễ, tơring glông Krông Bông. Hlâo kơ anun, amăng lơ 25/9, pô anai duam kơtang, rơgah amăng drơi jăn, dŏ pơ sang mơñum jrao duam. Lơ 28/9, pô anai ƀlĕ pơtah, ƀu mơ-ak kơtang tui, hơmâo sang anŏ ba nao pơ Sang ia jrao prong Krông Bông. Truh 8 mông mơmot hrơi anun mơn, yua ruă kơtang anun jing hơmâo arăng ba nao pơ Sang ia jrao kual Dap Kơdư. Yua ruă kơtang đơi, pô anai djai amăng lơ 30/9 hăng tơlơi ruă hơmâo pơkă lăng: drơi jăn dŏ kơtuă hăng mač ngă răm kian pruăi, đung drah Dengue hrơi tal 5. Mơng akŏ thun truh ră anai, ƀơi Dak Lăk hơmâo 6658 čô mơnuih duam đung drah, amăng anun hơmâo 8 čô mơnuih djai.

Pơdjai ană keč, kih rơmet anih anom jing hơdră pơgang duam đung drah klă hloh

Siu H’Mai: Pơblang