VOV4.Jarai - Hơdôm boh tơring amăng tơring čar Dak Nông glăk pơtrut tañ bruă tlâ̆o arăt 3 vaccine pơgang Covid-19 kơ mơnuih ƀon sang laih anun him lăng amra ngă giong amăng blan 3 anai. Yap truh tlam lơ 9/3, tơring čar Dak Nông hơmâo tlâ̆o brơi rơbêh 1,22 klăk liêu vaccine pơgang Covid-19 kơ mơnuih ƀon sang. Amăng anun, tơring čar hơmâo tlâ̆o giong laih arăt 2 kơ ƀing mơng 12 thun truh kơ prong hloh. Hăng vaccine arăt 3, tơring čar hơmâo tlâ̆o brơi laih năng ai 90% mrô mơnuih mơng 50 thun, ƀu hơmâo pran pơgang tơlơi duam ruă, mơnuih tlâ̆o vaccine Vero Cell, hăng tlâ̆o pơhrua tui dong hơmâo 1/3 mrô mơnuih mơng 18 thun. Gơnong bruă ia jrao Dak Nông brơi thâo, tơdah mă djŏp laih mrô vaccine mơng Ding jum ia jrao brơi, tơring čar amra tlâ̆o giong arăt tal 3 amăng blan anai mơtăm, laih anun tañ tlâ̆o pơgang brơi kơ rơbêh 94.000 čô čơđai mơng 5 truh 11 thun. Truh mơguah lơ 9/3, tơring čar Dak Nông čih pioh hơmâo 24.526 čô mơnuih ƀă klin Covid-19, amăng anun lêng kơ suaih soh yơh; hơmâo 43 čô mơnuih djai.

Siu H’Mai: Pơblang