Glăk dŏ pơjrao yua ruă bơbrah amăng hlung pruăi pơglăi mơng ruă ƀlĕ ia mơañă sik ƀơi anom bruă Khoa nội sang ia jrao tơring glông Krông Ƀuk, amai H’Pốc M’jrao, dŏ ƀơi ƀuôn Adrơng Prong, să Čư̆ Pơng brơi thâo, anai lĕ tal 2 amăng thun anai ñu nao đih pơ sang ia jrao. Dua wŏt lêng kơ hơđong amăng pran jua yua hơmâo ƀing ơi ia jrao ƀơi anai abih pran jua pơjrao brơi:

“Ơi ia jrao đing nao bruă pơjrao brơi mơnuih duam ruă. Rai pơjrao ƀơi anai kâo huăi bơngŏt lu đơi ôh. Ră anai kâo plai ƀiă yơh”.

Đih giăm sưng amai H’Pốc lĕ ayung Y Thế Niê, dŏ ƀơi ƀuôn Ea Brơ, să Čư̆ Pơng, tơring glông Krông Ƀuk, glăk dŏ pơjrao yua ruă kơsô̆. Ñu ruă giăm ha blan laih, hrơi blung a nao đih pơ sang ia jrao plơi prong Ƀuôn Hồ adih, laih anun ba nao pơ sang ia jrao tơring glông Krông Ƀuk. Tơdơi kơ 4 hrơi pơjrao, ñu ƀuh tơlơi ruă jai hrơi plai ƀiă yơh:

“Ƀơi anai agaih rơnăk, ơi ia jrao đing nao mơnuih duam ruă, ia jrao ăt djop ƀiă pơhmu hăng sang ia jrao Ƀuôn Hồ. Ră anai kâo plai ƀiă yơh, năng ai ñu pơgi amra glăi pơ sang”.

Tui ơi ơi jrao Y Păm Ayun, khua anom bruă Khoa Nội, sang ia jrao tơring glông Krông Ƀuk, 2 blan giăm anai, lơm sang ia jrao pơgiong bruă blơi mut jrao, mrô mơnuih duam ruă nao pơjrao lu tui, đa hrơi lu đơi:

“Mơng blan 4 truh blan 7 kơƀah ia jrao, lu mơnuih rai khăm ƀu hơmâo jrao mơñum, laih anun ƀing gơñu nao ĕp pơkŏn. Samơ̆ dong mơng blan 9, blan 10 jrao ba glăi lu yơh. Pơhmu hăng hơnong pơkă akŏ thun mơng gơnong bruă ia jrao ăt hơmâo sa, dua hrơi ƀuh lu mơnuih rai pơjrao. Rĭm hrơi arăng brơi 25 boh sưng đôč, samơ̆ ăt hơmâo hrơi mơng 27 truh 28 boh sưng”.

Ƀơi kual kơdư tơring čar Dak Lak, rĭm thun, sang ia jrao tơring glông Krông Ƀuk tŭ mă hăng pơjrao brơi giăm 5.700 čô mơnuih. Tal klin Covid-19 hơđuh đĭ, sang ia jrao hơmâo pơjrao brơi rơbêh 3.500 čô mơnuih ƀiă klin Covid-19 mơng hơdôm tơring glông Krông Ƀuk, Ƀuôn Hồ, Krông Năng hăng Ea Hleo. Tơdơi kơ abih klin, kar hăng lu sang ia jrao pơkŏn, sang ia jrao tơring glông Krông Ƀuk bưp tơnap tap yua kơƀah jrao hăng gơnam gah ia jrao. Samơ̆, hăng tơlơi gir run ƀu pơdơi, blan 9 laih rơgao, Krông Ƀuk hơmâo pơgiong bruă tuh pơ alin blơi jrao, anai lĕ sa amăng ƀiă sang ia jrao ƀơi tơring čar Dak Lak pơsir hĭ bruă kơƀah jrao hăng gơnam gah ia jrao kiăng pơhlôm khăm pơjrao brơi mơnuih duam ruă. Ơi Trần Thuận, Khua sang ia jrao tơring glông Krông Ƀuk brơi thâo:

“Sang ia jrao rơkâo sa akŏ bruă, blung hlâo lĕ dưm dăp glăi mơnuih mă bruă, dua dong lĕ ngă hiưm pă kiăng hơmâo djop jrao hăng gơnam gah ia jrao kiăng khăm pơjrao brơi mơnuih ƀon sang, tal tlâo lĕ akŏ pơjing hơdôm grup nao tơl hơdôm boh să, plơi pla kiăng kơ lăi pơthâo sang ia jrao hơmâo djop jrao hăng dưi khăm pơjrao brơi abih bang, mơng anun mơnuih ƀon sang amra pot glăi khăm pơjrao lu tui dong”.

Hăng tơlơi gir run, pơsir hĭ tơnap tap mơng ƀing apăn bruă, ơi ia jrao, nai ia jrao, hơdôm thun giăm anai, bruă khăm pơjrao ƀơi sang ia jrao tơring glông Krông Ƀuk jai hrơi hrưn đĭ klă tui dong, mrô mơnuih ruă kraih ba nao pơ sang ia jrao prong hrŏ trun, mơnuih duam ruă nao pơjrao jai hrơi lu tui. Sang ia jrao jing anih gơnang nao kjăp kiăng bơwih brơi tơlơi suaih pral kơ mơnuih djop djuai ania amăng tơring glông./.