Jơlan hơdră kiăng pơhrua nao vitamin D3K2 (Vitamin D3 hăng vitamin K2) hiam klă, djru hrip mă kalsi, kơjăp, tañ đĭ tơlang, tơgơi hiam kơ čơđai. Amăng jơlan hơdră anai, Khul pơphun bruă mă hơmâo jao brơi 200 gêt ia jrao Vitamin D3K2 brơi kơ 100 čô čơđai muai tơnap tap ƀơi phường Ea Kao. Nao tŭ mă gơnam, amai H’Don Ƀuôn Krông, ƀuôn Bông, să Ea Kao lăi:

“Ta aka ƀu hơmâo tơlơi gêh găl pioh blơi ia jrao đĭ pran brơi kơ ană bă mơñum ôh, ră anai ƀuh mơak biă mă dưi tŭ mă ia jrao D3K2 anai, bơni lu biă mă tơlơi djru ba djơh hăng anai”.

Dưi thâo amăng tal anai ƀơi Dak Lak, jơlan hơdră ngă tui ƀơi hơdôm boh phường Tân An, Tân Lập, să Krông Pač, Tân Tiến, Ea Phê, Ea Knuêč, jao brơi abih bang 1.200 gêt ia jrao vitamin D3K2 brơi kơ 600 čô čơđai tơnap tap, ƀun rin, hăng rơnoh prăk rơbêh 460 klăk. Amăng dêh čar, jơlan hơdră anai him lăng djru ba 1 klăk wơ̆t mơñum vitamin D3K2 brơi kơ 5.500 čô čơđai ƀơi 16 boh tơring čar, ƀôn prong.