VOV4.Jarai - Tơring čar Daklak glăk pơtrut kơtang bruă tlâ̆o vaccine pơgang Covid-19 ară lok glăi mơng rim să, phường, hăng jơlan gah hyu rim jơlan, rim sang, hyu hơduah tơña rim mơnuih kiăng tlâ̆o pơgang brơi kơ mơnuih ƀôn sang. Kiăo tui anun, mơng ră anai abih blan 6 anai, Daklak khom tlâ̆o abih 260.000 liều vaccine pơgang Covid-19 hmâo pơpha brơi laih. Mrô vaccine anai dưi mă yua kiăng tlâ̆o ară tal 3 hăng ară tal 4 kơ mơnuih ƀôn sang mơng 18 thun truh kơ tha, hăng bôh tơhnal pơkă rơbêh kơ 95% mrô mơnuih ƀôn sang mơng 18 thun truh kơ tha dưi tlâ̆o pơgang ară tal 3; hăng hơdôm mơnuih mă bruă pơgang pơgăn klin, mơnuih hmâo tơlơi ruă pơkon amăng drơi jăn khom tlâ̆o ară tal 4. Tui hăng Anom wai lăng tơlơi duam ruă tơring čar Daklak, ră anai mrô hmâo tlâ̆o vaccine pơgang Covid-19 ară tal 3 ƀơi tơring čar phrâo hmâo rơbêh kơ 32%, hăng ară tal 4 phrâo hmâo 1,5%.

Anai lĕ mrô ƀiă biă bơhmu hăng tơlơi pơkă mơng Ding jum ia jrao. Ơi Hoàng Hải Phúc, Kơ-iăng Khua gơgrong bruă Anom wai lăng tơlơi duam ruă tơring čar Daklak brơi thâo, kiăng bruă tlâ̆o vaccine pơgang Covid-19 pơhlôm djơ̆ rơnoh, anom bruă hmâo gum hrom pơphô kơ Gơnong bruă ia jrao tơhnal pơkă rơđah kơ 15 bôh tơring glông, plơi prong, amăng anun rơkâo hơdôm bôh tơring glông, plơi prong khom hyu djop anih anom kiăng tlâ̆o pơgang kơ mơnuih ƀôn sang.

 “Ƀing gơmơi jao tơhnal pơkă kiăng tơring glông gum pơphô brơi Jơnum min mơnuih ƀôn sang tơring glông ba tơbiă bruă mă kơtang pioh kơ rim anih anom, rim plơi pla kiăng ngă tui. Ƀing gơmơi pơpha vaccine, plơi pla hơpă ƀu mă vaccine lĕ, Grŭp črâo ba mơng tơring glông khom pơkôl hăng Jơnum min mơnuih ƀôn sang tơring čar tơdah pioh hmâo klin ngă plơi pla khom gơgrong ba. Ƀing gơmơi ngă tui bruă hyu lăi pơhing amăng glông măi mok pôr pơhing; lăi pơhing ƀơi anăp ngă hiưm hơpă kiăng mơnuih ƀôn sang thâo hluh anun lĕ hơdôm hơdră pơtrun, hơdră bruă mơng Ping gah hăng bôh tŭ yua mơng mơnuih ƀôn sang lĕ khom gum hrom, yua kơ tlâ̆o vaccine anai lĕ tlâ̆o vaccine pơgang pơgăn Covid-19.”

Siu H’ Prăk: Pơblang