VOV4.Jarai - Tui hăng Anom wai lăng tơlơi duam ruă tơring čar Daklak (CDC), lơ 7/6, ƀơi tơring čar čih pioh hmâo 1 čô mơnuih ruă Whitmore ƀơi plơi Chiềng, să Ia Lốp, tơring glông Ea Sŭp. Pô anun anăn N.T.V (đah kơmơi, tơkeng thun 2013, dô̆ ƀơi plơi Chiềng, să Ia Lốp, tơring glông Ea Sŭp). Lơ 4/6, pô ruă hmâo pô sang ba nao hơduah ĕp lăng ƀơi Sang ia jrao prong kual Dăp Kơdư, mut amăng anih pơjrao tơlơi ruă čơđai muai lom dô̆ hngal, pơ-iă 39 đô̆ C, 2 bơnah tơngiă ñu bơbrah prong, ƀu thâo pư̆ hlư̆. Ƀong huă tơnap tap. Truh lơ 7/6, pơ-iă drơi na nao, 41 đô̆ C. Pơčrang lăng lĕ ƀuh djơ̆ kơman tơlơi ruă Whitmore.

Kơman Burkhlderia Pseudomallei ngă ruă Whitmore. Rŭp Alijazaeera

Tơdơi kơ hmâo čih pioh mơnuih ruă Whitmore, CDC Daklak hmâo lăi glăi tañ laih kơ anom bruă bơdjơ̆ nao, hrom hăng anun pơphun pel ĕp, lăng tui ƀơi plơi pla kiăng pơgang hlôm hlâo huĭ lar hyu. Tơlơi ruă anai lĕ tơlơi ruă tưp amra tưp hyu kơ mơnuih hăng hlô mơnong. Bôh than ba truh lĕ yua kơman anai hmâo amăng ia hăng amăng lŏn hơƀak. Tơlơi ruă anai amra ngă djai mơnuih yua kơ bơbrah kơsô̆, bơdjơ̆ nao drah, tơdu hơtai pruăi lom ƀu dưi pơjrao hmao tlôn hăng djơ̆ hơdră. Djuai kơman anai dưi kơdŏng glăi hăng lu mơta jrao kinin juăt yua, lom anun pran kơdŏng glăi mơng drơi jăn ƀu dưi kơdŏng glăi ôh hăng kơman anai.

Ƀơi Việt Nam, mơnuih ruă Whitmore blung a dưi čih pioh amăng thun 1925, tơdơi kơ anun hmâo ƀơi hơdôm bôh anih anom amăng đơ đam dêh čar hăng đĭ lu tui hơdôm hrơi jê̆ hăng anai. Ƀơi Daklak anai lĕ pô blung a hmâo tơlơi ruă anai./.

Siu H’ Prăk: Pơblang