VOV4.Jarai - Amăng hơdôm hrơi anai, rim hrơi tơring čar Dak Lăk čih pioh hơmâo rơbêh 2 rơbâo čô mơnuih ƀă klin Covid-19 ƀơi abih bang 15 boh tơring glông, plơi prong. Hơjăn plơi prong Buôn Ma Thuột jing anih hơmâo F0 lu hloh mơng tơring čar, rim hrơi hơmâo rơbêh ha rơbâo čô mơnuih ƀă Covid-19 amăng plơi pla. Mơnuih ruă lu hloh ƀơi ƀing tha mơng 18 truh 45 thun, mrô čơđai mơng nge truh 11 thun ƀă klin 19%.

Mơnuih ƀă Covid-19 glăk pơjrao pơ Sang ia jrao tơring glông Krông Ƀuk

Ƀơi anăp tơlơi hŭi rơhyưt anai, tơring čar Dak Lăk git gai hơdôm boh sang ia jrao tơring glông pok thim dong anih pơjrao mơnuih ƀă klin Covid-19, pơdong anih pơjrao brơi ƀing čơđai ƀă Covid-19 kơtang ƀơi sang E mơng Sang ia jrao prong kual Dap Kơdư. Kơnong plơi prong Buôn Ma Thuột hơmâo pơhrua tui lu mơnuih mă bruă ƀơi sang ia jrao anet djru wai lăng, pơjrao mơnuih F0 pơ sang.

Siu H’Mai: Pơblang