Tui hăng mrô jŭ yap, ĕp lăng mơ̆ng anom bruă ia jrao, kman ană keč brung čeh čar lar lu biă mă, dŏ amăng anih ta ƀu pơmin nao ôh kah hăng blŏ ia, blŏ dưm bơnga, amăng ia tơdjôh măi ngă rơ-ơ̆ amăng sang, anun yơh duăm đung drah hơđuh glăi kơtang wơ̆t amăng bơyan adai pơ-iă hang hlâo kơ anai hai. Amăng 5 blan akŏ thun 2024, đơ đam tơring čar Dak Nông hơmâo čih pioh yap truh 463 čô mơnuih ƀă  duăm đung drah kman Dengue, đĭ lu hloh sa mơkrah pơkă hăng tal anai thun 2023. Mơnuih duăm lu hloh ƀơi hơdôm tơring glông Dak Song, Dak Rlâp, plơi prong Gia Nghĩa.

Biă mă ñu ƀơi Gia Nghĩa, tui hăng anom bruă ia jrao krăp lăng ƀuh mrô mơnuih amăng 100.000 čô hơmâo 330 čô mơnuih ƀă kman duăm đung drah, đĭ lu hloh 2,2 wơ̆t tui rơnoh pơkă bruă pơgăn kman duăm ruă. Ơi Êban Thanh Sơn, Kơ-iăng Khua Sang bruă sem lăng kman duăm ruă tơring čar Dak Nông lăi, Anom bruă ia jrao bơngơ̆t biă mă duăm đung drah hơđuh glăi amra kơtang amăng bơyan hơjan pơ anăp. Ră anai hlăk dŏ krăo lăng tong ten rim hrơi kiăng thâo rơđah hloh tơlơi pơhing hăng amra pơtum mơnuih mă bruă gah ia jrao, pơƀut gơnam yua mă bruă, rơdêh đĭ, ia jrao pruih pơdjai kman kiăng pơsir hĭ anih ƀă klin lu.