VOV4.Jarai - Lơ̆m ƀuh mơnuih ƀă djuai klin phrâo BA.4 hăng BA.5 ƀơi Việt Nam hăng klin glăk lar hyu kơtang ƀiă djuai klin pơkŏn, dong mơng lơ 7/7-31/7/2022, tơring čar Dak Lak amra tŭ mă dong 100 rơbâo liều vaccine pơgang klin Covid-19 tal 25 kiăng kơ pơhlôm djop vaccine tlâ̆o brơi mơnuih ƀon sang. Hăng 110.100 liều vaccine pơgang klin Covid-19 tal anai, Dak Lak amra dưi ngă tui hơnong pơkă lơ̆m ƀing mơnuih mơng 12 thun pơ glông amra tlâ̆o pơwŏt glăi tal 1,2 rơbêh 90%; ƀing mơnuih mơng 5-11 thun mrô mơnuih tlâ̆o vaccine rơbêh 90%.

Kiăng kơ bruă tlâ̆o vaccine tal 25 djơ̆ hăng hơnong pơkă, Anom bruă wai pơgang tơlơi ruă kă tơring čar Dak Lak hơmâo pơphô bruă brơi Jơnum min mơnuih ƀon sang tơring čar hăng gơnong bruă ia jrao kiăng kơ git gai khut khăt ƀiă dong djop anom bruă mơng tơring čar truh tơring glông hăng să, laih dong kơtưn amăng bruă pơtô pơblang brơi mơnuih ƀon sang, kiăng mơnuih ƀon sang hluh rơđah hăng nao tlâ̆o vaccine kiăng pơgang klin ƀu djơ̆ pơgang tơlơi duam ruă, bruă tlâ̆o vaccine lĕ tơlơi dưi, bruă kiăng ngă mơng rĭm čô mơnuih.

Siu Đoan: Pơblang