VOV4.Jarai - Hơdôm hrơi rơgao, Sang ia jrao prong Dăp Kơdư, hmâo tŭ mă hăng pơjrao brơi hơdôm pluh čô čơđai duam pơ-iă drơi MIS-C tơdơi kơ Covid-19 ngă, amăng anun hmâo ƀing čơđai ruă kơañăk, tơdu suă jua, hơtai bôh huĭ rơhyư̆t biă.

Bơwih brơi ană ƀơi Sang ia jrao prong kual Dăp Kơdư, amai Vũ Thị Hương, ƀơi phường Tân Lập, plơi prong Buôn Ma Thuột, tơring čar Daklak brơi thâo: Rơgao hăng anai rơbêh kơ sa blan, ană đah rơkơi 7 thun mơng ñu hmâo pơdah pơ-iă drơi jăn, sang anô̆ ñu brơi nô anet mơñum ia jrao hlưh pơ-iă hăng ƀuh ñu suaih anun ƀu hmâo nao test lăng ôh Covid-19 kơ gơ̆. Khă hnun hai, năng ai ñu 5 rơwang hrơi tơjuh tơdơi, nô anet pơ-iă drơi kơtang biă ƀu thâo hlưh pơ-iă dong tah, anun ba nao pơ̆ sang ia jrao. Tơdơi kơ ƀing ơi ia jrao pel ĕp lăng, ngă hơdôm bruă pơčrang lăng, bôh tơhnal brơi ƀuh nô anet duam MIS-C tơdơi kơ ƀă djơ̆ Covid-19.

“Huĭ rơhyư̆t biă, yua kơ ta ƀu thâo tañ pioh truh ră anai pơjrao ñu sui biă, tơdah ta thâo tañ mơ̆ nô anet duam yua kơ Covid-19 ngă ta pơjrao tañ hloh lĕ nô anet amra tañ suaih hloh, plai ƀiă hloh”.

Kah hăng amai Hương, ayong Nguyễn Chí Quốc ƀơi phường Ea Tam, plơi prong Buôn Ma Thuột ăt bơngot mơn hăng ƀu hmao thâo lom ƀing ơi ia jrao brơi thâo ană đah kơmơi ñu duam MIS-C yua kơ Covid-19 pioh glăi.

“Anô̆ pơdah gah rơngiao mơng mô̆ anet lĕ, blung a duam pơ-iă drơi amăng 4 hrơi hăng truh hrơi tal 5 kah mơng ba nao pơ̆ sang ia jrao, huing akô̆, ƀlĕ pơtah, ƀu thâo ƀong hơget. Ƀing ơi ia jrao ăt djru gum mơn hăng pơjrao brơi truh kơ ră anai mô̆ anet plai ƀiă laih, abih bang hơdôm anô̆ pơdah gah rơngiao leng kơ plai ƀiă sôh, ră anai ñu suaih laih, ƀong huă kah hăng tơđar laih".

Čơđai duam MIS-C rơgao kơ ƀă Covid-19 glăk dưi hmâo ơi ia jrao pel ĕp brơi ƀơi Sang ia jrao prong kual Dăp Kơdư

Tui hăng Nai prin tha, ơi ia jrao Trần Thị Thuý Minh, Khua Anom pơjrao tơlơi ruă čơđai muai Sang ia jrao prong kual Dăp Kơdư, tơlơi duam MIS-C lĕ ruă bơbrah amăng drơi jăn pha ra amăng anun hmâo hơtai bôh, kơsô̆, bôh ƀleh, glô, klĭ, mơta ƀudah hơdôm anih amăng kian pruăi ƀing čơđai amăng rơwang mơng 4 truh kơ 8 rơwang hrơi tơjuh tơdơi kơ ƀă djơ̆ Covid-19. Anai lĕ anô̆ pơdah kơdŏng glăi mơng drơi jăn kơtang biă, amra ba truh huĭ rơhyư̆t kơ čơđai, pioh glăi lu anô̆ ƀu klă amăng drơi hăng ƀudah ba truh kơ djai.

“Duam MIS-C tơdơi kơ Covid-19 ngă ƀu hluai tui kơ ta djơ̆ Covid-19 kơtang ƀudah rơnang ôh. Ƀing amĭ ama čơđai hmâo ană djơ̆ Covid ƀudah đing đăo djơ̆ Covid-19 hlâo kơ anun lĕ tơdơi kơ mơng 4 truh 8 rơwang hrơi tơjuh mơ̆ čơđai pơ-iă drơi lu hloh kơ 3 hrơi, mơta mriah, ƀuai mriah, jơlah mriah, ƀlĕ pơđeh, čroh kian, hlăk hluai, tơngan ƀlĕ pơđeh ƀudah tơngan bơbrah ôr lĕ ba nao pơ̆ sang ia jrao mơtăm kiăng dưi pel ĕp hăng pơjrao hmao tlôn, bĕ hơdôm tơlơi ba truh pơplih amăng drơi jăn amra hmâo”.

Duam MIS-C rơgao kơ Covid-19 ngă kơtang biă hăng amra ngă huĭ rơhyư̆t kơ čơđai. Khă hnun hai, tơdah thâo hăng ba nao pơ̆ sang ia jrao tañ, pơkă lăng hlâo djơ̆ hăng pơjrao hmao tlôn, lu ñu hơdôm mơnuih ruă amra suaih klă. Kiăng čơđai huăi duam tui anai, sang anô̆ tâ̆o hloh pơgang, bĕ kiăng čơđai huăi ƀă Covid-19. Khom brơi čơđai tlâ̆o vaccine Covid-19 kiăng plai ƀiă ruă kraih hăng plai ƀiă ba truh kơ djai lom hmâo tơlơi ruă./.

Nam Trang: Čih – Siu H’ Prăk: Pơblang