VOV4.Jarai - Lơ 24/8, Jơnum min mơnuih ƀon sang tơring čar Dak Nông pơphun bruă tlâ̆o vaccine pơgang Covid-19 thun 2022. Tui hăng tơlơi pơhing, truh mông anai hơmâo laih rơbêh 87% mrô mơnuih rơbêh 18 thun ƀơi Dak Nông hơmâo tlâ̆o ară 3 vaccine pơgang Covid-19, laih anun anai jing tơring čar tlâ̆o vaccine pơgang Covid-19 klă mrô 6 amăng lŏn ia ta.

Khă hnun, bruă tlâ̆o vaccine pơgang Covid-19 ƀơi lu anih či Dak Nông glăk dŏ kaih mơn, biă ñu tlâ̆o ară 2 kơ čơđai mơng 5 truh yŭ 12 thun, ară 3 kơ čơđai mơng 12 truh yŭ 18 thun. Amăng hrơi pơphun, Jơnum min mơnuih ƀon sang Dak Nông kiăng hơdôm anom bruă gơgrong bruă hloh, pơƀut tlâ̆o brơi djŏp ară jrao tui mrô pơkă kiăng hơmâo hăng čơđai mơng 5 truh yŭ 12 thun, pơhlôm ngă giong amăng blan 8 anai; gir ngă giong tañ bruă tlâ̆o ară 4 kơ mơnuih ƀon sang mơng 18 thun truh kơ prong hloh laih anun pơtrut tlâ̆o tañ ară 3 kơ ƀing čơđai mơng 12 truh yŭ kơ 18 thun tui tơlơi pơtô mơng Ding jum ia jrao hăng pơhlôm rơnuk rơnua.

Siu H’ Mai: Pơblang