VOV4.Jarai - Ƀơi Dak Lak ră anai hơmâo rơbêh 400 čô čơđai ƀă tơlơi ruă Thalassemia (drah ƀu kŏng). Anai lĕ tơlơi ruă pioh glăi mơng amĭ ama hăng ră anai aka ƀu hơmâo jrao pioh pơjrao suaih hlao. Samơ̆, hăng tơlơi pơmĭn kiăng kơ ană bă tañ pơjrao suaih, hơmâo lu amĭ ama blơi jrao mă pô hăng yua hơdôm djuai jrao aka ƀu thâo mơng pă kiăng pơjrao brơi ƀing čơđai mưn anŏ sat pơglăi mơng tơlơi ruă anai.

Ba ană nao pơjrao pơ Sang ia jrao prong kual Dap kơdư, ayong Trần Văn Hai, dŏ ƀơi ƀut plơi 16, Tân Hòa, tơring glông Buôn Đôn, tơring čar Dak Lak brơi thâo: Ană ñu ră anai 7 thun. Mơng ñu 3 blan, ƀuh juăt hia na nao, sang anŏ ba ñu nao pơ sang ia jrao khăm, ơi ia jrao lăi ƀă tơlơi ruă Thalassemia. Lơ̆m hlâo kơ 3 thun, dưm dưm 3 truh pơ 4 blan sang anŏ ba ñu nao pơ sang ia jrao ha wŏt kiăng kơ jôr drah hăng tơbiă hĭ sát. Jai prong, ană ñu ba nao sang ia jrao lu tui. Ră anai 1 blan khŏm ba nao sang ia jrao ha wŏt. Bơngŏt biă mă tơlơi suaih pral kơ ană, hrŏm hăng bruă ba ñu nao pơ sang ia jrao pơjrao, sang anŏ ăt hyu pel lu djuai jrao arăng lăi pơthâo dưi pơjrao suaih tơlơi ruă drah ƀu kŏng. Ayong Hai brơi thâo, rơngiă lu prăk yơh samơ̆ ană ñu ăt ƀu pla ƀiă ôh.

“Đa hơmâo mơnuih lăi blơi jrao ƀing gơñu amra pơjrao suaih tơlơi ruă drah ƀu kŏng, pơhmutu ha blan ƀing gơmơi blơi jrao ƀing gơñu 2,3 wŏt kah mơng plai ƀiă nao jôr drah samơ̆ ăt ƀu dưi lơi. Yua djop jrao pô anai pô adih ăt ƀu suaih lơi, tuč rơnuč ăt nao jôr drah mơn”.

Ơi ia jrao khăm brơi čơđai ƀă tơlơi ruă Thalassemia

Kar kăi tui anun mơn, ayong Bùi Văn Viên, dŏ ƀơi tơring glông Ea H’leo hmư̆ tui arăng pơsur nao blơi jrao kiăng pơjrao ruă drah ƀu kŏng, ñu ăt nao blơi mơn kiăng kơ pơjrao brơi ană gơñu. Prăk kak rơngiă mơ̆ tơlơi ruă jai hrơi jai kơtang tui.

“Sang anŏ gơmơi bơngŏt biă mă, ăt ba nao pơjrao lu anih, samơ̆ ăt ƀu plai ƀiă ôh. Amăng hrơi blan anun ăt brơi mơñum lu jrao akha kyâo laih samơ̆ tơlơi ruă ƀu plai ƀiă ôh khŏm ba nao jôr drah kiăng kơ ană ñu dưi dŏ hơdip”.

Tui hăng nai prin tha, ơi ia jrao Trần Thị Thuý Minh, Khua anom pơjrao brơi čơđai Sang ia jrao prong kual Dap kơdư, amăng hơdôm thun giăm anai, hơmâo rơbêh 400 čô čơđai pơčrang lăng ƀă tơlơi ruă Thalassemia hăng khŏm pơjrao na nao pơ sang ia jrao. Ră anai rĭm hrơi sang ia jrao tŭ mă hăng pơjrao brơi mơng 20-30 čô čơđai ƀă tơlơi ruă Thalassemia. Anai lĕ tơlơi ruă aka ƀu dưi pơjrao suaih hlao, hăng hơdôm hơdră pơjrao ră anai kơnong ƀơi hơdôm sang ia jrao đôč.

“Pơjrao tơlơi ruă Thalassemia ră anai hrŏm hăng jôr drah, tơbiă đuăi sát, pơjrao tui tlôn, kơnong sang ia jrao kah mơng dưi pơjrao brơi. Bơ sa, dua hơdră pơjrao pơkŏn dong anun lĕ pơtlep tủy pơhmutu lĕ liệu pháp gen ƀudah trơ̆i hĭ lia lĕ hơdôm hơdră pơjrao tơlơi ruă Thalassemia kơnong ƀuh ƀơi hơdôm sang ia jrao. Yua anun lĕ lơ̆m ruă Thalassemia kiăng ba nao sang ia jrao ƀudah hơdôm anom bruă pơjrao brơi tơlơi ruă anai kiăng arăng črâo ba hăng wai lăng pơjrao hmao tlôn laih dong ƀu kiăng hơdră pơjrao tui sô hơđăp kah hăng hơdôm anih pơjrao gah rơngiao ăt ƀu dưi pơjrao tơlơi ruă anai hlao mơtăm ôh”.

Ơi ia jrao khăm brơi čơđai ƀă tơlơi ruă Thalassemia

Ơi ia jrao Trần Thị Thúy Minh pơtă pơtăn, tơlơi ruă Thalassemia tơdah pơjrao ƀu djơ̆ amra ngă mơnuih ruă tañ djai biă mă. Samơ̆, tơlơi ruă anai dưi pơgang tơdah thâo hluh rơđah, ngă tui amăng pơčrang lăng hlâo kơ pơdô̆ rơkơi bơnai. Tơdah ƀing čơđai tơkeng rai ƀă tơlơi ruă Thalassemia, ƀing amĭ ama khŏm ba nao pơ sang ia jrao kiăng pơjrao hăng wai lăng, anăm yua hơdôm djuai jrao aka ƀu thâo mơng pă, ngă rơngiă prăk hăng tơlơi ruă jai kơtang, sat hloh ngă hŭi rơhyưt kơ ƀing čơđai.

Siu Đoan: Pơblang