Tơdơi kơ hơmâo 2 anih ƀă klin hơdrap A H5N1 ƀơi dua boh sang anŏ rông mơnŭ bip să Ea Kly, tơring glông Krông Pač. Anom bruă pel ĕp klin duam ruă tơring čar Dak Lak ngă hrom anom bruă pơjrao hlô mơnong hăng gong gai kơnuk kơna tơring glông pok pơhai lu hơdră pơhlôm, pơgang klin hơdrap A/H5N1 hlăk hơđuh rai ƀă amăng mơnŭ bip hŭi ƀă kơ mơnuih.
Tui hăng anun, anom bruă pel ep duam ruă CDC tơring čar Dak Lak hơmâo nao ep lăng, pơsir tong ten klin hơdrap mơnŭ djai kmăp hŭi ƀă kơ mơnuih amăng să Ea Kly, tơring glông Krông Pač; ngă hrom hăng anom bruă pơjrao hlô mơnong pơtô kơ mơnuih ƀôn sang thâo tong ten tơlơi pơhing mơnŭ bip djai kmăp hăng pơtă mơnuih ƀôn sang anăm ba hyu sĭ mơdrô, čuh ƀong, blơi añăm mơnong mơnŭ bip mơ̆ng kual hơmâo klin ôh, ƀudah mơnŭ bip mơ̆ng anih aka ƀu thâo tong ten phun tơdŭ.
Sang bruă pel ĕp tơlơi duam ruă tơring čar ăt mă drah ba pơčrang kman hăng pơtô brơi hơdră dŏ pơčlah jăng jai, krăo lăng tơlơi suaih pral amăng 21 hrơi pioh pơhlôm hlâo hŭi klin lar hyu mơ̆ng mơnŭ bip đĭ pơ mơnuih. Ră anai, abih bang tơhnal ba pơčrang kman lêng kơ ƀu ƀuh ôh kman hơdrap virus A (H5N1).
Viết bình luận