Sang ia jrao tơring glông Mdrak, tơring čar Dak Lak hmâo 12 anih mă bruă hăng 13 bôh sang ia jrao să, tơring kual samơ̆ kơnong kơ hmâo 43 čô ơi nai ia jrao hăng 11 čô ơi ia jrao chuyên khoa I. Tui hăng yă Lê Thị Thủy, Khua Sang ia jrao prong tơring glông Mdrak, tơdơi kơ thun 2019 hăng bruă ngă tui hơdôm Tơlơi pơtrun 37 hăng Tơlơi pơtrun 07 mơng Ding jum ia jrao kơ bruă pơmut hrŏm hơdôm Sang ia jrao prong lĕ sang ia jrao să gơgrong pơhlôm dong lu bruă mă kah hăng: pel ĕp, pơjrao tơlơi ruă, bruă ia jrao pơhlôm hlâo, mrô mơnuih ƀă ană tui hơdră pơkă, pok pơhai hơdôm jơlan hơdră pơkă mơ̆ng lŏn ia kơ bruă ia jrao... Sa dua čô mơnuih apăn bruă khom gơgrong ba lu bruă lơm anun mrô bruă mă lu. Tơlơi anai ngă khul ơi nai ia jrao mơng sang ia jrao khom gir run lu hloh mơ̆ng 2 truh kơ 3 wot kah mơ̆ng giong bruă jao. Bruă lu, mơnuih mă bruă kơƀah ngă khul mơnuih mă bruă ia jrao ƀơi să djơ̆ anô̆ ñu rơgao hơnong. Yă Lê Thị Thủy brơi thâo:

"Khă ta kiăng ruah mơnuih mă bruă hăng ăt hmâo mơn lu hơdră bruă mơng Sang ia jrao ăt kah hăng ngă pơhưč Tơlơi pơtrun pơsit mơ̆ng Khul khua pơ ala mơnuih ƀôn sang tơring čar, samơ̆ ăt ƀu hmâo ơi ia jrao mơn nao mă bruă rơgao kơ lu tal ruah. Yua anun hăng anom bruă, rơngiao kơ gơgrong hlâo pơtô pơhrăm pơlir nao rai mơnuih apăn bruă, mă bruă ƀơi sang ia jrao, ăt čang rơmang mơn hmâo sa hơdră bruă pơhlôm tơhnal phun ñu kơ tơlơi đing nao hlâo, ngă pơhưč pha ra kơ mơnuih apăn bruă biă ñu lĕ ơi ia jrao laih anun mơnuih apăn bruă hmâo bôh thâo kơjăp nao mă bruă ƀơi sang ia jrao să".

Khă hơdră pơkă pơkra anih dưm sưng, măi mok kơ bruă ia jrao tum djop, samơ̆ yua kơ ƀu dưi ruah ơi ia jrao anun hơdôm thun rơgao Sang ia jrao tơring glông Krông Ƀuk (tơring čar Dak Lak) ƀu dưi pơjing hơdôm mơnuih juăt bruă čoh gluai ăt kah hăng pok pơhai hơdôm măi mok phrâo. Tui hăng ơi Trần Anh Hùng, Kơ-iăng Khua Sang ia jrao tơring glông Krông Ƀuk, anun lĕ bôh than bơdjơ̆ nao truh bruă pel ĕp, pơjrao tơlơi ruă, ăt kah hăng anô̆ kơjăp bruă mă gah ia jrao ƀơi sang ia jrao.

 “Ơi ia jrao kơƀah lu biă, ră anai ƀing ơi ia jrao glăk mă bruă ƀơi Krông Ƀuk kah hăng abih bang phrâo tơbiă mơ̆ng sang hră, akă hmâo hră pơsit mă bruă, akă hmâo tơlơi găn rơgao. Biă ñu lĕ kơƀah ơi ia jrao chuyên khoa ngoại, chuyên khoa sản hăng chuyên khoa gây mê hồi sức hăng ƀing ơi ia jrao chuyên khoa čoh gluai, anun bruă tŭ mă pel ĕp hăng pơjrao tơlơi ruă kơ bruă pơjrao gah rơngiao drơi jăn kơ mơnuih tơkeng ană kah hăng abih bang kơnong kơ pơjrao mă ƀiă pioh ba nao pơ̆ sang ia jrao prong đôč. Bơ̆ breh pơjrao ăt ƀu dưi pok pơhai mơn yua kơ ƀu hmâo ơi ia jrao ngă pit, ngă kron, ơi ia jrao breh pơjrao. Gah pel ĕp tơlơi ruă lĕ Sang ia jrao ƀu hmâo ơi ia jrao chuyên khoa čoh gluai lĕ ăt ƀu dưi pel ĕp tơlơi suaih pral hăng pơsit hră pel ĕp tơlơi suaih pral kơ mơnuih ƀôn sang”.

