VOV4.Jarai - Lơ 14/10, Grŭp hyu mă bruă mơng Ding jum ia jrao yua kơ ơi Bùi Khánh Toàn, Kơ-iăng Khua Anom wai lăng klin ruă Dăp Kơdư ngă Khua Grŭp hmâo laih mông mă bruă hăng Sang ia jrao prong kual Dăp Kơdư hăng Anom wai lăng tơlơi duam ruă tơring car Daklak kơ bruă pơgang pơgăn klin ruă djơ̆ čut kra ƀơi tơring čar. Tui tơlơi lăi pơthâo glăi amăng mông mă bruă, tơdơi kơ hmâo tơlơi pơhing lăi pơtă kơ klin ruă djơ̆ čut mơng Khul ia jrao rŏng lŏn tơnah mơtăm, Gơnong bruă ia jrao tơring čar Daklak hmâo dăp hơdră bŏng glăi hăng pơphun lăng tui ƀơi hơdôm kual jơlan amur, jơlan pok, jơlan guai dêh čar.

Grŭp hyu pel ĕp kual pơjrao tơlơi ruă djơ̆ čut kra ƀơi Sang ia jrao prong kual Dăp Kơdư

Tơdơi kơ Việt Nam čih hmâo sa čô mơnuih ruă djơ̆ čut kra blung a ƀơi ƀôn prong Hồ Chí Minh, gơnong bruă ia jrao ăt pơphô brơi mơn kơ Jơnum min mơnuih ƀôn sang tơring čar Daklak mă yua Jơlan gah bruă mă jăng jai pơgang pơgăn ruă djơ̆ čut kra; pơhrăm brơi kơ mơnuih mă bruă ia jrao ƀơi khul pơjrao hăng pơhlôm hlâo. Sang ia jrao prong Dăp Kơdư ăt hmâo prăp lui laih hơdôm gơnam tam mă yua, măi mok hăng mơnuih mă bruă amăng pel ĕp ruah mă, pơpha glông, dô̆ čơlah hăng tŭ mă pơjrao mơnuih ruă djơ̆ čut kra. Kiăng pơđĭ tui bôh tơhnal bruă pơgang, pơgăn klin ruă djơ̆ čut kra, grŭp wai lăng pơphô kơ bruă črâo ba pơphun glăi ƀơi hơdôm Grŭp črâo ba pơgang pơgăn klin ruă; Kơtưn pel ĕp lăng tui, črâo ba pơgang, pơgăn klin ruă amăng đơ đam tơring čar, biă ñu lĕ hơdôm kual amra hmâo klin ngă./.

VOV.TN čih

Siu H’ Prăk pơblang