Glăk bơwih brơi kơ ană duam pơđung drah ƀơi Anom hơkrŭ glăi pran jua tơdơi kơ pơjrao ječ čơđai muai hăng ană nge, Sang ia jrao prong kual Dap Kơdư, amai Nguyễn Thị Nguyệt Ánh, ƀơi să Ea Tiêu, tơring glông Čư̆ Kuiñ, tơring čar Dak Lak brơi thâo, yua kơ ƀu đing nao anun lơm ană phrâo hmâo tơlơi ruă sang anô̆ kơnong kơ nao blơi mă jrao mơñum đô̆č. Lơm ruă krăih anun kah mơ̆ng ba nao pơ̆ sang ia jrao anun yơh tơlơi ruă ñu krăih biă hăng pơdah gah rơngiao suă pran tơdu, hmâo gru nam prung amăng drah khom jôr drah.

 “Ñu duam giong lơm anun kâo gun rơngiă 2 hrơi, khom mơ-ĭt kơnang kơ mơnuih juăt, truh hrơi tal 3 kah mơ̆ng ba nao pel ĕp lĕ duam bơbrah rơkông đok laih anun mơñum jrao sa hrơi, truh hrơi tal 4 ñu ƀlĕ rai tit tŭt mriah laih anun ba nao pơ̆ sang ia jrao tơring glông Čư̆ Kuiñ hăng ba rai pơ̆ anai. Pơ̆ sang ƀlĕ pơtah samơ̆ truh pơ̆ anai ƀuh tơlơi ruă kơtang tui, ăt huĭ mơn”.

Ƀơi sưng đih mơnuih ruă giăm anun, amai Hoàng Thị Điệp ƀơi să Čư̆ Ê Bur, plơi prong Buôn Ma Thuột ăt glăk kơđiăng bơwih brơi kơ ană đah rơkơi 8 thun duăm pơđung drah mơn. Ană amai Điệp ba nao pơ̆ sang ia jrao ăt amăng tơlơi drah hrŏ trun amăng drơi jăn, ƀing ơi ia jrao khom jôr ia na nao mơn:

 “Hrơi 4 rơwang hrơi tơjuh hlâo ñu pơ-iă drơi, tơdơi kơ anun kâo ba nao pơ̆ Sang ia jrao plơi prong pel ĕp lăng ƀơi anun klah čun ñu duam bơbrah rơkông đok, 3 hrơi tơdơi brơi nao pơčrang lăng lĕ ƀuh ñu duăm pơđung drah. Truh mơmot lĕ ñu ruă jai kơtang tui khom ba ñu nao pơjrao ječ ƀơi Sang ia jrao prong Kual. Lơm ba rai pơ̆ anai lĕ drơi jăn ñu hlưh pơ-iă ƀơƀiă laih, samơ̆ jôr ia lu biă hăng asar drah ñu hrŏ trun hăng dŏng amăng rơnoh huĭ rơhyưt”.

Ƀơi Sang ia jrao prong kual Dap Kơdư ră anai hmâo 3 bôh Anom glăk tŭ mă, pơjrao brơi kơ mơnuih duam pơđung drah anun lĕ Anom pơjrao tơlơi ruă tưp ƀă kơman, Anom pơjrao čơđai muai hăng Anom hơkrŭ glăi pran jua tơdơi kơ pơjrao ječ čơđai muai hăng ană nge. Tui hăng mrô yap mơ̆ng hơdôm Anom pơjrao mơ̆ng akô̆ thun truh ră anai, hơdôm bôh Anom tŭ mă hăng pơjrao brơi năng ai ñu 500 čô mơnuih duam pơđung drah, lu biă ñu amăng blan 7 hăng akô̆ blan 8. Tui hăng ơi ia jrao Hoàng Ngọc Anh Tuấn, Khua Anom hơkrŭ glăi pran jua tơdơi kơ pơjrao ječ čơđai muai hăng ană nge, ƀing čơđai ba nao pơ̆ sang ia jrao hmâo lu čơđai duam pơđung drah krăih, lơm ba nao sang ia jrao lơm kơañak, ƀlĕ pơtah tơbiă drah, ... ngă huĭ rơhyưt truh tơlơi hơdip hăng tơlơi suaih pral čơđai muai.

 “Pô hơpă rai pơ̆ anai leng kơ kơañăk hăng kơañăk glăi. Čang rơmang ƀing amĭ ama čơđai ƀudah pô bơwih brơi čơđai lơm thâo čơđai hmâo gru nam blêng hlang kah hăng pơ-iă drơi jăn, pơdah kơañăk ƀudah lui ƀong huă thơ tâ̆o hloh ba nao pơ̆ sang ia jrao giăm hloh pioh dưi pel ĕp hăng lăi pơthâo brơi tơlơi lơm pơplih jing kơtang tui bơwih brơi ƀu hmao”.

Tui hăng Anom wai lăng tơlơi duam ruă tơring čar Dak Lak, mơ̆ng akô̆ truh truh ră anai, đơ đam tơring čar hmâo čih pioh 1.325 čô mơnuih duam pơđung drah Dengue. Kơnong mơ̆ng akô̆ blan 8 truh ră anai hmâo rơbêh kơ 400 čô mơnuih ruă. Plơi prong Buôn Ma Thuột lĕ anih anom hmâo mrô mơnuih duam pơđung drah lu hloh tơring čar, hăng 422 čô mơnuih. Ơi Hoàng Hải Phúc, Khua Anom wai lăng tơlơi duam ruă tơring čar Dak Lak brơi thâo, ƀơi anăp tơlơi klin ruă lar tưp hyu ƀơi tơring čar Dak Lak đĭ tañ hăng ngă tơnap, anom hmâo rơkâo laih Gơnong bruă ia jrao tơring čar pơhrua nao dong prăk mă yua pơgang, pơgăn klin ruă lar tưp hyu tañ, dô̆ kơƀah hăng abih bang prăk mă yua năng ai ñu 500 klăk prăk.

 “Thun anai klin ngă đĭ ƀu hmao thâo hăng ƀing gơmơi hmâo djru laih hơdôm bôh tơring glông lu biă, samơ̆ ră anai gah ia jrao, put jrao ăt kah hăng măi mok lĕ, ƀing gơmơi glăk lăi pơthâo kơ Gơnong bruă ia jrao tơring čar kiăng rơkâo pơhrua nao. Gơnong bruă ia jrao hmâo lăi pơthâo kơ Gơnong bruă prăk kak, bơ̆ Gơnong bruă  prăk kak lĕ lăi pơthâo kơ Jơnum min pioh pơsit hiưm hơpă, năng ai ñu ăt khom dô̆ tơguan mơn. Ƀing gơmơi čang rơmang hmâo prăk tañ pioh blơi ia jrao, put jrao, kơthung pruih jrao, hơdôm măi mok pruih pioh djru pơhlôm pơ̆ anăp anai”.

Tui tơlơi pơkă lăng hlâo mơ̆ng gơnong bruă ia jrao, mơ̆ng ră anai truh rơnuč thun 2024, klin duam pơđung drah amuñ gluh đĭ prong biă ƀơi sa dua anih anom gah kual Dap Kơdư, amăng anun hmâo tơring čar Dak Lak. Bruă pơgăn klin ruă glăk bưp lu tơlơi tơnap yua kơ amăng mơnuih ƀôn sang ăt dô̆ mơn tơlơi ƀu đing nao, lui raih, bơ̆ gơnong bruă ia jrao ƀơi sa dua anih anom lĕ, glăk kơƀah ia jrao gun hăng gơnam mă yua gah ia jrao./.