Blan ngă bruă anai pơphun mơ̆ng lơ 15/4 truh abih lơ 15/5/2023 hăng akŏ bruă lăi nao “Pơhlôm pơgang tơlơi rơnuk rơnua, hơđong hăng hơdjă mơnong ƀong huă tơlơi pơhing phrâo”. Tui hăng anun, đơ đam tơring čar amra pơtrut kơtang, pơtô hrăm thâo hluh tong ten, pơtong glăi tơlơi glăm ba hăng bruă mă mơ̆ng djop gưl anom bruă ping gah, mơnuih ngă khua, mơnuih ping gah hăng ană plơi pla pơhlôm, pơgang hơđong hơdjă mơnong ƀong huă; pơđĭ tui tơlơi glăm ba mơ̆ng djop sang bruă, mơnuih ngă bruă sĭ mơdrô pơkra ming mơnong ƀong huă ngă djơ̆ tơlơi phiăn pơhlôm hơdjă hơđong mơnong ƀong huă;

kơtưn hyu sem, ĕp lăng bruă mă pơgang hơdjă rơgoh mơnong ƀong huă kiăng rơnuk rơnua hơđong, khom pơsir khut khăt, pơgăn truh kih djop sang bruă, mơnuih pơkra ming sĭ mơdrô mơnong ƀong huă ngă soh glăi pơgang hơdjă rơgoh; pơđĭ tui bruă pơhlôm, pơgang hăng pơsir tañ tơlơi măt mơnong ƀong huă yua ƀu hơdjă rơgoh laih anun pơgang tơlơi duăm ruă ƀă mơ̆ng kman mơ̆ng ƀong huă ƀu rơgoh ngă; pơhrŏ tơlơi truh măt mơnong ƀong huă ƀu hơdjă rơgoh. Thun 2022, đơ đam tơring čar Dak Lak hơmâo 3 wơ̆t tơlơi truh măt mơnong ƀong huă hơmâo 18 čô mơnuih ruă, 10 čô khom đih pơjrao pơ sang ia jrao, bưng mơ̆n huăi hơmâo mơnuih djai.