Tui Gơnong bruă ia jrao tơring čar Dak Lak đơ đam tơring čar glăk kơƀah rơbêh kơ 1.700 čô mnuih mă bruă ƀong prăk blan tui phiăn pơkă, hăng kơnong kơ hmâo 7,15% mrô ơi ia jrao amăng sa rơbăn čô mơnuih ƀôn sang pơhmu hăng tơlơi pơkă lĕ 8 čô ơi ia jrao amăng sa rơbăn čô mơnuih ƀôn sang. Tơlơi rơgao hơnong mrô mơnuih ruă nao pơjrao glăk hmâo ƀơi lu sang ia jrao mơ̆ng tơring čar, hăng rơnoh sưng ƀơi mrô 110% truh 130%. Bôh than ba truh kơƀah ơi ia jrao ƀơi sang ia jrao să lĕ yua kơ anih anom mă bruă ƀu klă, hmâo lu tơlơi bơngot pran jua. Lơm anun, prăk blan cơkă mă tui anăn păn bruă mă hăng hơdôm prăk djru pơkon yap tui rơnoh prăk blan ƀiă hloh lăng hrŏm dô̆ ƀiă, akă lăp djơ̆ ôh pơhmu hăng bruă mă.

Kiăng pơsir tơlơi anai, Gơnong bruă ia jrao tơring čar Dak Lak hmâo pơphô brơi laih kơ Jơnum min mơnuih ƀôn sang tơring čar jơlan gah pơtô glăi bruă ia jrao pơhlôm hlâo kơ hơdôm tơring glông, plơi prong ƀơi anăp wai lăng hăng tuh pơplai. Hrŏm hăng anun Gơnong bruă ia jrao ăt amra čih pơkra Akô̆ bruă mă yua ơi ia jrao gah rơngiao mut pel ĕp pơjrao tơlơi duam ruă ƀơi sang ia jrao kơnuk kơna hăng tla prăk blan lăp djơ̆. Bruă ruah ƀing ơi, nai ia jrao ƀơi plơi pla anun ăt dưi đing nao ngă tui mơn pơ̆ anăp anai. Ơi Nay Phi La, Khua Gơnong bruă ia jrao tơring čar Dak Lak brơi thâo:

 “Ră anai Gơnong bruă ia jrao hmâo ba tơbiă laih lu jơlan gah, bruă mă kah hăng hơdôm mơnuih tơkeng rai, prong đĭ ƀơi plơi pla hơpă amra dưi tŭ mă mut mă bruă plơi pla anun. Thun 2023 amra ruah dong, biă ñu đing nao Sang hră đại học Tây Nguyên, Đại học Buôn Ma Thuột ăt kah hăng ƀing čơđai gưl dlông hmâo tơlơi kiăng bruă mă ƀơi tơring čar”.

Kơƀah mơnuih mă bruă, biă ñu ơi ia jrao glăk jing tơlơi lông ƀu anet ôh hăng gơnong bruă ia jrao tơring čar Dak Lak. Khă hơdôm hrơi rơgao, tơring čar hmâo pok pơhai laih lu hơdră bruă ngă pơhưč ơi ia jrao ăt kah hăng đing nao pơkiăo mơnuih mă bruă ia jrao nao pơhrăm pơđĭ tui bôh thâo mă bruă, khă hnun hai ăt akă djơ̆ hăng tơlơi kiăng sit mơn. Kiăng djă kŏng tơkai hăng ngă pơhưč ơi ia jrao nao mă bruă ƀơi hơdôm bôh sang ia jrao kơnuk kơna, hrŏm hăng hơdră bruă ngă pơhưč, khom hmâo dong hơdôm bruă mă phun pơkon pioh gơñu hơđong pran jua mă bruă, gơgrong hăng bruă mă./.