Glăk bơwih brơi kơ ană đah kơmơi 16 blan ƀơi Anih pơjrao čơđai muai Sang ia jrao prong kual Dap Kơdư, amai Huỳnh Thị An ƀơi să Čư̆ Mlan, tơring glông Ea Sup, tơring čar Dak Lak brơi thâo, rơgao hăng anai 1 rơwang hrơi tơjuh, ñu ƀuh ană ñu pơtuk lu đơi, rơgah amăng drơi jăn, pơ-iă drơi hăng ƀơi plă tơngan bum ia anun ba nao pel ĕp lăng. Ơi ia jrao pơsit lăi ruă kơčung tơkai tơngan hăng mơbah. Tơdơi kơ 3 hrơi pơjrao pơ̆ sang ƀu suaih, sang anô̆ hmâo ba ană nao pơ̆ Sang ia jrao prong kual Dap Kơdư:

 “Lom rai pơ̆ anai bum ia lu lar truh 2 plă ƀĕ tơkai laih anun lar truh tơngan dong. Kâo ăt ƀu thâo lu mơn kơ tơlơi ruă kơčung tơkai tơngan hăng mơbah anun pơ̆ sang gơnam ngui kâo brơi čơđai ngui đôč ƀu pơmin ôh bơyan anai ñu hơđuh đĭ tơlơi ruă anai”.

Ăt bơwih brơi kơ ană 7 thun hmâo tơlơi ruă kơčung tơkai, tơngan hăng mơbah ƀơi Sang ia jrao prong kual Dap Kơdư, amai Nguyễn Thị Diện ƀơi phường An Bình, plơi prong Buôn Hồ brơi thâo, tơdơi kơ 5 hrơi pơjrao, ană ñu plai ƀiă pơ-iă drơi jăn, tơlơi suaih pral ƀơƀrư̆ hơkrŭ glăi:

 “Mơ̆ng hlâo ƀu djơ̆ tơlơi ruă anai ôh, pơ̆ anun ƀiă đôč mơnuih ruă anun ƀu thâo đơi ôh. Kâo glăi kâo amra agaih rơnăk hơdjă hloh, kơđiăng hloh amăng bruă rô nao rai, hyu ngui”.

Tui hăng ơi ia jrao Huỳnh Thị Bích Như, mă bruă ƀơi Anom pơjrao tơlơi ruă čơđai muai, Sang ia jrao prong kual Dap Kơdư, mơng akô̆ thun truh ră anai, anom hmâo tŭ mă, pơjrao brơi rơbêh kơ 85 čô čơđai hmâo tơlơi ruă kơčung mơbah, tơkai, tơngan. Lăp đing nao amăng rơwang 1 blan jê̆ hăng anai mrô mơnuih ba nao pơ̆ sang ia jrao lu biă. Ră anai anom glăk pơjrao brơi 15 čô mơnuih ruă kơčung tơkai, tơngan hăng mơbah, amăng anun, hmâo 2 čô mơnuih ruă kraih. Ơi ia jrao Huỳnh Thị Bích Như lăi pơthâo:

 “Kâo pơgang hlôm hlâo hăng hơdră pơđĭ tui pran gơgrong kơ ană bă, ƀong huă djop gơnam ngă bơbuă, mơñum ia djop laih anun amra pơhrua nao hơdôm vitamin pioh hmâo pran gơgrong kơdŏng glăi kơ ană bă hăng kâo kiăng tlâ̆o hơdôm mơta vaccine pơgang ruă drăp hăng pơtô brơi kơ ană rơgaih rơnăk tơkai tơngan hăng mơbah djel hloh ñu amra ngă plai ƀiă mơn lar hyu”.

Tui hăng Anom wai lăng tơlơi duam ruă tơring čar Dak Lak, yap mơng akô̆ thun truh ră anai, đơ đam tơring čar hmâo čih pioh rơbêh kơ 100 čô mơnuih hmâo tơlơi ruă kơčung tơkai, tơngan hăng mơbah raih daih ƀơi 15 bôh tơring glông, plơi prong. Amăng anun, hmâo sa čô mơnuih djai. Năng ai ñu 1 blan jê̆ hăng anai, amăng akô̆ bơyan hơjan, mrô mơnuih ruă kơčung tơkai, tơngan hăng mơbah glăk lu tui, hơnong ñu 1 rơwang hrơi tơjuh hmâo mơ̆ng 12 truh 15 čô mơnuih. Jơnum min mơnuih ƀôn sang tơring čar Dak Lak hmâo mă yua laih mrô 4953, kơ bruă kơtưn pơgang pơgăn klin ruă, ngă kơčung tơkai, tơngan hăng mơbah; Gơnong bruă ia jrao tơring čar črâo ba hơdôm anom bruă ia jrao kơtưn pel ĕp, lăng tui kiăng guang dar kual, pơsir anih klin ngă; pơtrut kơtang lăi pơhing bruă pơgang pơgăn klin truh mơnuih ƀôn sang. Hrŏm hăng anun, gum hrŏm hăng Gơnong bruă pơtô pơhrăm pơtô brơi hơdôm bôh sang hră pơgang, pơgăn klin ruă lar hyu. Ơi Hoàng Hải Phúc, Kơ-iăng Khua Anom wai lăng tơlơi klin ruă tơring čar Dak Lak brơi thâo:

 “Ƀing gơmơi pơphô brơi kơ Gơnong bruă ia jrao pioh črâo ba hơdôm bôh anom hăng pơphô brơi Gơnong bruă pơtô pơhrăm lăi pơhing 3 mơta tơlơi kah hăng ƀong huă tơsă, mơñum tơsă, agaih rơnăk hơdjă, rao tơngan hăng ngă tui 6 bruă pơgang mơ̆ Ding jum ia jrao pơtă samơ̆ mơnuih ƀôn sang ăt ƀu đing nao mơn. Ƀing gơmơi ăt gum hrom mơn hăng Gơnong bruă pơtô pơhrăm kơ hơdôm bôh sang hră lom mơ̆ hmâo ƀing čơđai kơčung tơkai, tơngan hăng mơbah amra kah dô̆ phara mơtăm, lăi pơhing pơsur sang anô̆ agaih rơnăk pưk sang, agaih rơnăk tơkai tơngan hăng mơbah hlâo kơ ƀong mơñum hăng tơdơi kơ nao juă glai”./.