Găn rơgao 40 km nao pơ siêu thị Ƀuôn Ma Thuôt blơi gơnam têt, amai Võ Thị Diệu Hương tơring glông Krông Pač brơi thâo, yua hơgĕt ñu khom nao ataih hrup anun kiăng blơi gơnam yua amăng hrơi ngă yang thun phrâo ƀong têt lĕ yua aka ƀu h’ĭn ôh hăng gơnam arăng sĭ mơdrô dăp lui pơ anih anom sĭ mơdrô:

“Gơnam tam amăng siêu thị lu mơta biă mă laih anun ñu gêh găl pioh kơ ta ruah mă blơi hơgĕt anŏ kiăng hơmâo soh. Laih anun pran jua ta mut nao pơ siêu thị blơi gơnam hơđong hloh yua gơnam sĭ mơdrô arăng thâo krăn soh gah rơngiao lĕ hŭi gơnam sĭ mơdrô ƀu thâo phun tơdŭ, gơnam pơkra ming ngă mă yua anun klă ƀiă ruah blơi gơnam pơ siêu thị hơđong hloh”.

Ăt nao blơi gơnam ƀong têt ngă yang thun phrâo mơ̆n, amai Nguyễn Mai Hương dŏ pơ phường Ea Tam, plơi prong Ƀuôn Ma Thuôt lăi lĕ, hrơi blan anai hơmâo lu mông ta ruah mă, ĕp lăng tong ten kiăng huăi hyu blơi djơ̆ gơnam sĭ mơdrô ngă mă ča ƀu klă hiam:

“Hăng anom sĭ mơdrô gơnam têt kâo ƀuh hơmâo lu mơta biă mă, rơnoh sĭ mơdrô ăt hơmâo pơkă djơ̆ rơnoh mơ̆n mơ̆ng rơgêh truh pơmă. Tơlơi pơkă ruah mă gơnam sĭ mơdrô mơ̆ng sang anŏ gơmơi lĕ lăng hruh hiam, gơnam tŭ yua, kâo ăt čang rơmang djop sang bruă kơnuk kơna khom pel ĕp tong ten bruă rơnăk hăng pơgang mơnong ƀong huă hơdjă rơgoh, kiăng gơmơi hơđong pran jua blơi yua”.

Bơwih brơi têt ngă yang thun phrâo Giáp Thìn thun anai, djop sang bruă bơwih ƀong sĭ mơdrô, sang bruă pơpha hyu gơnam sĭ mơdrô amăng tơring čar Dak Lak hơmâo prăp lui yơh gơnam sĭ mơdrô, kĭ hră ƀuăn hăng djop sang bruă pơkra ming ba gơnam sĭ mơdrô djơ̆ lăp hăng klă hiam. Amai Nguyễn Thị Em, pô sang sĭ mơdrô gơnam ƀơi jơlan Nguyễn Tất Thành, phường Tân Lợi, plơi prong Ƀuôn Ma Thuôt brơi thâo:

“sang anŏ gơmơi sĭ mơdrô lĕ ăt nga wtui djơ̆ tơlơi pơkă hnong kơnuih sĭ mơdrô, blơi pơmut gơnam khom ruah tong ten, gơnam pơkă hơmâo anăn hmư̆ hing laih, ƀlir tem tong ten rơđah rơđong kah blơi pơmut, rơnuk anai ƀu hơmâo lu hơdră pơhno sĭ mơdrô siêu thị laih anun sang sĭ mơdrô bách hóa pok djop anih, lu đơi yua kơ anun ta kiăng ngă djơ̆ kơnuih hiam hmư̆ hing sĭ mơdrô hnun kah tuai mơ̆ng rai blơi gơnam ta".

Kiăng pơhlôm gơnam sĭ mơdrô djop hlâo, amăng bơyan têt hăng tơdơi kơ têt thun phrâo, tơring čar Dak Lak hơmâo pơtrun hiăp djop sang bruă kơnuk kơna kơtưn hyu ĕp lăng anŏ hơdjă rơgoh mơnong ƀong huă, laih anun git agi djop sang bruă, plơi pla pơphun tañ, ĕp lăng, pơsir bruă pơkra ming, sĭ mơdrô gơnam ngă mă čih anăn arăng, gơnam pơkra anun ƀu klă hiam. Djop bruă mă hyu pôr tơlơi pơhing ăt dưi hơmâo tơlơi tơring čar pơtô lăi na nao kiăng djop sang bruă pơkra ming sĭ mơdrô hơmâo tơlơi gơgrong ba amăng bruă pơhlôm hơdjă mơnong ƀong huă, laih dơ̆ng djru kơ mơnuih ƀôn sang blơi yua ngă tui djơ̆ hơdră pơgang tơlơi suaih pral kơ drơi jăn pô. Ơi Hoàng Văn Nghĩa, Kơ-iăng Khua anom bruă hyu ĕp bruă mă gah Gơnong bruă Đang hmua hăng Pơđĭ kyar plơi pla tơring čar Dak Lak brơi thâo:

“Ƀing gơmơi đing nao hyu ĕp lăng djop mơta mơnong ƀong huă bơwih brơi kơ têt thun phrâo kah hăng tơpai, ƀiêr, ƀañ kĕo, añăm mơnong hăng gơnam pơkra ming mơ̆ng añăm mơnong, añăm hla rơ̆k juăt lăi añăm pơtam, boh troh, hơbơi pơtơi. Kơnang kơ bruă hyu sem lăng anun kiăng ƀuh tañ bruă ngă soh glăi tơlơi pơkă pơgang hơdjă rơgoh mơnong ƀong huă laih anun gơmơi amra pơsir khut khăt mơtam hlơi pô ngă soh glăi. Hyu ĕp lăng hlong pơtô kơ djop sang bruă pơkra ming gơnam sĭ mơdrô laih anun ĕp lăng gơnam pơkra ming gơñu blơi mơ̆ng pơpă, hơmâo phun tơdŭ mơ̆n hăng hơdră pơkra ming djơ̆ tơlơi pơtrun pơgang rơnoh djơ̆ hnong mơ̆n hă".

Hơmâo tơlơi gum hrŏm mơ̆ng djop sang bruă kơnuk kơna kiăng pơgang tơlơi hơdjă rơgoh mơnong ƀong huă amăng bơyan têt ƀiă truh laih yơh. Mah hnun, mơnuih ƀôn sang ăt kiăng ngă tui djơ̆ tơlơi pơtô lăi, hơmâo tơlơi ruah mă djơ̆ lăp, tong ten, kơnong blơi hăng mă yua mơnong ƀong huă thâo krăn phun tơdŭ sit nik hơmâo anăn rơđah rơđong, ĕp lăng hrơi pơkă čih pơthâo amăng tơlơi pơhing gơnam sĭ mơdrô ƀơi hruh kơdung ñu.