Tui mrô jŭ yap mơng anom bruă wai pơgang tơlơi duam ruă tơring čar Dak Lak, mơng akŏ thun truh ră anai, đơ đam tơring čar hơmâo giăm ha rơbâo čô mơnuih duam đung drah, amăng anun hơmâo 1 čô djai. Mrô mơnuih duam đung drah jŭ yap mơng akŏ blan 7 truh ră anai lĕ giăm 500 čô, bơkơnar hăng mrô mơnuih duam amăng tơring čar amăng 6 blan akŏ thun. Amăng mrô anai, lu mơnuih khŏm ba nao đih pơ sang ia jrao yua duam kơtang, tui hăng arăng pơhŭi hlâo. 3 boh tơring glông hơmâo mơnuih duam đung drah lu hloh lĕ tơring glông Ea H’Leo, Ea Kar hăng plơi prong Buôn Ma Thuột.

Ơi Hoàng Hải Phúc, kơ-iăng khua anom bruă wai pơgang tơlơi duam ruă tơring čar Dak Lak brơi thâo, boh truh kơ bruă hơmâo lu mơnuih duam đung drah amăng tơring čar lĕ yua mơnuih ƀon sang pơtah hơtai amăng pơgang guam đung drah. Lơm duam juăt blơi mă jrao glăi mơñum pơ sang, tơlơi anai ngă tơlơi ruă jai kơtang hăng tơnap pơjrao, amuñ ngă djai mơnuih.