![Grŭp čih tơlơi pơhing VOV Tây Nguyên/Siu H’ Prăk pơblang](/themes/custom/vov_4/images/avatar.png)
Hơdôm hrơi anai, ƀơi hơdôm bôh phường Khánh Xuân, Thành Nhất, Tân Hòa hăng să Hòa Thuận, khul ơi ia jrao plơi prong Buôn Ma Thuột, tơring čar Dak Lak glăk run pran pioh pruih ia jrao pơdjai kač pơgăn tơlơi lar hyu mơ̆ng tơlơi ruă duam pơđung drah ƀơi hơdôm bôh phường.
Glăk gum hrŏm hăng ƀing apăn bruă, mă bruă ia jrao nao pruih ia jrao ƀơi anih klin ngă phrâo hmâo ƀơi phường Thành Nhất, amai Đỗ Thục Vi, gơgrong gah bruă pơgang pơgăn klin ruă mơ̆ng Anom ia jrao phường Thành Nhất brơi thâo, bruă mơnuih ƀôn sang akă ngă tui tơlơi pơkă kơ pơgang pơgăn duam pơđung drah lĕ bôh than phun ngă anih klin ngă gluh đĭ:
“Rơgao sang anô̆ duam pơđung drah anai lĕ ƀuh lĕ mơnuih ƀôn sang akă thâo dơlăm kơ anih anom dô̆ jum dar. Pô hmâo gum hrŏm laih hăng bruă ia jrao ƀơi anai hyu pơtô ba agaih anih anom dô̆, agaih sang dô̆ amăng bơyan hơjan, bơyan amra ba truh duam pơđung drah lu biă”.
![Mơnuih apăn bruă, mă bruă ia jrao plơi prong Buôn Ma Thuột pruih jrao ƀơi anih klin ngă phrâo pơ̆ phường Thành Nhất.](https://vov4-media.solidtech.vn/sites/default/files/styles/large/public/2024-07/3-7_can_bo_y_te_phun_hoa_chat.jpg)
Anih klin ngă duam pơđung drah anai dưi thâo amăng lơ 19/6 phrâo rơgao ƀơi sang anô̆ amai Lê Thị Thuận, jơlan Nguyễn Phúc Chu, phường Thành Nhất, hăng 3 čô mơnuih amăng sang anô̆ hmâo tơlơi ruă. Tui hăng tơlơi amai Thuận, 3 čô amĭ ană ñu amăng ƀrư̆ ƀuh pơ-iă drơi jăn, pơjrao mă ƀơi sang ƀu suaih anun nao pơ̆ sang ia jrao:
“Abih bang khom nao sang ia jrao, arăng test drah lăi lĕ duam pơđung drah. Tơlơi ruă anai huĭ rơhyư̆t yua kơ pơ-iă drơi rơgao đơi, laih anun dô̆ duam pơđung drah amăng lăm dong. Tơdơi kơ suaih ruă glăi pơ̆ sang kâo ăt rơmet mơn pưk sang, ƀơi hơpă hmâo ia dŏng lĕ khom pơđoh hĭ ñu kiăng huăi hmâo keč čeh čar lar djuai".
Hăng sa amăng 3 anih anom čih mrô mơnuih duam pơđung drah lu hloh ƀơi tơring čar Dak Lak, hăng 84 čô mơnuih, Anom bruă ia jrao plơi prong Buôn Ma Thuột glăk črâo ba Sang ia jrao să, phường pơsit abih hơdôm anih klin gluh đĭ prong. Hrŏm hăng anun, kơtưn pel ĕp, lăng tui kơjăp tơlơi klin ruă, lu biă ñu ƀơi hơdôm anih hmâo klin ngă hơđăp, amra gluh đĭ pioh thâo tañ mơnuih phrâo duam pơđung drah. Tui hăng ơi Võ Minh Hùng, Khua Anom bruă ia jrao plơi prong Buôn Ma Thuột, duam pơđung drah glăk hmâo tơlơi ngă tơnap lơm mrô duam pơđung drah amăng blan 6 hmâo 50% mrô mơnuih mơ̆ng akô̆ thun truh ră anai. Lăp đing nao, hmâo čih pioh 2 anih klin ngă ƀơi phường Thành Nhất hăng phường Khánh Xuân.
“Truh mông anai ƀơi plơi prong kah hăng abih bang hơdôm bôh să, phường hmâo pơphun bruă agaih rơmet anih anom dô̆ hăng Anom bruă ia jrao hmâo čih pơkra laih kơčăo bruă pruih ia jrao gơgrong hlâo kơ 2 bôh să phường hmâo mrô mơnuih ruă duam pơđung drah amăng 3 thun rơgao lu lĕ să Hòa Thuận hăng phường Tân Hòa, ƀing gơmơi pok pơhai mơ̆ng rơwang hrơi tơjuh hlâo hăng amra pơđut amăng rơwang hrơi tơjuh anai”.
