Tui hăng tơlơi pơsit mơ̆ng Jơnum min mơnuih ƀôn sang tơring čar Dak Nông tŭ mă, hơmâo ruah yă Võ Thị Ái Liễu, Khua anom bruă pơhlôm nua mơnuih mơnam tơring čar Dak Nông ngă Khua gơnong bruă ia jrao tơring čar, mă bruă amăng 5 thun, dong mơ̆ng lơ 1/7/2023. Yă Võ Thị Ái Liễu tơkeng thun 1977, plơi hơđăp ñu pơ tơring čar Bình Định. Ñu hrăm Đại học Y Khoa, Thạc sĩ wai lăng tơlơi bơwih ƀong. Hrăm bruă kơđi čar gưl prong. Yă Võ Thị Ái Liễu hlâo adih ñu ngă ơi ia jrao, Khua anom bruă pơsit mă yua prăk kăk, giong anun ngă Kơ-iăng khua hăng ngă Khua anom bruă pơhlôm nua mơnuih mơnam tơring čar Dak Nông (mơ̆ng blan 6 thun 2021 truh ră anai).

Mơ̆ng blan 12/2020, yă Nguyễn Thị Thanh Hương, Khua gơnong bruă ia jrao tơring čar Dak Nông ƀu hơmâo ruah glăi dong tah, yua hơmâo khua jăm ƀuah. Dong mơ̆ng anun truh ră anai, Gơnong bruă ia jrao tơring čar Dak Nông mơ̆ng hơmâo glăi pô ngă khua.