Dong mơ̆ng akô̆ thun truh ră anai, tơring čar Kon Tum čih pioh hmâo 33 bôh anih hmâo duam pơđung drah hăng rơbêh kơ 160 čô mơnuih ruă, bơhmu hăng thun hlâo đĭ 10 bôh anih klin ngă hăng đĭ 98 čô mơnuih ruă. Ră anai klin ruă duam pơđung drah ƀơi Kon Tum glăk lar hyu prong. Kah hăng ƀơi tơring glông Kon Plông, anih hơdôm thun hlâo akă hmâo tơlơi ruă anai, ră anai hmâo anih klin ngă hăng 4 čô mơnuih duam pơđung drah.

Bơ̆ ƀơi tơring glông Kon Braih hmâo čih pioh rơbêh kơ 110 čô mơnuih duam pơđung drah, lu hloh amăng hơdôm bôh tơring glông, plơi prong mơ̆ng tơring čar Kon Tum khă hmâo gơgrong hlâo pok pơhai bruă pơgang pơgăn klin. Tơring čar Kon Tum hmâo ngă giong laih bruă grŭp črâo ba pơgang pơgăn klin ngă hơdôm gưl; prăp lui prăk mă yua, gơnam tam gah ia jrao; lăi pơhing, lăi pơthâo ƀơi anăp bôh thâo pơgang, pơgăn klin duam pơđung drah brơi giăm truh kơ 26.000 čô mơnuih ƀôn sang; pơphun rơbêh kơ 2.200 tal hyu pơdjai lăng kuăng bôh keč./.