Tui tơlơi lăi pơthâo glăi mơ̆ng Anom wai lăng tơlơi duam ruă tơring čar Dak Lak, truh rơnuč blan 6, đơ đam tơring čar čih hmâo 480 čô mơnuih ruă duam pơđung drah. Duam pơđung drah ƀơi abih bang 15/15 bôh tơring glông, plơi pring. Ơi Hòang Hải Phúc, Khua Anom wai lăng tơlơi duam ruă tơring čar Dak Lak brơi thâo, bruă pơgang pơgăn duam pơđung drah glăk dưi hmâo Gơnong bruă ia jrao pok pơhai tañ:
“Gơnong bruă ia jrao črâo ba Anom wai lăng tơlơi duam ruă tơring čar khom kơtưn lăi pơthâo glăi amăng hrơi 4 rim rơwang hrơi tơjuh. Hrŏm hăng anun črâo ba Sang ia jrao prong kual hăng hơdôm bôh sang ia jrao prong amăng đơ đam tơring čar khom lăi pơthâo tơlơi ruă amăng hrơi 4 rim rơwang hrơi tơjuh pioh ƀing ơi ia jrao mơ̆ng thâo pơsit kơ bruă pơjrao duam pơđung drah phrâo hloh. Hrŏm hăng anun ƀing gơmơi hmâo kơtưn lăi pơhing hyu pioh lăi pơthâo kơ mơnuih ƀôn sang agaih anih anom dô̆ klă, agaih rơmet pưk sang rim hrơi hăng lơm hmâo gru nam duam pơ-iă drơi khom nao pơ̆ sang ia jrao”.
Ƀơi Gia Lai, Anom wai lăng tơlơi duam ruă tơring čar brơi thâo, duam pơđung drah hmâo gluh đĭ laih ƀơi abih bang 17 bôh tơring glông, plơi prong hăng giăm truh 600 čô mơnuih duam pơđung drah. Hơdôm anih hmâo mrô mơnuih duam pơđung drah lu lĕ plơi prong Plei Ku, hơdôm bôh tơring glông Krông Pa, Kông Čro, Đăk Pơ. Dong mơ̆ng akô̆ thun truh ră anai, tơring čar Gia Lai čih pioh hmâo 312 bôh anih klin ngă, amăng anun hmâo 35 bôh anih klin ngă akă dưi pơgăn. Tui hăng gơnong bruă ia jrao tơring čar Gia Lai, hơdôm mơnuih duam pơđung drah đĭ tañ mơ̆ng blan 5 hăng truh kơ ră anai yua kơ bơyan hơjan lĕ tơlơi gal kơ keč čeh čar lar djuai, bôh čeh.
![Mơnuih ƀôn sang ƀơi Gia Lai ƀu pioh hơdôm gơnam yua ia dŏng pioh pơgang duam pơđung drah](https://vov4-media.solidtech.vn/sites/default/files/styles/large/public/2024-07/3-7%20Nguoi%20dan%20Gia%20Lai%20don%20ve%20sinh.jpg)
Duam pơđung drah amra đĭ lu hăng ngă tơnap pơ̆ anăp anai lơm mrô ia hơjan lu, ayuh hyiăng pơsah ƀiă, jing tơlơi gal pioh lăng kuăng, bôh keč čeh čar lar djuai. Ơi Nguyễn Văn Đồng, Kơ-iăng Khua Anom wai lăng tơlơi duam ruă tơring čar Gia Lai brơi thâo:
“Anom gum hrŏm hăng hơdôm bôh tơring glông kơtưn bruă pruih ia jrao pioh pơgang, pơgăn hăng pơđut klin duam pơđung drah. Gum hrŏm hăng anom ia jrao pok pơhai pơjrao klă, wai lăng mơnuih ruă. Pơtô ba mơnuih ƀôn sang, biă ñu ƀơi hơdôm bôh să hmâo anih klin ngă agaih kiăng plai ƀiă lăng kuăng yua kơ keč čeh bôh rai”.
Dap Kơdư glăk amăng bơyan hơjan, bơyan gêh gal kơ duam pơđung drah đĭ lu hăng amra gluh đĭ ƀơi lu anih. Kiăng wai lăng tơlơi ruă duam pơđung drah, hrŏm hăng tơlơi gum hrŏm mơ̆ng hơdôm bôh ƀirô apăn bruă, rim mơnuih ƀôn sang khom lăng yôm bruă pơgang mă pô. Blung hlâo lĕ jah agaih amur rok kyâu, rơmet agaih hơdôm anih dŏng ia pioh plai ƀiă kač čeh bôh lăng kuăng./.
Viết bình luận